هلمند کې عملیات پیل شوي او په هرات کې نښتې دوام لري
افغان چارواکي وايي چې د هلمند په مرکز لښکرګاه کې افغان ځواکونو تازه یرغلیز عملیات پیل کړي او په هرات ولایت کې له وسلهوالو طالبانو سره نښتې دوام لري.
کوټه: د عوامي نېشنل ګوند د تښتول شوي عبېدالله کاسي مړی ترلاسه شوی
د عوامي نيشنل ګوند د صوبې د مرکزي کمېټۍ غړي عبېدالله کاسي مړی ترلاسه شوی دی هغه د جون په مياشت کې د بلوچستان د صوبې د مرکزي ښار کوټې سره نزدې د کچلاغ څخه تښتول شوی وو.
غني د خپل ایراني سیال د لوړې مراسمو کې ګډون لپاره تهران ته تللی
د افغانستان جمهور رئیس محمداشرف غني د ایران د نوي جمهور رئیس ډاکټر سید ابراهیم رئیسي د لوړې په مراسمو کې د ګډون لپاره تهران ته تللی دی.
حېدر اباد کې د شانګلې د سکرو د کان د 3 خواريکښو مړي کلي ته وړل کيږي
د سيند صوبې په دوېم غټ ښار حېدر اباد کې د سکرو په کان کې د پېښې ښکار شوو مړو خواريکښو جسدونه پلارني کلي د شانګلې ضلعې د الپورۍ سيمې ته روان کړی شوي او خپلوان يې وايي نن مازيګر به ورسول شي.
پنجاب: په رحيم يار خان کې قهرجنو خلکو د هندوانو په مندر بريد کړی
د پاکستان د پنجاب صوبې په رحيم يار خان ضلع کې ګڼ قهرجن خلک ورغلي د هندوانو په مندر يې بريد کړی مندر ته يې زیان رسولی دی.
لغمان او کندز کې عملیات؛ 'افغان ځواکونو یو شمېر سیمې نیولي'
د افغانستان امنیتي بنسټونو د لغمان ولایت د بادپښ ولسوالۍ د مرکز او د کندز د چاردرې ولسوالۍ د یو شمیر سیمو د بېرته نیولو خبر ورکړی دی.
ایران کې د کرونا مثبتو پېښو شمېرې تر ۴ میلیونو او تلفات یې له ۹۲ زرو واوښتل
په ایران کې د کووېډ-۱۹ ناروغۍ د مثبتو پېښو رسمي شمېرې د اګسټ په څلورمه تر څلور میلیونه واوښتې. تهران دا خبر په داسې وخت کې ورکړچې په ټول ایران کې د کرونا د ډېلټا بڼې د پېښو د زیاتیدو خبرونه خپاره شوي دي او دا ډول کرونا له یوه انسانه بل ته ژر سرایت کوي. د ایران روغتیا وزارت د چهارشنبې (د زمري ۱۳مه) په ورځ د ۲۴ ساعتونو په ترڅ کې د ۳۹ زره ۳۵۷ نوېو مثبت پېښو خبر ورکړ او څرګنده یې کړه چې له دې سره په کرونا د ټولو اخته کسانو شمېره څلور میلیونه نولس زره څلوراتیا ته ورسېده. د ایران د چهارشنبې د ورځې د رسمي شمېرو له مخې د کرونا ټول تلفات دوه نوي زره یو سل او څلورو ته لوړ شوي دي. داسې باور کېږي چې اصلي شمېرې به په ایران کې چې درې اتیا میلیونه نفوس لري تردې ډېرې زیاتې وي. د دې سربیره چې ایراني چارواکو بیا بیا په دې هېواد کې د کرونا د مخنیوي لپاره بندیزونه لګولي دي د منځني ختیځ تر بل هر هېواد په ایران کې د کرونا پېښې زیاتې دي. په دغه هېواد کې د کرونا د واکسین هڅې هم ورو دي. د ایران د روغتیا وزارت په وینا تراوسه تر ۱۱ میلیونه لږ ډېرو کسانو یوازې یو ډوز واکسین کړی دی او دوه میلیونه او اته لکو کسانو ته دوه ځله دا واکسین رسیدلی دی. د دوشنبې په ورځ د ایران مشر علي خامنه اي امر وکړ چې د کرونا د مخنیوي لپاره دې ضروري اقدامات وشي. خامنه اي وروسته تردې دا خبره وکړه چې چارواکو د کرونا د پنځمې څپې خبر ورکړ او د ایران د روغتیا وزیر سیعد نمکي وړاندیز وکړچې دوې اوونۍ ټولبندیز اعلان شي. د دې غوښتنې په ځواب کې د ایران د کورنیو چارو وزیر رحماني فضلي پرون وویل چې د بندیزونو لپاره نور غور ته اړتیا شته او په راتلونکو لنډو ورځو کې به پرېکړه وشي. د ایران نوي منتخب ولسمشر ابراهیم رییسي د چهارشنبې په ورځ یوه ورځ مخکې تردې چې په پارلمان کې د لوړې مراسم ترسره کړي په ایران کې یې د کووېډ-۱۹ نولس ناروغۍ د غونډې مشري وکړه. د ایران له بېلابېلو ښارونو څخه د راپورونو له مخې په ډېرو روغتونونو کې ځای نه شته چې نورناروغان ومني او د روغتونونو په بیړنیو خونو کې هم تر حد زیات ناروغان بستر شوي دي. د ایران روغتیا وزارت خلکو ته خبرداری ورکړچې روغتیایي سپارښتنې عملي کړي، د دې وزارت په وینا تر څلویښت فیصده لږ کسان په ایران کې ماسک اغوندي او روغتیايي فاصله مراعاتوي.
