تېرو درې ورځو کې ۴۹۰ طالب بندیان خوشي شوي دي

افغانستان د حکومت د اطلاعاتو او رسنیو مرکز اعلان کړی چې د ولسمشر غني د فرمان په بنسټ په تېرو درې ورځو کې ۴۹۰ طالب بندیان خوشې شوي دي. ولسمشر غني د غبرګولي په ۱۳ یو فرمان صادر کړ چې ۸۸۷ طالب زاندانیان دې ازاد شي. د ازادېدونکو بندیانو په منځ کې داسې کسان هم شته چې په صعب العلاجه ناروغیو اخته دي.

کرېکټ نړیوال جام: اسټرالیا پاکستان ته ماتې ورکړه

د کرېکټ نړیوال جام سیالیو لړ کې د پاکستان او اسټرالیا تر منځ د انګلستان سمرسیټ په نوټن کې د لړۍ ۱۷ مه لوبه کې اسټرالیا پاکستان ته په ۴۱ منډو ماتې ورکړه. د ۳۰۷ منډو هدف ته رسېدو لړ کې پاکستان ټوله لوبډله د ۲۶۶ منډو له جوړولو وروسته له لوبغالي بهر شوه.

افغانستان د نړۍ تر ټولو نا امنه هېواد وبلل شو

په یوه تازه درجه بندۍ کې افغانستان له سوریې مخکې شوی او د نړۍ تر ټولو نا امنه هېواد بلل شوی دی. دغه درجه بندي د سولې او اقتصاد انسټیټیوټ له لورې خپره شوې ده چې مرکز یې د اسټرالیا په سډني کې دی. څېړنه کې ویل شوي، تېرو پنځو کلونو کې لومړی ځل په اوسط ډول نړۍ کې امنیت یو څه ښه شوی دی.

افغانستان کې لاهم شاوخوا ۲ میلیونه ماشومان درانه کارونه کوي

د افغانستان د کار او ټولنيزو چارو وزارت وايي څه باندې دوه ميليونه افغان ماشومان د خپلو کورنيو د اقتصادي چلوونې له پاره په کار بوخت دي چې سم نيمايي يې سخت کارونه کوي. د وزارت په وينا ، د جگړې ، بي وسۍ او بيوزلۍ له کبله کورنۍ اړوتې چې د زده کړې پرځاى پر خپلو ماشومانو کار وکړي.

د افغان سولې بهیر کې د جرمني منځګړتوب

د افغانستان سولې عالي شورا وايي، جرمني د افغانانو خپلمنځي خبرو ته چې تمه ده راتلونکو لسو ورځو کې پیل شي، د اسانتیا برابرولو لپاره چمتوالی ښودلی دی. دا شورا هیله منه ده چې روانې هڅې به د افغان حکومت او طالبانو ترمنځ خبرو ته لار برابره کړي.

طالبان: د خپلو بندیانو خوشي کېدل ښه ګام بولو

وسله والو طالبانو د افغان حکومت له زندانونو د خپلو یو شمېر زندانیانو د خوشي کېدو هرکلی کړی دی. دغې ډلې په یوه علامیه کې ویلي چې طالبانو تل د حکومت له نیول شویو کسانو سره د بند پر مهال ښه چلند کړی او د حکومت لخوا د طالب بندیانو د ازدیدو هرکلی کوي، او د دې لړۍ د دوام غوښتنه یې کړې.

د پاکستان پخوانی ولسمشر اصف علي زرداري نیول شوی

د پاکستان پخوانی ولسمشر اصف علي زرداري د تورو پیسو د سپینولو په تور د دغه هېواد په پلازمېنه اسلام اباد کې نیول شوی دی. ښاغلی زرداري وروسته له هغه نیول شوی چې د پاکستان سترې محکمې د ښاغلي زرداري او د هغه د خور په ضمانت خوشې کېدل رد کړل.

افغان حکومت لسګونه طالب بنديان له زندانونو خوشي کړل

افغان دولت لسګونه طالب بندیان له زندانونو خوشي کړي، دا کسان د هغو نژدې ۹۰۰ بندیانو له منځه دي چې ولسمشر غني يي د اختر په ورځ د خوشي کېدو اعلان کړی و. د سرچینې په وینا ټاکل شوې روانه اوونۍ د څرخي پله د زندان په ګډون له څو نورو محبسونو هم لسګونه بندیان خوشي شي.

