ټول   BBC ازادي راډیو امریکا غږ ډیوه


اسرایلي ځواکونو د رفح د انخلا پلان وړاندې کړی؛ ملګرو ملتونو د غزې د امداد په حقله خفګان ښودلی

د اسرایل د ګل د ورځې بیان کې دا جزئیات ندي په ډاګه شوي چې اسرایل کوم ځای ته د فلسطینیانو د لېږلو خیال لري، او مصر وویل چې خپل سرحد به تړلی وساتي.

26.02.2024 ډیوه

د امریکې د هوايي پوځ عسکر چې په واشنګټن کې یې د اسرایلي سفارتخانې مخ ته ځان سوځولی، مړ شو

د امریکې هوايي پوځ د ګل، دوشنبې، په ورځ په یو بیان کې وویل چې په پېښه کې ککړ تن تېره شپه د زخمونو نه مړ شوی دی. هوايي ځواک وویل په دې اړه به نور معلومات د هغه کورنۍ د خبرولو وروسته شریکوي

26.02.2024 ډیوه

اسرایلي پوځ د جنګ کابېنې ته په رفح کې د عملیاتو منصوبه وړاندې کړې

ګوټېرېس وویل په رفح کې د اسرایل پوځي عملیات به نه یوازې د یو مېلین نه زیات هغه خلک چې په ښار کې پناه اخیستې ویروي بلکې دا به "زمون د امدادي پروګرامونو په تابوت کې اخېری مېخ ولګوي."

26.02.2024 ډیوه

پاکستان: مريم نواز د پنجاب صوبې لومړۍ ښځينه وزیراعلا وټاکل شوه

کراچۍ — د مسلم ليګ ن ګوند مريم نواز د پاکستان د پنجاب صوبې لومړۍ ښځينه وزيراعلا منتخب شوه، د منتخب کېدو سمدستي وروسته مريم ‏نواز په خپله لومړۍ وينا کې وويل، د چا نه به انتقام نه اخلي.‏ د پنجاب د وزیراعلا د انتخاب دپاره د مسلم ليګ ن امېدواره مريم نواز او د هغې په مقابله کې د سني اتحاد کونسل امېدوار رانا افتاب احمد وو.‏ د وزيراعلا د انتخاب دپاره چې د اسمبلۍ د سپيکر ملک احمد خان په مشرۍ غونډه پيل شوه، اسپيکر د کارروايۍ پيل کولو اعلان وکړو نو د تحریک ‏انصاف حمايت يافته ازاد غړي چې په سني اتحاد کونسل کې شامل شوي، په اسمبلۍ کې یې نعرې پيل کړې او د اېوان څخه یې د بايکاټ اعلان وکړو او د ‏اسمبلۍ څخه بهر ووتل.‏ د ځايي مطبوعاتو ترمخه د سني اتحاد کونسل غړو ويلي چې د دوی په مخصوصو نشتونو د دوی غړي نه دي ټاکل شوي اېوان نيمګړی دی ځکه دوی د ‏وزيراعلا د انتخاب په عمل کې برخه نه اخلي، په ځواب کې ورته د اسمبلۍ سپيکر ويلي، د مخصوصو څوکو اعلانول د الېکشن کمېشن کار دی.‏ بيا د وزيراعلا د انتخاب دپاره د رای ورکولو عمل پيل شوی، مريم نواز ‏‎220‎‏ رای ترلاسه کړي او د سني اتحاد کونسل غړو په دغه عمل کې برخه نه ده ‏اخستې.‏ د رايو د عمل پوره کېدو وروسته سپيکر ملک احمد خان اعلان وکړو چې مريم نواز وزيراعلا منتخب شوه.‏ له دغې وروسته نوموړي مريم نواز ته د وينا بلنه ورکړه او هغې په خپله لومړۍ وينا کې وويل، د چا نه هم انتقام نه اخلي، هغې د خپل ګوند او نورو ‏اتحادي غړو مننه وکړه چې ووټ یې ورته ورکړی دی.‏ مريم نواز وويل، د ټولو به يو شان وزیراعلا وي او د دفتر دروازې به د ټولو دپاره خلاصې وي او يو شمېر اعلانونه وکړل چې په مختلفو برخو کې به ‏پرمختيايي کارونه کوي.‏ مريم نواز د پاکستان مسلم ليګ ن د مشر او پخواني وزيراعظم نواز شريف لور او د ياد ګوند چيف ارګنايزر په څوکۍ پاتې شوې ده.‏