د طالبانو په قول اعتبار کول د امریکا تېروتنه وه؟
په افغانستان کې د طالبانو د وسنیو خونړیو حملو سره ځیني کارپوهانو د امریکا له افغانستانه د ځواکونو د وښکلو په فیصله دا نیوکې نور ې هم سوا کړي دي چې صدر بایډن دغه فیصله په تادۍ کې کړې وه. د څېړونکو په آند امریکا باید لومړی طالبان په اوربند مجبوره کړی وی، او ضمانت یې ترې اخستلی وی چې د افغانستان د منتخب واکمنو سره د تل پاتې سولې په خاطر خبرو ته کینئ. د وي او ډیوه په خپرونه هیلو وي او ای کې د بحث په وخت زیاتره څېړونکي په دې سلا وو چې د طالبانو سره په قطر کې شوې لوظنامه کې دا واضحه نه وه چې طالبان به افغان وژنه نه کوي. په ایرویزونا پوهنتون کې د لیډیر شپ او عامې روغتیا استاد ډاکټر نقيب صافي وویل د امریکا ځواکونه که نن وی او که پرون یوه ورځ به ضرور وتل: " ولې په کومه طریقه چې ووتل دا د نظام لپاره ښه نه دی" د هغه په خیال باید په دې خبره اتفاق شو ی وی چې د افغانستان وسنی نظام به خوندي ساتل کیږي. وداني به نه ړنگول کیږي، هسپتالونه، سکولونه، سړکونه، پولونه به نه تباه کیږي. په افغانستان کې د سولې لپاره د امریکا ځانگړي استازي زلمي خلیلزاد د وي او ای سره په یوه تازه مرکه کې ويلي دي هغه یقین لري چې افغانستان نور هیچاته ګواښ نه دی، نه نړۍ او نه خپلو ګاونډیانو ته او بیا افغانستان به د کوم ترهګرې ډلې ځاله نه وي. څېړونکی وايي ښه خبره به هله وې چې خلیزاد دا هم ویلی وی چې طالبان به افغانستان ته هم گواښ نه وي. د امریکا په اوهایو پوهنتون کې د منځني ختیز د څېړونو مرکز ډایریکټر عالم پایند وايي "زلمی خلیزاد د افغانستان نماینده نه دی دا د امریکا نماینده دی، دی باید ووايي چې زه د امریکا د منافعو لپاره کار کوم نه د افغانانو د منافعو لپاره" صدر بایډین له افغانستانه د ځواکونو د وښکلو د اعلان په وخت ویلي وو د امریکا د تاریخ تر ټولو اوږده جگړه ختموي. هغه دا هم ويلي وو چې امریکا په افغانستان کې خپل هدفونه تر لاسه کړي او القاعده ماتې خوړلې ده. د صدر بایډین انتظامیه وايي طالبانو لوظ کړی ؤ چې د افغانستان خاوره به د بل کوم هیواد په ضد نه استعمالیږي او نه به طالبان د القاعده سره بیا اړیکې نیسي خو د یو شمیر امریکايي جرنیلانو، حکومتي مشرانو ،سیاست دانانو او څېړونکو خیال دی د طالبانو په قول اعتبار کول د امریکا تیروتنه وه. د امریکا په فلوریډا ریاست کې میشت پښتون څېړونکی ډاکټر تقي وايي په طالبانو اعتبار ناداني وه، د هغه په خیال په بېړه کې د ځواکونو د انخلا فیصله ډېره بې پرواهي ښايي. ښاغلی تقي دا هم نیوکه کوي چې د افغان ځواکونو په تربیه او تیارۍ کې ډېرې نیمگړنیاوې پاتې دي: "د انخلا لپاره چې کومه پیش بندي پکاره وه هغه امریکا او نه کړله، دويي باندې دومره تادي شوه چې په ملټري پلاننیگ کې هغه خامیانې پاتې شوې چې د هغويي په وجه طالبانو هغه گټې پورته کړې چې په تیرو څو میاشتو