یوناما د حکمتیار د محاکمه کولو عریضه ترلاسه کړې
په کابل کې د ملګرو ملتونو مرستندویه ادارې (یوناما) ویلي چې د حزب اسلامي د مشر ګلبدین حکمتیار په خلاف یې عریضه ترلاسه کړې ده. پدغه عریضه کې له یوناما غوښتل شوي چې ښاغلی حکمتیار دې د پخوانیو جرایمو له کبله محاکمې او عدالت ته ودرول شي.
یوناما ندي ویلي چې دغه عریضه چا ورته ورکړې او څومره کسانو پکښې لاسلیک کړی دی.
د یوناما مشر چې د افغانستان لپاره د ملګرو ملتونو د عمومي منشي استازی هم دی ویلي هغه افغانان چې د تیرو زور زیاتیو قرباني شوي، باید د قضايي جبران له حق نه بې برخې نشي. تادامیچي یماماتو ویلي "ملګري ملتونه به سولې، عدالت او امنیت ته د رسیدلو لپاره له افغانانو نه خپل ملاتړ ته دوام ورکړي".
د ملګرو ملتونو د امنیت شورا د روان کال د فبرورۍ په میاشت د افغان حکومت په وړاندیز، د ترهګرۍ د نړیوالو بندیزونو له نوملړ نه د ښاغلي حکمتیار نوم وایست.
د حکمتیار په مشری د حزب اسلامي ګوند د ۲۰۱۶ کال په سپتمبر کې له افغان حکومت سره د سولې تړون لاسلیک کړ او ژمنه يې وکړه چې له جګړې به لاس اخلي او له ترهګرۍ سره به هر ډول اړیکې شلوي.
د بشري حقونو سازمانونه بیا پر ګلبدین حکمتیار او د نورو افغان پوځي ډلو پر مشرانو د جنګي جرمونو او بشریت ضد جرایمو د ترسره کولو تور لګوي.
یوناما ندي ویلي چې د حکمتیار په خلاف د ترلاسه شوي عریضې په اړه به څه وکړي، خو د سولې د پایښت لپاره یې د افغان حکومت هلې ځلې ستایلي دي.