26.02.2024 ډیوه

پاکستان کې د پولیو ضد څاڅکو کمپاين پيل شوی

کراچۍ — پاکستان کې د پينځو کالو نه د کم عمر ماشومانو ته د پوليو ضد څاڅکو او ورسره د ویټامن اې د خوراک ورکولو کمپاين پيل شوی، چارواکي وايي، د ‏‎45.8‎‏ میلینو نه زياتو ماشومانو ته به د پوليو ضد څاڅکي او ویټامن اې خوراک ورکول کيږي.‏ خېبرپښتونخوا کې د پوليو د مخنيوي پروګرام ويلي، نن د صوبې په يواځينو دوه ضلعو لکي مروت او ډېره اسماعيل خان کې د پوليو کمپاين پيل کيږي.‏ پاکستان کې د پوليو د مخنيوي پروګرام ويلي، نن د ګل/ دوشنبې د ورځې (‏‎26‎مې فرورۍ نه تر درېم مارچ) پورې د روان کال د پوليو دويم د قومي کچې ‏کمپاين پيل شوی، او د خېبرپښتونخوا په ‏‎33‎‏ ضلعو کې به د دويم مارچ نه تر شپږم مارچ پورې کمپاين کولی شي.‏ چارواکو ويلي، د ماشومانو د قوت مدافعت سېوا کولو دپاره به هغوی ته د وټامن اې خوراک هم ورکول کېږي.‏ د بلوچستان صوبې څخه سرچينو وي او اې ډيوه ته ويلي، په چمن، زيارت او نورو سيمو کې د واورې ورښت له امله د پوليو ټيمونه له مشکلاتو سره مخ ‏کيږي خو بيا هم چارواکو ويلي، هڅې روانې دي چې ټولو ماشومانو ته د پوليو ضد څاڅکي ورسول شي.‏ د صحت مرکزي سيکرټري افتخار شلواني ويلي، ځينې خلک اوس هم د غلط فهميانو او ناسمو معلوماتو په بنياد ماشومانو ته د پوليو څاڅکو ورکولو نه ‏انکار کوي دا بدمرغي ده.‏ هغه ويلي، حکومت په ملک کې د پوليو د خاتمې دپاره ژمن دی او پرمختګ پکې هم شوی دی خو فېصله سازو، ميندو پلارانو او خيال ساتونکو باندې ‏هم په دغه لړ کې غټه زمه واري راوړي.‏ د پوليو مخنيوي د پروګرام په وېب پاڼه ويل شوي، سږ کال د جنورۍ په مياشت کې په ملک کې د پوليو ‏‎19‎‏ مثبتې نمونې ترلاسه شوي او تېر کال ‏‎126‎‏ ‏نمونې ترلاسه شوې وې.‏ پوهان وايي، د پوليو د مثبتو نمونو ترلاسه کېدل څرګندونه کوي چې د پوليس وايرس خطره شتون لري.‏ پاکستان کې د پوليو د مخنيوي د پروګرام مشر ډاکټر شهزاد بېګ ويلي، پاکستان او افغانستان يواځيني هيوادونو دي چرته چې د پوليو وايرس موجود ‏دي، تېر کال په پاکستان کې د پوليو شپږ پېښې مخې ته راغلې وې.‏ هغه زياته کړه، سږ کال هم په ځينو ضلعو کې د پوليو وايرس معلوم شوی او د هغې مطلب دا دی چې د پوليو خطره شته.‏ نوموړي په ټولو میندو پلارانو، ټولو مکتبه فکر سره تعلق لرونکو خلکو باندې غږ کړی چې د پوليو د خاتمې په لړ کې د حکومت سره مرسته وکړي او دا ‏موذي مرض ختم کړي.‏ پاکستان کې سږ کال تراوسه پورې د پوليو کومه پېښه مخې ته نه ده راغلې.‏

26.02.2024 ډیوه

د پیپلز ګوند سید اویس شاه د سیند اسمبلۍ سپیکر ټاکل شوی، د وزیراعلی ټاکنه به سبا کیږي

د سپیکر د ټاکنې لپاره د اتوار په ورځ د اسمبلۍ غونډه د سپیکر اغا سراج دراني په مشرۍ شوې چې په کې د اسمبلۍ ۱۴۷ غړو د پټو رایو له لارې د سپیکر اؤ مرستیال سپیکر ټاکنه وکړه.

