"د طالبانو مرکچي پلاوی ۹ میاشتې له تور نوملړ و اېستل شو"

وسلوال طالبان وايي، له امریکا سره د دې ډلې د سولې خبرو مرکچي پلاوی د نهو میاشتو لپاره د ملګرو ملتونو له تور نوملړ اېستل شوی دی. تراوسه ملگرو ملتونو په دې تړاو څه نه دي ویلي. تېره فرورۍ کې افغان حکومت روسیې ته د طالبان استازو د وروستي سفر او پاکستان ته د اعلان شوي سفر له امله ملګرو ملتونو ته شکایت وکړ.

طالبانو د سره صلیب او روغتیا نړیوال سازمان پر فعالیتونو بندیز ولګاوه

وسله والو طالبانو په افغانستان کې د سره صلیب او د روغتیا د نړیوال سازمان یا "ډبلیو اېچ او" پر فعالیتونو له خپلې خوا بندیز لګولی دی. دوی په یوه اعلامیه کې ویلي چې د روغتیا د نړیوال سازمان د واکسیناسیون د کمپاین په اړه ځینې شکونه موجود وو.

سودان: پوځ د عمر البشیر حکومت نسکورولو اعلان وکړ

سودان کې د دغه هېواد دفاع وزیر وايي، د ولسمشر عمر البشیر حکومت نسکور شوی دی او له لنډ مهاله دورې وروسته به ټاکنې تر سره شي. دفاع وزیر ویلي، د دوو کلونو لپاره یوه موقته دوره پیل شوې، چې له هغه وروسته به د نوي اساسي قانون له مخې ټاکنې وشي. د عمر البشیر استعفا غوښتنې په تړاو د اجتجاجونو له ډېرېدو وروسته د سودان پوځ له خلکو وغوښتل چې یوه اعلان ته انتظار وکړي.

ټرمپ له ایران سره د جګړې قانوني واک لري؟

د امریکا د بهرنیو چارو وزیر د چارشنبې په ورځ د دې هېواد کانګرېس ته له دې ځواب ور کولو ډډه وکړه، چې د ډونلډ ټرمپ حکومت پر ایران د برید قانوني واک لري که نه. د مشرانو جرګې ځینې غړي وايي، د ترهګرې ډلې په توګه د ایران د سپاه پاسدران پېژندلو سره ډونلډ ټرمپ غواړي د جنګ لپاره حقوقي لار پیدا کړي.

کهکشان کې د تور غار لومړی انځور خپور شو

ستور پېژندونکي توانېدلي چې لومړی ځل د بلک هول یاکهکشان کې د تور غار تصویر واخلي چې په په یوه لرې پراته کهکشان کې دی. دا خورا لوی غار دی، چې اوږدوالی یې څلور سوه میلیارده کیلومتره دی او د ساینسپوهانو په خبره د غار ټوله کچه د ځمکې له ټولټال حجمه درې میلیونه ځله زیات دی چې ساینسپوهان یې یوه 'لویه بلا' بولي.

عمران خان: وسلوالې ډلې د پاکستان په ګټه نه دي

د پاکستان لومړی وزیر عمران خان له بي بي سي سره تازه مرکه کې وايي، د خپل هېواد د راتلونکي لپاره د وسلوالو ډلو پرضد د هڅو هوډ لري. د نوموړي په خبره، دا کار د چا د فشار له امله نه کوي، بلکې د خپلو ګټو لپاره یې کوي.

ایران: د امریکا د سنټکام ترهګرو پرضد به هر ډول هڅې وکړو

د ایران د وسلوالو ځواکونو لویه درستیزوالۍ یوه بیانیه کې د امریکا له خوا د بهرنیو ترهګرو ډلو نوملړ کې د سپاه پاسداران زیاتول غندي. دوی وايي، چې ایران له دې وروسته په لوېدیځه اسیا کې د امریکا د مرکزي قومندانۍ اړوند ځواکونو یا سنټکام سره هم د ترهګرو په څېر چلن کوي.

