د ټاکنو کمیسیون د ډیجیټال سنټر مهرولاک ماتېدل؛ 'د تورنو کسانو دوسیه ناڅرګنده ده'
د افغانستان د ټاکنو خپلواک کمیسیون د ډیجیټالي معلوماتو مرکز مهرولاک د ماتیدو په قضیه کې د تورنو کسانو دوسیه د څلورو ورځو په تېریدو سره لا هم لوېې څارنوالۍ ته نه ده رسیدلې.
د هغو اسنادو له مخې چې ازادي راډیو ته رسیدلي، د درېیو مسوولو کسانو دوسیه څلور ورځې مخکې څارنوالۍ ته سپارل شوې، خو ددغې ادارې ویاند وايي، د یادو دوسیو په اړه اطلاع نه لري.
د میزان په ۲۸مه د رایو د ټاکنو کمیسیون د ډیجیټال سنټر مهرولاک ماتېدو دوه ورځې ددغه کمیسیون کارونه وځنډول. تردې پېښې وروسته د عبدالله عبدالله په مشرۍ د ثبات او همپالنې ټاکنیزې ډلې د ټاکنو کمیسیون له ځینو چارواکو سره د قانوني چلند غوښتنه وکړه.
له دغه جنجال وروسته د انتخاباتو کمیسیون د موضوع د ارزونې په هدف، د دوو کمیشنرانو په مشرۍ یو پلاوی وګماره چې له څو ورځو ارزونو وروسته یې په نهو پاڼو کې یو راپور خپورکړ.
- ټاکنو کمېسیون: "ډیجیټال سنټر" کې هېڅ ډول لاسوهنه نه ده شوې
- د ثبات او همپالنې ټاکنیزه ډله: د ټاکنو کمیسیون د دوو چارواکو دندې دې وځنډول شي
که څه هم په دغه راپورکې راغلي چې رأیو او حساسو موادو ته لاس نه دی وړل شوی، خو د کمېسیون د ډیجیټالي معلوماتو د مرکز د مهرولاک ماتولو له امله درې کسان لوېې څارنوالۍ ته ور وپیژندل شول.
په دوی کې د کمیسیون د دارلانشاء امنیتي سلاکار حمید احمدزی، د کمیسیون د غیرنظامي ساتونکو مسوول لطف الرحمن او د پولیسو مامور سید اصغر شامل دي چې ترقانوني تعقیب لاندې نیول کېږي.
دغه راپور د عقرب په څلورمه له یوه لیک سره د انتخاباتو کمیسیون د رئیسې حوا علم نورستانۍ په لاسلیک، لوېې څارنوالۍ ته ولیږل شو.
د دغه کمیسیون یوه ویاند ذبیح الله سادات ازادي رادیو ته وویل، "دوی ټول موارد وارزول او چا چې په دنده کې غفلت کړی و، د هغو په اړه یې هم تصمیم ونیوه او د عقرب په څلورمه یې یو مکتوب لوېې څارنوالۍ واستاوه."
خو لوېې څارنوالۍ ددغه مکتوب له لېږل کېدو څلور ورځې وروسته، ددغې ادارې چارواکي وايي، دوی ته د سه شنبه (عقرب ۷مه) تر پایه داسې کوم مکتوب نه دی رسېدلی.
د لویې څارنوالۍ د اطلاعاتو او اړیکو رئیس عبدالقهار فرخ سیر ازادي راډیو ته وویل: "دغه دوسیه تراوسه پورې موږ ته نه ده رسیدلې. وبه وینو چې جزیئات یې څه دي. څو کسان دي او تورونه پر چا دي."
د عبدالله عبدالله په مشرۍ د ثبات او همپالنې ټیم وايي، په دې برخه کې نه پرمختګ دوی اندېښمن کړي.
ددغه ټیم یوه غړي نور الرحمان اخلاقي ازادي راډیو ته وویل، د ټاکنو کمیسیون تراوسه د ډیجیټالي معلوماتو مرکز د مهرولاک ماتېدو د ځای او وخت ویډیو دوی ته نه ده سپارلې او "څارنوالۍ ته د تورنو کسانو د دوسیې نه رسیدل د اندیښنې وړ ده."
"موږ توافق وکړ [چې د ټاکنو کمیسیون] کار باید دوام وکړي او ارزیابي دې هم روانه وي. په دواړو مواردو کې کوچنی پرمختګ هم نه دی شوی."
دغه جنجال وروسته له هغه پیل شو چې د ټاکنو کمیسیون ځینې کارکوونکي او د پولیسو د ځانګړو ځواکونو ځینې سرتېري د میزان په ۲۸مه د شپې شاوخوا ۹ بجې د هغې ودانۍ د دهلیز مهرولاک مات کړ او ورننوتل چې د ډیجیټالي معلوماتو مرکز یې په دویم پوړ کې دی.
د ټاکنو کمیسیون چارواکو وویل، دغه پولیس سرتېري چې د ودانۍ د ساتلو مسئولیت یې درلود، د سړې هوا له امله دهلیز ته ننوتي وو.