تر ارسنال فوټبال لوبډلې د یوه معلول افغان مزل
سپورټ یو له هغو ډګرونو دی چې ډېری لوبغاړي پکې تمه کوي د نړۍ په پېژندلو شویو لوبډلو کې ولوبېږي خو د ډېرو لږو خلکو دا ارمان پوره کېږي.
لندن کې د ارسنال فوټبال کلب د سپورټ په نړۍ کې یو له ډېرو مشهورو نومونو دی چې د لوبغاړو د غوراوي له بهیره یې هر څوک نه شي تېرېدلای.
فوټبال: افغان ښځینه لوبډله له هندي لوبډلې سره لوبېږي
د ارسنال فوټبال کلب کې یوازینی افغان معلول لوبغاړی احمد فواد امرخېل وایي دی هم یو له هغو کسانو و چې د نړۍ په لویو لوبډلو کې یې د لوبېدو هیله درلوده او دا دی اوس پکې لوبېږي.
خو د ښاغلي امرخېل په وینا تر دې ځایه یې د مزل پر لارې ډېرې سختۍ او کړاوونه ګاللي.
ښاغلی امرخېل شپږ کلن و چې کابل کې خپل منځي جګړو کې یې خپله پښه له لاسه ورکړه. د ده پښه په داسې ځای کې پرې شوې چې د مصنوعي پښې د جوړېدو امکان یې هم نشته.
هغه مهال چې کابل کې امنیت نه و، د ښاغلي فواد په وینا ښه اقتصاد او نه هم د ماشومانو لپاره د لوبو شونتیا وه، د ده له سپورټ سره مینه پیدا شوه، هغه هم له داسې سپورت سره چې د ډېرو په اند، دی یې جوګه نه و.
افغان ساحلي فوټبال چین ته ماتې ورکړه
ښاغلی امرخېل وايي: "له ما سره به نورو هلکانو فوټبال نه کاوه، ځکه زه ګوډ وم او هغوی فکر کاوه چې زه به لوبه ونه کړای شم".
د ښاغلي امرخېل پر ماشومتوب د ده په وینا ناهیلۍ، خپګیان او بېوزلۍ سیوری غوړولی و. داسې یو مهال چې هم په هېواد کې کورنۍ جګړه روانه وه، هم کار و بار نه و او هم دی معلول شو، لکه ژوند چې په ټپه ودرېږي.
له دې ټولو سره ښاغلی امرخېل وايي: "سمه ده چې ما خپله پښه له لاسه ورکړه خو هیله مې له لاسه ورنه کړه او د خپلې خوښ ورزش مې تعقیب کړ."
وروسته له کلونو تمرین او زده کړې احمد فواد وتوانېد نورو ته هم فوټبال ور زده کړې او افغانستان کې یې د ښځو لومړنۍ فوټبال ډله وروزله.
وروسته له دې چې ۲۰۰۸ کال کې برتانیا ته راغی، دلته د معلولینو بېلابېلو لوبډلو کې ولوبېد او د ګڼو لوبغاړو ترمنځ ښه وځلېد. اوس چې هم د سوداګریزې مالوماتي ټکنالوژۍ په برخه کې پوهنتون کې زده کړې کوي، ارسنال فوټبال کلب کې د معلولینو د ډلې غړی دی.
ښاغلی امرخېل برتانیا کې معلولینو ته د سپورټ شونتیا ته په اشارې له افغان دولته غواړي چې په افغانستان کې هم معلولینو ته قدر ورکړي او د ورزش لپاره امکانات ورته برابر کړي.
د ده په آند "سپورټ د مخدره توکو په ګډون د ډېرو ټولنیزو ناخوالو مخه نیولی شي."
د ښاغلي امرخېل بشپړه مرکه د جمعې پر ورځ د بي بي سي پر پښتو تلوېزیون او راډیو خپرېږي.