خواجه محمد رغبت

حاجي خواجه محمد رغبت دښاغلي حاجي ګل محمد زوى د 1322 ل كال د لړم پر څلورمه نېټه په كندهار كې زېږېدلى دى، زده كړې يې په چكسواكيا كې په انجنيرۍ څانګه كې ترسره كړي او له پراګ څخه يې ډپلومه اخيستې ده، نوموړى د كندهار په بېلابېلو ادارو كې دندې ترسره كړي او اوس هم له المان څخه افغانستان ته د پرزه جاتو پر سوداګرۍ بوخت دى. د كندهار په ورځپاڼو او نورو خپرونو كې يې ليكنې او شعرونه خپاره شوي دي، يوه شعري ټولګه(د مينې سوز) يې د چاپ لار څاري، (انسان او انسانيت) يې هم د نظم و نثر بله ټولګه ده چې دا هم لا خپره شوې نه ده. د رحمن بابا، خوشالخان خټك، ملايحيى، مولوي عبدالغفار بريالي ، ملاعبدالمنان ، ملاعبدالسلام او ملامحمدعيسى له شعرونو سره بې كچه مينه لري، له دوولسو كلونو راپه دېخوا په امريكا كې د كډوالۍ ترخې شپې ورځې سبا كوي. پر دې بوختياوو سربېره يې له شعر و شاعرۍ سره هم خپله مينه تانده ساتلې، له نورو فرهنګپالو او ادبپالو سره ادبي او كلتوري مرستې كوي، په فرهنګي غونډو كې ګډون كوي او د هېواد له فرهنګي او ادبي بيارغونې سره ډېره مينه او لېوالتيا لري. شعر يې د خپلې ودې او پرمختيا لومړني پړاوونه وهي او د هنريت او شعريت ټول ارزښتونه او اړخونه خپلوي.
په ځينو شعرونو كې يې د وزن نيمګړتيا ترسترګو كېږي چې دا ستونزه هم ترڅه رياضت او زيار وروسته غوڅېدى شي.
 

 Site designed and administrated by Tolafghan.com 2003 webmaster@shirzad.de