25.02.2024 ډیوه

د سیند اسمبلۍ غړو په سخت احتجاج کې سوګند اخستی، د پنجاب اسمبلۍ سپیکر اؤ ډپټي سپیکر نن ټاکل کیږي

پېښور — د پاکستان د سیند صوبې د اسمبلۍ نوؤ ټاکل شوؤ غړو نن د خالي - شنبې په ورځ د اسمبلۍ د غړیتوب لوړه کړې ده اؤ په پنجاب اسمبلۍ کې د سپیکر اؤ دپټي سپیکر د ټاکلو لپاره د رایو ورکولو عمل روان دی. په سیند اسمبلۍ کې د ګرینډ ډیموکرټیک الاینس، جماعت اسلامي اؤ جمعیت علماء اسلام منتخبو پارلیماني غړو په اتمه فرورۍ انتخاباتو کې د شوؤ "درغلیو" پرضد د احتجاج په توګه سوګند نه دی اخستی اؤ ددغه ګوند فعالینو په کراچۍ ښار کې سخت احتجاجونه کړي دي. پاکستاني میډیا وایي چې کراچۍ کې ځای په ځای د پولیسو اؤ احتجاج کوونکو ترمنځ نښتې هم شوې دي اؤ احتجاج کوونکي پولیسو په کوتکونو وهلي دي. د سیند اسمبلۍ د غړو د سوګند غونډه نن د سپیکر اغا سراج دراني په مشرۍ په داسې حال کې شوې چې د اسمبلۍ مخې ته د بیلابیلو ګوندونو فعالینو اؤ مشرانو انتخاباتو کې د ممکنه درغلۍ پرضد سخت احتجاج کولو. د سیاسي ګوندونو د احتجاج په ترڅ کې سپیکر اغا سراج دراني د سیند اسمبلۍ غړو ته سوګند ورکړو. د سیند اسمبلۍ په 168  څوکیو کې تر ټولو زیاتې  114 څوکۍ پاکستان پیپلز پارټۍ ګټلې دي اؤ په 36 څوکیو بیا د ایم کیو ایم امیدواران کامیاب شوي دي. په ننۍ غونډه کې د اسمبلۍ  148 غړو لوړه کړې ده اؤ 13 بیا د سوګند کولو دستوره کې شریک نه شول. پیپلز ګوند د سیند صوبې لپاره پخوانی وزیراعلا سید مراد علي شاه یو وارې بیا د اعلا وزیر په توګه نومولی دی. په پنجاب اسمبلۍ کې هم د سپیکر اؤ ډپټي سپیکر د ټاکنې لپاره د رایو ورکولو عمل پېل شوی اؤ مسلم لیګ(ن) ګوند هیله ښودلې ده چې دوي به په اسانه خپل سپیکر اؤ ډپټي سپیکر وټاکي. د مسلم لیګ (ن) له لوري ملک احمد خان د پنجاب سپیکر د څوګۍ لپاره کاندید دی اؤ دهغه په مقابله کې دغه څوکۍ ته د سني اتحاد کونسل احمد خان بوچر خپل کاغذونه جمع کړي دي. همد اشان د ډپټي سپیکر په څوکۍ د مسلم لیګ(ن) ګوند ظهیر اقبال چڼ مقابله د سني اتحاد کونسل معین ریاض سره ده. د پنجاب اسمبلۍ په 371 غړو کې 321 غړو تېره ورځ د اسمبلۍ د غړیتوب سوګند کړی ؤ چې په هغې 193 د مسلم لیګ(ن).98 د سني اتحاد کونسل،13 د پاکستان پیپلز پارټۍ، 10 د مسلم لیګ(ق) اؤ  5 د استحکام پاکستان پارټۍ شامل دي. په اتمه فرورۍ پاکستان کې عامې ټاکنې شوې وې خو ګڼ شمیر سیاسي ګوندونه دې ټاکنو کې د درغلیو تورونه لګوي اؤ ددغه مبینه درغلیو خلاف یې ګرد هیواد کې د احتجاجونو سلسله پېل کړې ده. سیاسي ګوندونه تور لګوي چې د انتخاباتو حقیقي نتیجې بدلې کړل شوي اؤ پاتې امیدواران د پیسو په بدل کې بریالي ګرځولي شوي دي خو الیکشن کمیشن بیا دا تورونه ردوي اؤ وايي که چا سره انتخاباتو کې د درغلیو ثبوت وي نو باید الیکشن کمیشن ته یې وړاندې کړي. الیکشن کمیشن د درغلیو د تورونو د پلټنو لپاره یوه کمېټه هم جوړه کړې ده خو تحریک انصاف ګوند بیا الیکشن کمیشن په جانبدارۍ تورنوي اؤ وایي ددغه ادارې په پلټنو باور نه لري.

