محمد ابراهيم مشرقي

ښاغلى محمد ابراهيم مشرقي د ارواښاد شهيد ګل محمود خان مشرقي زوى پر 1339ل كال په كندهار كې زېږېدلى دى، لومړنۍ زده كړې يې په فاضل كندهاري ښوونځي كې ترسره كړي چې وروسته له احمدشاه بابا لېسې څخه په ښو نومرو فارغ شوى دى، د كابل پوهنتون په كرنې پوهنځي كې يې خپلې زده كړې تر درېيم ټولګي پورې رسولې وې چې د غويي كرغېړنې كودتا توپان راوالوت اونوموړى هم پر1362 ل كال د خپلو زرګونو او لكونو كړېدلو هېوادوالو په څېر پاكستان ته كډوال شو، تر يوه كال وروسته امريكا ته لاړ او اوس د همدې هېواد په نيويارك ښار كې استوګن دى. نوموړى دخپلو ورځنيو ستونزو د غوڅاوي لپاره پرسوداګرۍ بوخت دى، له موسيقۍ سره بې كچه مينه لري چې دهمدې مينې او دپاك خداى د يوه نعمت(خوږ غږ او له سوزه ډك ترنم) په بركت يې په هنري دنيا كې ځان ته ځانګړى ځاى په نښه كړى دى، سربېره پردې د كډوالۍ په هغه ستونزمن چاپېريال كې افغاني ماشومانو ته د يوه ښه لارښود او مهربانه ښوونكي په توګه د هېواد تاريخ او پښتو ژبه په وړيا ډول تدريسوي، چې تر پنځه دېرشو زيات زده كوونكي لري، دوه ناچاپې شعري ټولګې لري او اوس هم لګيا دى شعرونه او نور مضامين ليكي.
شعر يې روان او ساده دى چې هڅه كوي نوي مضامين په كې راونغاړل شي، په هغه پردي چاپېريال كې يې د هېواد مينه په زړه كې تانده او څپانده ساتلې او هر مهال دخپل هېواد وياړونه او دخپلو سرلوړو هېوادوالو مېړانه او سرښندنې ستايي او دا د ځان لپاره ستر وياړ او لويه شتمني ګڼي.

 Site designed and administrated by Tolafghan.com 2003 webmaster@shirzad.de