د افغانستان د جينکو د فټ بال لوبډلې غړې او کورنۍ يې پاکستان ته رسېدلي
د پاکستان د اطلاعاتو وزير فواد چودري ويلي، د افغانستان د جينکو د فټ بال لوبډلې هرکلی کوي څوک چې د تورخم د لارې پاکستان ته راغلي دي.
نوموړي تيره شپه ناوخته په ټویټر ويلي، دغو لوبغاړو د افغانستان پاسپورټونه او د پاکستان ويزې لرلې.
چودري په دغه اړه نور جزيات نه دي شريک کړي چې د دغو لوبغاړو او کورنیو به یې په راتلونکې کې څه کيږي؟.
وي او اې ډیوه په تورخم د چارواکو سره د تماس هڅه کړې او په وټس اېپ يې د لنډي کوتل مرستيال کمشنر ته پېغام ورلېږلی، نوموړي پېغام کتلی خو ځواب يې نه دی کړی.
خو د پاکستان ډان ورځپاڼې ويلي د برتانیې د یوې غېر دولتي ادارې (فټ بال د سولې دپاره) او پاکستان دحکومت په مرسته د افغانستان 32 د فټ بال لوبغاړې او د هغوی د کورنيو 115 غړي پاکستان ته راغلي دي.
د رپورټ ترمخه دغه لوبغاړې په 26 اګست قطر ته تلې چرته چې افغان کډوال د 2022 د فيفا نړيوال کپ دپاره په یو ځای کې ساتل شوي خو د کابل په هوايي اډه د بريد له امله دا لوبغاړې پاتې شوې وې.
د افغانستان د فټ بال لوبډلې پخوانۍ کپتانې خالده پوپل په ټویټر ویلي،
زه خوشاله يم چې دا اعلان کوم چې زما په ملاتړ د افغانستان 79 پېغلې فټ بالرانې او د هغوی د کورنيو غړي د افغانستان څخه ووتل.
هغې د هغو ادارو يادګېرنه هم کړې چا چې يې په دغه عمل کې ملاتړ کړی دی.
د وي او اې اشنا د خبر ترمخه په 24 اګست د افغانستان د ښځو د فټ بال د ملي لوبډلې غړې چې ورسره د 75 کسانو پورې ډله شامله وه په يوه الوتکه کې د کابل د هوايي اډې څخه وتلې وې.
د نړیوال فټ بال د لوبغاړو اتحاديې فېفپرو د اسټريليا د حکومت مننه کړې وه چې د دغو لوبغاړو، د لوبډلې د چارواکو او د هغوی د کورنيو د غړي ويستل يې ممکن کړي وو.
اتحاديې ويلي وو دغه پېغلې مېرمنې د ګواښ سره مخامخ وي.
فېفپرو په لسم ستمبر ويلي وو د نړۍ لوبغاړي د افغانستان د زړورو ښځينه فټ بالرانو لوبغاړو سره ولاړ دي.
د افغانستان څخه د جينکو د فټ لوبغاړې په داسې حال کې وتلي چې په 15 اګست طالبانو کابل نيولی وو.