فراه کې یوه کس د خپلې کورنۍ ۱۰ غړي وژلي

د فراه د ولایتي شورا غړي داد الله قانع بي بي سي ته ویلي چې د فراه د خاک سفید په سرکاریز سیمه کې یوه کس د خپلې کورنۍ لس غړي او یو ګاونډی وژلي دي. د ده په خبره پېښه تېره ورځ (غبرګولي ۱۹) یولس بجې هغه مهال رامنځ ته شوې چې دغه کس د کورني تاوتریخوالي او لفظي شخړې وروسته د خپلې کورنۍ د غړو، خپلوانو او ګاونډیانو په ګډون ۱۱ کسان وژلي او څوارلس نور یې ټپیان کړي دي.

خلیلزاد: سولې بهیر نوي پړاو ته ننوځي؛ افغانان باید ډېر ښکېل شي

افغان سولې لپاره د امريکا ځانگړى استازى زلمى خليلزاد وايي د افغان سولې بهير يوه نوي پړاو ته ننوځي، نو افغانان بايد تر پخوا هر کله اوس خبرو کې ډېر ښکېل شي. د ښاغلي خليلزاد دا څرگندونې پلازمېنه کابل کې له افغان ولسمشر محمد اشرف غني سره د نوموړي له کتنې وروسته مخې ته راغلې.

د خیبر پښتونخوا قبایلي ضلعو کې ټاکنو د ځنډولو غوښتنه شوې

د خیبر پښتونخوا حکومت د پاکستان د ټاکنو کمیسیون نه په قبایلي ضلعو کې د شل ورځو لپاره د ایالتي ټاکنو د ځنډولوغوښتنه کړې ده. خو شنونکي او سیاسي مخالفین تور لګوي چې یو شمېر کړۍ په دې سیمو کې اصلاً سیاسي ولسواکي او پارلماني نظام نه غواړي او هسې پلمې لټوي

"د فوټبال فدراسیون پخواني مشر له قضايي تعقیبه ځان پټ کړی"

یوې امنیتي سرچینې بي بي سي ته ومنله چې د فوټبال فدراسیون پخوانی مشر کرام الدین کریم چې د نجونو فوټبالغاړو د جنسي ځورونې په تور یې د نیولو حکم شوی، ورک دی. لویه څارنوالي وایي د ښاغلي کریم د نیونې حکم یوه میاشت وړاندې هغه مهال وشو چې د جنسي ځورونې قضیه کې د تحقیقاتو له پاره ورنغی.

امریکا کې د افغان مېرمنې مړی د خپل کور په یخچال کې موندل شوی

د یوې ۲۴ کلنې افغان مېرمنې ارزو مړی له څو ورځې لادرکۍ وروسته د واشنګټن د اسپوکن ښار کې د خپل کور په یخچال کې موندل شوی دی. د امریکايي رسنیو په خبره، ددې مېرمنې مېړه د مې په ۲۸مه نامعلوم مقصد په لور امریکا پریښې ده. د وژل شوې مېرمنې یوې ملګرې د هغې لادرکۍ خبره پولیسو ته کړې وه.

د افغانستان فوټبال فدراسیون پر پخواني مشر د ټول عمر لپاره بندیز ولګېد

د نړیوال فوټبال چارو سمبالونکې ادارې (فیفا) د افغانستان فوټبال فدراسیون پر پخواني مشر کرام الدین کرام د ښځینه لوبغاړو جنسي ځورونې له کبله د ټول عمر لپاره بندیز لګولی. نوموړی همدې قضیه کې نژدې یو میلیون ډالر جریمه شوی هم دی.

د امریکا او روسيې د جنګي بېړیو 'خطرناک' نږدې کېدل

د امریکا او روسیې دوه جنګي بېړۍ د ارام سمندر لوېدیځ کې څو متره لرې له یو بل تېرې شوې، داسې تېرېدل چې ډېرو خطرناکه او بې ضرورته بللې ده. هر لوری بل ملامتوي او ویډیویي انځورونو یې رسنیو کې سخت غبرګون پیدا کړی دی.