د سولې مشورتي جرګه؛ طالبانو ته د ګډون بدل کې امنیتي ضمانت

افغانستان کې د سولې د مشورتي جرګې منتظمین وايي، حکومت طالبانو ته په دغه جرګه کې د ګډون لپاره د امنيتي ضمانتونو پر سپارلو کار کوي. د د جرګې چمتووالي کمېسیون ویاند عبدالرشید ایوبي وايي، تر اوسه یې طالبانو ته بلنه نه ده ورکړې، خو وايي د دغې بلنې پر ډول غور کوي.

افغان سوله؛ ارګ د اروپایي ټولنې د اعلامیې هرکلی وکړ

افغان حکومت د سولې د پروسې په تړاو د اروپایي ټولنې د وروستۍ اعلامیې هرکلی کړی. دې ټولنې تېره ورځ په لکسمبورګ کې تر یوې ناستې وروسته په یوه اعلامیه کې اعلان وکړ چې په افغانستان کې د سولې لپاره روانو هلو ځلو ملاتړ کوي، او تظمین ته یې چمتو ده

پاکستان هند ته: د الوتکو ټوټې دې هر چا ولیدې

د پاکستان د پوځ ویاند تورنجنرال اصف غفور وايي، بیا بیا درواغ ویل نه ریښتیا کېږي. نوموړي هند ته په اشاره وویل، نوی ډېلی وایي، د پاکستان اېف ۱۶ الوتکه یې غورځولې، خو ثبوت یې وړاندې نه کړ. نوموړی دا هم وايي، چې پاکستان د هند یوه نه، بلکې دوه الوتکې غورځولې دي.

امریکا د ایران سپاه پاسداران ځواک د ترهګرو ډلو لېست کې شامل کړ

د امریکا ولسمشر ډونلډ ټرمپ د دوشنبې پر ورځ اعلان وکړ چې د ایران د سپاه پاسداران یا د انقلاب ساتونکی ځواک به له دې وروسته د یوې بهرنۍ ترهګرې ډلې په توګه پېژني. په ځواب کې یې ایران هم د امریکا د پوځ مرکزي قومنداني د یوې ترهګرې ادارې په توګه نومولې

بادغیس جګړه؛ 'لسګونه طالبان او ۱۲ امنیتي سرتیري وژل شوي'

د افغانستان د دفاع وزارت وايي د بادغیس په بالامرغاب ولسوالۍ کې د افغان امنیتي ځواکونو او طالبانو ترمنځ جګړه شپږمې ورځې ته غځېدلې ده. دا جګړه تېره اونۍ هغه مهال پیل شوه چې سلګونه طالبانو په دې ولسوالۍ برید پیل کړ. په تېرو ورځو کې دواړو خواوو یو بل ته د درنې مرګ ژوبلې اړولو ادعاوې کړې دي.

زلمی خلیلزاد: د افغان سولې لپاره نوى خوځښت پيل شوى

افغان سولې لپاره د امريکا د بهرنيو چارو وزارت استازى زلمى خليلزاد خوشبيني څرگندوي چې د افغان سولې په تړاو نوى خوځښت پيل شوى. نوموړى وايي بېلابېلو گوندونو او ټولنو پورې اړوند افغانان اوس په گډه کار کوي.

برتانوي شهزاده جاسوسي ادارو سره 'پټ کار وکړ'

د برتانیا شهزاده ویلیم د خپل هېواد له دریو استخباراتي او امنیتي ادارو سره د درې اوونیو لپاره پټ کار کړی چې د دوی کاربڼه وګوري. هغه همدارنګه له ترهګرۍ سره د مبارزې له ډلو سره چې استخباراتي معلومات تجزیه او تحلیلوي او څېړنې تر سره کوي وخت تېر کړی.

دوحه کنفرانس: د افغان حکومت استازي ښایي له طالبانو سره وګوري

په افغان حکومت کې د ننه سرچینو ویلي، د قطر په پلازمېنه دوحه کې به د افغان سولې او پخلاینې لپاره یو کنفرانس جوړېږي، او په ډېر احتمال به د افغان حکومت استازي په دې کنفرانس کې د طالبانو له استازو سره هم مخامخ وګوري. تر اوسه د دې ناستې کره نېټه نه ده اعلان شوې