24.02.2024 ډیوه

پر اوکراین د روسي یرغل دویمه کلیزه: یورپي مشران او د امریکایي کانګرس غړي کیف ته تللي

واشنګټن — پر اوکراین د روس د یرغل نن دوه کاله پوره شول خو لا هم جګړه روانه ده او د اوکرایني چارواکو په وینا روسي ډرون الوتکو په جنوبي ساحلي ښار اوډیسه کې د جمعې په ورځ بیا پر یوه ملکي ودانۍ برید کړی چې لږ تر لږه یو تن پکې وژل شوی او څو نور ټپیان شوي دي. د اوکراین پوځ وایي دغه ډرون په هغو پینځو ډرون الوتکو کې وو چې دوی د شپې په نیمه کې ویشتلي او را غورځولي دي. دا وروسته برید په داسې وخت شوی چې یورپي مشرانو د اوکراین په پایتخت کیف کې پر اوکراین د روسي یرغل او د جګړې د دویمې کلیزې په مناسبت نن د شنبې- خالي په ورځ د را غونډېدو تیاري کوله. د یورپي کمیشن مشره اورسلا وون ډیرلېن د ایټلي له وزیراعظمې جورجیا ملوني، د کېنېډا له وزیراعظم جسټن ټروډو او د بیلجیم له وزیراعظم الکزنډر دي کرو سره یو ځای له پولېنډه په رېل ګاډي کې تللې ده. دا مشران غواړي پر اوکراین د روس د یرغل د دوهم کال د پوره کېدو په مناسبت له اوکراین سره خپله خواخوږي شریکه کړي او د روس خلاف د خپلې دفاع لپاره د نورو پوځي مرستو ډاډ ورکړي. بلې خواته د دې جګړې د دویم کال له پوره کېدو سره سم روس خپل د دفاع وزیر د اوکراین هغو سیمو ته لېږلی چې روسي پوځیانو نیولې دي. د رپوټونو له مخې د 2024 کال د فرورۍ تر 24مې پورې پر اوکراین د روس د بشپړ یرغل په نتیجه کې شاوخوا 83,000 اوکرایني پوځیان وژل شوي دي. امریکايي چارواکو هم اټکل کړی چې څه باندې 70,000 اوکرایني پوځیان وژل شوي او دوه چنده ټپیان شوي دي. د اې بي سي نیوز د رپوټ له مخې د اوکراین د صدر زلنسکي مېرمنې اولینا زلنسکي ویلي چې د جګړې له پیل راهیسې تر دوه میلینه زیات اوکرایني ماشومان له هېواده وتلي او لږ تر لږه 528 وژل شوي دي، له دې پرته هم په جګړه کې د زرګونو اوکراینیانو د وژل کېدو رپوټونه ورکړل شوي دي. همدارنګه د جګړه له پیل راهیسې د شاوخوا 50,000 روسي پوځیانو د وژل کېدو خبرونه ورکړل شوي دي، خو د امریکا استخباراتو د تېر کال په دسمبر کې دعوه کړې وه چې په جګړه کې تر هغه وخته 315,000 روسي پوځیان وژل شوي او ټپیان شوي دي. ټاکل شوې چې وزیراعظمه ملوني به د ویډیو کانفرنس په وسیله د نړۍ د اوو سترو صنعتي هېوادونو مشرانو ته هم د ګډون بلنه ورکړي او دې غونډې ته به د اوکراین ولسمشر ولادیمیر زلنسکي هم وینا کوي. اوکراین پر خپلو غربي متحدینو ټینګار کوي له کیف سره دې خپلو پوځي مرستو ته دوام ورکړي چې وکولای شي د روس خلاف خپله دفاع وکړي. د اوکراین صدر ولادیمیر زلنسکي د جمعې په ماښام په خپله ورځنۍ ویډیویي وینا کې ویلي، د امریکا پوځي مرسته- چې په کانګرس کې د ځنډ ښکار ده- "زموږ د دفاع لپاره د موادو په توګه هم او نړۍ ته د پیغام ورکولو دواړه له پلوه بنیادي حیثیت لري". د امریکا په سېنټ کې د اکثریت مشر چک شومر دا مهال په اوکراین کې دی او هغه هلته د استازو اېوان له غړو په ټینګار سره غوښتي چې "سم کار وکړي" او له اوکراین سره د پوځي مرستو قانوني مسوده منظوره کړي. ښاغلي شومر د ډیموکرېټ ګوند له څلورو نورو سنېټرانو سره یو ځای د جمعې په ورځ د اوکراین په غربي ښار لیف کې د دې هېواد له صدر ولادیمیر زلنسکي سره لیدلي او خبرې یې کړې دي. چک شومر وروسته خبري غونډې ته وویل، "موږ ته صدر زلنسکي ویلي، موږ ته امریکایي وګړو ویلي او موږ ته د اوکراین چارواکو ویلي چې له مرستو پرته به اوکراین جګړه وبایلي". د امریکې سېنټ تېره اوونۍ یوه قانوني مسوده منظوره کړه چې پکې له اوکراین سره د 60 اربه ډالرو پوځي مرسته هم شامله ده، خو د استازو اېوان ریپبلکن سپیکر مایک جانسن دا مسوده لا رایو ته نه ده وړاندې کړې.

