عبدالنافع صميميار

ښاغلى عبدالنافع صميميار د ولي محمد پردېس زوى پر 1359 ل كال دكندهار په شپږمه ناحيه كې زېږېدلى دى. شپږ كاله يې په ځينو ديني مدرسو او جوماتونو كې زده كړې وكړې چې اوس هم پر ديني او ادبي زده كړو بوخت دى.
صميميار په شعر ليكلو كې د ښه هنري او ادبي ځواك او ذوق څښتن دى. كه څه هم ډېر تنكى دى، خو ژور فكر او اوچت خيال يې ددې خبرې پخلى كوي، چې نوموړى د سبا ورځې په ښو شاعرانو كې راتلاى شي. كه ځينې سولېدلي شعري تركيبونه، استعارې او تشبېهات يې پرېښودل او دټولنې او وخت نوي انځورونه يې راواخيستل، لنډه دا چې د نوښت لار يې ونيوله هنرمنده او شاعرانه ژبه به يې دده هنري او فكري پانګه نوره هم بډايه كړي.
صميميار صيب په خپلو شعرونو كې له اخلاقي او ادبي جرئت څخه كار اخيستى او تل يې هغه څه ليكلي چې په ذهن كې ورته الهام شوي دي. د ډېرو لرغونو شاعرانو له كلام څخه يې خوند اخيستى او مينه ورسره لري. په دې وروستيو وختونو كې يې بوختياوې ډېرې شوي، له همدې كبله له ادبي چاپېريال څخه يو څه لرې شوى دى. خو بيا يې هم له قلم او كتاب سره خپله مينه اېشنده ساتلې ده.

 Site designed and administrated by Tolafghan.com 2003 webmaster@shirzad.de