بین الافغاني مذاکرات؛ تماس ډلو پر اختلافي مسائلو بحثونه کړي
د افغانستان د اسلامي جمهوریت او طالبانو د مذاکراتي ټېمونو تماس ډلو کاري ناسته تر سره کړې ده.
د افغان حکومت د مذاکراتي ټېم غړي او ویاند نادر نادري تیره شپه سپټمبر۲۷(تلې شپږمه) ویلي دغه ناسته چې تیره شپه تر سره شوې دواړو لورو پکې د اختلافي مسائلو د هواري په اړه بحثونه کړي دي.
نوموړي زیاته کړې چې بحثونه به دوام ولري.
په قطر کې د وسله والو طالبانو د سیاسي دفتر ویاند ډاکتر محمد نعیم هم ویلي چې په یاده ناسته کې بیا هم د کاري اصولو د طرالعمل اړوند موضوعاتو په اړه بحثونه وشول.
هغه زیاته کړې چې د کاري اصولو او طرزالعملونو په اړه د توافق تر لاسه کولو په اړه به ورته نورې ناستې هم تر سره شي چې په وینا یې ترڅو د مذاکراتو د اجنډا په اړه بحثونه پيل شي.
په دوحه کې د افغان سولې په اړه بین الافغاني مذاکرات د روانې سپټمبر میاشتې پر ۱۲مه نېټه پرانیستل شول.
تر دا مهاله د افغانستان د اسلامي جمهوریت او طالبانو مذاکراتي ټېمونو د تماس ډلو د کاري اصولو او طرزالعملونو په اړه څو ناستې کړي دي.
