عبدالحميد ارغنداوى

ښاغلى عبدالحيمدارغنداوى دلال محمدزوى پر 1321ل كال دكندهار ارغنداو ولسوالۍ په لوى تابين كلي كې زېږېدلى دى. لومړنۍ زده كړې يې په شاه اشرف ښوونځي كې پيل كړې او تر فراغت وروسته دكابل په ابن سينا منځني ښوونځي كې داخل او تر درېيو كلونو وروسته دكابل دارالمعلمين په لسم ټولګي كې شامل شو اوپر 1341ل كال يې د فراغت سند او برى ليك له ترلاسه كولو وروسته په كندهار دارالمعلمين او تجربوي ښوونځي كې د ښوونكي په توګه رسمي دندې پيل كړې، څه موده دارغنداو د غازي محمداكبرخان ښوونځي سرښوونكي او د محمدايوب خان منځني ښوونځي د ښوونكي د مرستيال په توګه هم پاتې شوى دى. پر 1358ل كال يې د ګڼو هېوادمينو افغانانو په څېر د مجبوريت له مخې پاكستان ته د هجرت لار خپله كړه، دكمونسټي ځواك تر ماتې وروسته بېرته هېواد ته راستون شو او په كندهار كې يې استوګنه غوره كړه.
پر اوس مهال د طلوع افغان ورځپاڼې دادب او هنر مدير په توګه دنده ترسره كوي.
نوموړى له ډېر پخوا نه له شعر سره مينه لرله، خو د هغه په وينا كله چې روسانو پر هېواد يرغل وكړ، نو شعر يې نور هم ځواكمن او په زور كې شو او له شعر او هنر سره يې مينه نوره هم اورنۍ شوه. شعر يې دحالاتو تابع دى، هر مهال يې دټولنې انځورونه دهغې اوسېدونكو ته وړاندې كړي او هڅه شوې چې هنريت هم په كې اوچت وساتل شي
 

 Site designed and administrated by Tolafghan.com 2003 webmaster@shirzad.de