ټرمپ: د مرکل د مهاجرت تګلاره "له مصیبت ډکه تیروتنه " وه

د متحدو ایالتونو منتخب جمهور رئیس، ډانلډ ټرمپ د پناه غوښتونکو پر وړاندې د المان پر سیاست نیوکه کړې ده.

ټرمپ د جرمني له "بیلد" ورځپاڼې سره په مرکې کې ويلي چې صدراعظمې انګلا مرکل د کډوالو په اړه خپلې تګلارې کې "مصیبت ډکه تیروتنه" کړېده.

ټرمپ د خپلې مرکې په یوه برخه کې ویلي: "زه فکر کوم چې هغه[ مرکل] له مصیبت ډکه تیروتنه وکړه غیرقانوني کډوالو ته چې له هر ځای څخه راغلي وو، پناه ورکړه."

د انګلا مرکل د خلاصو دروازو د سیاست پر بنسټ او له هغه شعار سره یې چې د کډوالۍ پر بحران لاسبری مومي، زرګونه کډوال چې ډیری یې د افغانستان، سوریې او عراق هېوادونو اوسیدونکي و، جرمني ته راغلل.

ټرمپ په پام کې ده چې د متحدو ایالتونو د پنځه څلویښتم جمهور رئیس په توګه د روان کال د جنورۍ میاشتې په شلمه نېټه د لوړي مراسم پرځای کړي.

دغه امریکايي سیاستوال تینګار کړی چې د میرمن مرکل احترام کوي خو وایې چې درناوی به یې د ډیرې مودې لپاره دوام و نه مومي.