روح الله ساقييار

ښاغلى روح الله ساقييار چې اوس(نامراد) تخلص كوي، د ښاغلي سيف الله زوى پر 1340ل كال د كندهار په پنځمه ناحيه كې زېږېدلى دى. خپلې زده كړې يې تر لسانسه رسولي او اوس ديوه بااحساسه ډاكټر په توګه دنده ترسره كوي، له څو كلونو را په دېخوا په چمن كې استوګن دى او خپلو فرهنګي او ادبي هڅو ته دوام وركوي.
تر دې مهاله يې دغه اثار خپاره شوي دي: د مينې زمزمې، رڼا
اوښكلا او زخمي يادونه. همداراز پښتو فارماكولوژي او ناوړه دودونه نومي دوه كتابونه يې چاپ ته چمتو دي. دښاغلي ساقييار په شعر كې د عرفاني ښكلا يو څرك هم ځان څرګندوي چې دا په خپله دده په شعر كې د ځينو لرغونو شاعرانو اغېز جوتوي، قافيې او رديف يې ښايسته دي. ددې ترڅنګ يې دشعر هنري جوړښت ته هم سترګې ور اوړي. ښاغلى ساقييار د ښكلا او مينې په اړه هم ډېر بحثونه كوي او هڅه كوي چې ددې فلسفې او ستر راز پر مانا پوه شي او په دې دوو مسايلو كې ډوب او ژور لاړ شي، چې دا په خپله دده مينه او ذوق څرګندوي. د كندهار ځوانو شاعرانو يې شعرونه لوستي او خوند يې ورڅخه اخيستى دى. هيله ده شاعري يې نوره هم وځلېږي او نثر و نظم دواړو كې پوره برى ترلاسه كړي.
 

 Site designed and administrated by Tolafghan.com 2003 webmaster@shirzad.de