24.02.2024 ډیوه

انګور اډه: د ویزې د شرط خلاف احتجاج دوام لري، افغانستان ته غځېدلې تجارتي لاره یې تړلې ده

ډیره اسماعیل خان — د خېبر پښتونخوا قبایلي ضلعه کوز جنوبي وزیرستان کې د پاکستان اؤ افغانستان په ګډه پوله انګور اډه کې د احمدزۍ وزیرو قبیلې احتجاج نن په  ١١٢مه ورځ هم دوامداره دی اؤ احتجاج کوونکو د افغانستان اؤ پاکستان ترمنځ غځېدلې تجارتي لاره د سامان وړونکو ګاډو پر مخ تړلې ده. احتجاج کوونکي وايي دا حتجاج یې په سیمه کې د بنیادي اسانتیاوو د نشتوالي ترڅنګ د سوداګریزو اسانتیاوو د نشتوالي او د حکومت د نویو تګلارو پر ضد دی چې په پوله یې دوه اړخیز تجارت د پاره د ویزې او پاسپورټ د نظام عملي کولو وروسته سوداګریز فعالیتونه په ټپه درولي دي. په دې وروستیو کې انتظامیه او پوځ د احتجاج کوونکو سره په وار وار خبرې کړي خو کومه نتيجه يې نه ده لرلې. د انګور اډې خلکو د عامو ټاکنو پر مهال د رايې ورکولو څخه د احتجاج په توګه بايکاټ کړى و او ویلي یې وؤ چې د ترهګرۍ او جنګونو ځپلو خلکو څخه د معاش یوازینۍ سرچینه تروړل شوې ده. دې احتجاجي غونډې ته تېره ورځ ته د پښتون ژغورنې غورځنګ مشر منظور پښتین ویلي په ترهګرۍ او جنګونو کې ښکېل د سرحدي سیمو خلک باید اسلام اباد ته احتجاج وکړي ځکه دغلته د دوی غوښتنې نه منل کیږي.  د انګور اډې تر څنګ د بلوچستان په چمن کې هم د اکتوبر له 21مې راهیسې په ګڼ شمیر کې خلک په احتجاجي پرلت ناست دي‌ او وايي چې پاکستان دې له افغانستان سره د تګ راتګ لپاره د پاسپورټ او ویزې شرط ختم کړي. ‎دپښتون ژغورنې غورځنګ مشر منظور  پښتین، چې نزدې دوه اوونۍ وړاندې له زندانه خوشې شوی، تیره ورځ انګور اډه سیمه کې د ولسي غونډې پرمهال د ترهګرۍ په وړاندې د پاکستان په تګلاره سختې نیوکې کړې دي.  ‎هغه د احمدزو احتجاجي غونډې ته ویلي د ملکي اقتصاد روانولو لپاره ترهګري په دوی تپل شوې او خلک یې د دروغو په جګړه کې ښکېل کړي دي چې له امله یې سیمه کې  د پښتنو ژوند په ټپه ودرول کیږي. ‎هغه وویل د ملک په نورو برخو کې کاروبارونه روان دي د هند سره واهګه بارډر نه تړل کیږي خو يښتانه یې د خپلو اییني حقونو نه بې برخه کړي دي دا ځکه چې  د پښتنو په وینه د ریاست اقتصاد روان دی. منظور پښتین وویل، د پښتونخوا په ګیس د پنچاب کارخانۍ روانې دي خو د پښتنو نه دا خپل حق تروړل شوی دی.  