کې مخې ته راغلي دي" د ډاکټر تقي په خیال طالبانو وس هم د نورې نړۍ د وسله والو سره اړېکې نیولي دي. د هغه په خیال په دغو وسله والو کې د القاعده نه علاوه د افغانستان په گاونډ کې د نورو هیوادونو د ترهگرو سره هم د طالب وسله والو کلکې رابطې دي. که څه هم د امرېکې د خارجه چارو وزیر اېنټني بلینکن ويلي دي په زور د واک تر لاسه کولو د لارې طالبان هاغه څه نه شي ترلاسه کولی د څه چې تمې کوي. البته ښاغلی بلینکن دا هم وايي چې طالبان ډیر څه غواړي لکه د نړۍ لخوا دې دوي ومنل شي، نړې دې ورسره مرستې وکړي، د دوي مشران دې په ازادۍ سره د نړۍ هر ځای ته سفر وکړي. دوي غواړي په دوي دې پابندۍ ختمې کړل شي . د څېړونکو په خیال که امریکا گڼي چې د طالبانو دغه غوښتنې پوره کول د وخت مجبوري ده نو اول دې د طالبانو د لاسونو څخه وسله واخلي د افغان وژنې لړۍ دې ختمه کړی شي او طالبان دې دصدر غني د حکومت سره سنجیده خبرو ته کینول شي.
پاکستان: د افغانستان سره په پوله د کټارو لګول ۹۰ فیصده بشپړ شوي
د پاکستان پوځ ویلي چې د افغانستان سره د پولې په اوږدو کې د کټارو د لګولو کار په سلو کې ۹۰ بشپړ شوی دی.
دپښتونخوا پولیسو خپل وژل شوي اتلان نمانځلي
دخیبر پښتونخوا بیلابیلو سیمو کې دترهګری په ضد روانه جګړه کې دوژل شوؤ پولیس سرتیرو اؤ افسرانو ورځ دچهارشنبې په ورځ په داسې حال کې نمانځل شوې چې په دغه صوبه کې دپولیسو په ضد دبریدونو اؤ هدفي وژنو لړۍ یو ځل بیا چټک شوې ده.
ترکیه: افغانانو ته د امریکا د ویزو پروګرام د مهاجرت د ستر کړکیچ سبب کیږي
د ترکیې د بهرنیو چارو وزارت په زرګونو افغانانو ته چې د امریکایي شرکتونو او سازمانونو سره یې کار کړی د امریکا د ویزې ورکولو په نوي پروګرام انتقاد کړی او ویلي یې دي چې دغه اقدام به "د مهاجرت د ستر کړکیچ" سبب شي.
د لبنان د چاودنې لومړنۍ کالیزه ؛ فرانسه وایي ملت ته باید ریښتیا وویل شي
د لبنان په پایتخت بیروت کې د زورورې چاودنې یو کال پوره شو. چاودنه د ۲۰۲۰ کال د اګست په ۴مه وشوه، لږ تر لږه ۲۴۰ تنه پکې ووژل شول او نږدې وه چې د لبنان اقتصاد چې وار د مخه د ستونزو سره مخ و، سقوط وکړي.
دپښتونخوا نوی قانون،14کالو نه کم عمره ماشوم به کور کې نوکر نه ساتل کیږي
د خېبر پښتونخوا صوبايي اسمبلۍ په کورونو کې دننه د کارکوونکو کسانو د حقونو خوندي کولو او د هغوئ د ستونزو هواري له پاره یو نوی قانون منظور کړی دی۔
واشنګټن: یوه اندیښنه مو په افغانستان د کورنۍ جګړې پیښیدل دي
د امریکا د متحده ایالاتو د بهرنیو چارو وزارت ویاند ند پرایس، وایي په افغانستان کې د موجودو اندیښنو څخه یوه یې د کورنۍ جګړې پیلیدل دي.
د ۱۴۰۰ کال لومړیو دریو میاشتو کې ۹۵۰ زره افغانان بېځایه شوي ــ راپور
د افغانستان د بشري حقونو کمیسیون وایي چې په روان لمریز کال کې د جګړو او نا امنیو له امله په زر هاوو کورنۍ له خپلو اصلي مېنو څخه بې ځایه شوي دي.
