د ناقانونه کډوالۍ په اړ ه د انګلستان نوی پلان

د روان کال د می د میاشتې په وروستيو کې د انګلستان لومړی وزير، ډيويډ کامرون د ناقانونه کډوالۍ په وړاندې د مبارزې په اړه د نوی پلان د جوړولو څخه خبر ورکړ چې د دغه پلان پر اساس به د انګلستان دروازې د کډوالو په وړاندې و تړي.
د انګلستان لومړی وزير ډيويډ کامرون د پنجشنې په ورځ چې د روان کال د می د میاشتې له (۲۷) نيټې سره سمون خورې د ناقانونه کډوالۍ په وړاندې د مبارزې په موخه له نويو اصلاحاتو څخه خبر ورکړ او وويلي چې دوی به ناقانونه کډوال له انګلستان څخه بهر کړي.
د انګلستان ګارډین ورځپاڼه د کامرون له قوله ليکي :
((يو هيواد هغه وخت پياوړۍ ګڼل کيږي چې ناقانونه کډوالۍ کنټرول کړي نه دا چې د سمندر په سر پل جوړ کړي. بی کنټروله مهاجرت د يوه هيواد، د کار پر بازار منفي اغيره کوي او کولای شي چې د هيواد اقتصاد ته لويه ضربه وارد کړي. یو شمير خلک شته چې د ټاکل شوي مودې څخه زيات په انګستان کې اوسيږي، يعنې د ويزې او پاسپورټ سره انګلستان ته راغلي خو، په ويزه کې له ټاکل شوي مودې څخه زيات په انګلستان کې اوسيږي.‎ لدې وروسته به دوی ته اجازه ور نکړل شي چې په انګلستان کې و اوسيږي، ځکه چې د انګلستان خلک غواړي چې هر څه منظم شي.))
د کامرون په خپله مرکه کې ويلې چې د انګلستان اوسيدونکي د کډوالۍ د اوسنۍ سيستم څخه ناخوښ دي، ځکه چې اوسنې سيستم بهرنيو کډوالو ته اجازه ورکوي چې په انګلستان کې و اوسيږي او کار وکړي. زموږ غواړي چې ټول کډوال له انګلستان څخه بهر شي.
د انګلستان خلک نور نو د کډوالو د زغم توان نه لري او ځينې يې د انګلستان پر اقتصادي نظام باندې نيوکه کوي او وايي چې په سيمه کې روان اقتصادي ستونزې انګلستان ته د بهرنيو کارګرانو د راتګ اصلي لامل دی. د اروپايي ټولنې هغه غړي هيوادونه چې د اقتصاد له اړخه کمزوري دي انګلستان ته کارګران ليږدوی چې د بهرنيو کارګرانو په راتګ سره د انګلستان اصلي اوسيدونکو ته کار نه پيدا کيږي.
ګارډين ليکي:
د انګلستان هيواد نوی کړنلاره د ناقانونه کډوالو په وړاندې به ټول حکومتي سيستم دېته اړ کړي چې د ناقانونه کډوالو د ايستلو لپاره هلې ځلي وکړي.کامرون به خپله د کډوالو نيولو د پروسې څخه مستقيم نظارت وکړي.
- پوليس به ټول هغه کسان ونیسي چې په غير قانوني ډول کار کوي، اموال به يې دولت ته وسپارل شي او دوی به مجرم وګڼل شي.
- د ښاروالۍ پورې مربوط ارګانونو ته صلاحيت ورکول کيږي چې هغه کورونه مشخص کړي چې ناقانونه کډوال پکې اوسيږي او د دغه کورونو د خاوندانو په وړاندې له سخت چلند څخه کار واخلي. ناقانونه کډوال دې له کورونه څخه وشړي.
- هغه کسانو چې د پناه غوښتنې په برخه کې يې درخواستونه نه دی منل شوی، موقعيت معلومونکي لباسونه واغوستل شي تر څو صلاحيت لرونکي چارواکي په آسانی سره وکولای شي دوی و څاري.
کامرون وويلي چې:
د انګلستان پوليس يو شمير اشخاص چې د انګلستان د اتباعو سره د واده له امله انګلستان ته راغلی و، بيرته شړلي او همدارنګه د (۹۰۰۰) ناقانونه کډوالو د موټر چلوونې جوازونه ترې اخيستي.
موږ له يوې مودې څخه د کارګر د قوې له کمښت سره مخ و او په مختلفو برخو کې انجینران، ډاکټران، ښوونکي او نرسانو ته مو اړتيا درلود. له هماغه وخت څخه مو د اشخاصو په روزلو پيل وکړ او بريتانويان مو په مختلفو برخو کې وروزل تر څو دغه د کارګر موجوده خلا ډک کړي. د دې لپاره چې له دې وروسته په انګلستان کې غير بريتانوي کارګر په کار و نه ګمارل شي، ساجد جاويد مو د تجارت د مرستيال په حيث ټاکلی تر څو د کارګرانو د استخدام له پروسې څخه څارنه وکړي.
د دې ترڅنګ، موږ درې ميليونه نور کسان په مختلفو برخو کې و روزو، تر څو کار زده کړي. د دوی په ګمارلو سره به بهرنيو کار ګرانو ته په انګلستان کې د اوسيدو چانس کم شي او موږ به خپله سرمايه خوندي کړی وي.
اوسمهال د انګلستان هيواد يو نظامي بيړۍ د اروپايي ټولنې له ګډو ځواکونو سره د مديترانې په سمندرګي د ګزمې په حال کې ده تر څو ناقانونه کډوال له ډوبيدو څخه وژغورې او بيرته خپلو سيمو ته يا ايټاليي ته وليږدوي.
تیره اونۍ د انګلستان يوه بيړۍ (۶۰۰) تنه کډوال د مديترانې په سمندرګۍ کې د سمندري غلو له منګولو خلاص کړی و.