د پاکستان حکومت بیا بیا دا تورونه رد کړي او ویلي یې دي چې ترهګري قامي ستونزه ده او ملي عسکرو دخپلو سرونو په تاوان وسله والو ته پراخه زیانونه اړولي دي. د تیرو شلو کلونو راهسې د پاکستان پوځ د ناامنۍ پرضد په نه ختمېدونکې جګړه بوخت دی او دریځ لري چې تر څو ناامني وي د وسله والو پرضد به عملیات ترسره کوي چې هیواد د ترهګرۍ د ناسور نه خلاص کړي. د انګور اډې خلک اتلس مطالبې لري چې پکې علاقې ته د انترنیټ او موبایل اسانتیاوې  غځول،په علاقه کې د خلکو د اسانتیا د پاره تعلیمي ادارې،روغتیایي مرکزونه او سړکونه جوړول، پوله دواړو خواو ته مېشتو ځایی خلکو ته د وېزې پرته د تګ راتګ اجازه ورکول او کاروبار کې اسانتیا رامنځته کول شامل دي . ‎د غونډې یو ګډونوال ملک پرملا خان ویلي، د دوي سیمه په هره حواله وروسته ساتل شوې اؤ یوه اسانتیا هم نه لري . ډیوه سره سره خبرو کې هغه ویلي ددې سیمې خلک بې وزله دي، د خپلو اسانتیا د پاره یې ځایي انتظامیې ته  ۱۸ غوښتنې وړاندې کړي خو د دوی په غوښتنو عمل نه دی شوی. د پاکستان او افغانستان تر منځ پر "ډېورنډ کرښه" د تګ راتګ او سوداګرۍ یو شمېر لارې دي او د انګور اډې لاره جنوبي وزيرستان د افغانستان له پکتيکا صوبې سره پیوست کوي. د پرلت بل ګډونوال محمد رسول ویلي په پوله دواړو غاړو ته د احمدزو وزیرو قبیلې خلک مېشت دي چې یو بل سره راشه درشه، د ځمکو ملکيتونه او خپل خپلوان لري او دوی ته د پاکستان په شناختي کارډونو د انګور اډې په دروازې د راتګ او تګ اجازه نه ورکول کيږي. د هغه په وینا د احمدزئ وزیرو د څلورو لويو خېلونو خوجل خېل، توجي خېل، زلي خېل او د ګنګي خېلو جرګې په اتفاق سره په انګور اډه افغانستان ته د تګ دپاره د ويزو پروګرام رد کړی او پرضد به یې سخت احتجاجونه کوي او د علاقې بازارونه او سړکونه به تړل کیږي. هغه ویلي د دوی غوښتنې اییني دي او د قانون په چوکاټ کې به د خپلو حقونو مبارزې ته دوام ورکوي. د پاکستان حکومت بیا بیا ویلي د سفري اسنادو د لازمي کېدو له شرطه نه په شا کېږي خو زیاتوي چې د امنیت، انټرنېټي خدماتو، د برېښنا ورکولو او د روغتونونو او تعلیمي ادارو فعالولو ژمنې به پوره کوي. د سیمې د انتظامیه د مشر یا ډپټي کمشنر ناصر خان د دفتر چارواکي وايي د دوی غوښتنې اورېدل شوي او ورته ویل شوي چې څنګه نوي حکومتنو جوړ شي نو  دا  ویزې له غوښتنې پرته به  په نورو ټولو غوښتنو عمل شروع شي.

24.02.2024 ډیوه

OK
This site uses cookies. By continuing to browse the site, you are agreeing to our use of cookies. Find out more