پرشفیقي دمحمدیار برید

څو ورځې وړاندې جمعیت اصلاح  په کابل عیدګاه کې دسیرت النبي ( صلی الله علیه وسلم ) سیالي ترسره کړه ، چې له نیکه مرغه زرګونو ځوانانو او پیغلو په کې ګډون وکړ ، په دې زمانه کې  چې نړیوال انسانیت  په عصیان او لادینیت کې غوپې وهي  ، دا به دافغان ځوانانو نیمکرغي  وبولو ، چې لا هم د ویسټرنایزیشن  او لیبرالیزم  یو اړخیز  هجوم  او تبلیغاتي یرغل یې په دل او دماغ اغیز نه دی کړی ، او نه  ترې په دې پردۍتوره شپه کې دخپلو مڼو حساب ورک شوی ، سره له دې چې هیواد یې دتیري جونز د همفکرو په منګولوکې  ښکیل دی ، خو کابلي ځوانان لا هم په خپل زړه کې دمدني جانان مینه پالي  او په ټول شوق او شور   دنبوي سیرت په سیالیو کې برخه اخلي .
دخوښیو او شکرپه دې بیساري مناسبت شایدډیرو متعهدو مؤمنانو  دخوښۍ اوښکې تلې کړې وي ، چې له دې جملې یو هم دتیرجهاد او هجرت دمکتب  استازی محمدزبیر شفیقي دی ، چې په دې اړه یې په ویسا ورځپاڼه کې لیکنه وکړه ، او د جمعیت اصلاح دا اقدام یې وستایه دغه راز یې ددا وړ نورو پروګرامونو دتدویر  غوښتنه هم وکړه .
خو پښتانه وایي (هرچا ته خدای تعالی دومره غم ورکړی چې ورځ یې پرې تیره شي ) دجمعیت اصلاح  دې اقدام ، د افغان ځوانانو دنبوي مینې جذبو  او دشفیقي صاحب مننې که له یوې خوا عام مؤمن افغانان خوښ او هیلمن کړي ، بالمقابل  هغو کسانو پرې باد اخیستی  ، چې ددجالي یرغل او خیراتي دیموکراسۍ په سیوري کې ورته نور   ددین  او نبوي عشق کیسه  پای ته رسیدلي ښکاري .
ددې کسانو په استازیتوب خپل دزړه دبړاس  دعبدالاحمد محمدیار په  نامه  دعبدالغفور لیوال  دودان افغانستان ګوند یوه مسؤل ایستلی ، نوموړي  په تاند ویب پاڼه کې په یوه مطلب کې دجمعیت اصلاح دسیرت پروګرام او دشفیقي صاحب ایماني احساسات هم  دآی ایس آی پروګرام بللی ، او شفیقي صاحب یې ددې لیکنې له امله په خورا نامانوسو تورو ، تورونو او پیغورونو لمانځلی دی .
یوه ورځ په فیسبوک کې چا لیکلي ووچې ( که بالفرض المحال په اوسنۍ زمانه کې رسول الله صلی الله علیه وسلم مبعوث شوی وای ، او خلک یې الهي دین ته رابللي وای ، نو ضرور به  د معاصرو سیکولرانو  لخوا د آی ایس آی او پاکستانیتوب ټاپه پرې وهل شوې وای )  ځکه د افغانانو په منځ کې دغه معاصرله عقیدوي لحاظه پردی نسل هسې دتصادف  له مخې د دیني فکر او کړنو په مقابل کې له دې شعار څخه استفاده نه کوي ، بلکې ددوی دا خبرې او تبلیغات د ماټریالیزم ، سیکولرزم  او هیومنزیم غوندې  د پردین نه ولاړو فلسفو په بنسټ تکیه دي ، چې ددین ، پیغمبر ، وحی او اخرت په نامه هیڅ هم نه شي زغملای ، بلکې په مقابل کې یې له هرې حربې کار اخلي ، چې همدا اوس  د ورځني تبلیغاتي بازار  له امله ددوی لپاره ترټولو ښه  تبلیغاتي  ګوزار  همدا  دپاکستانیتوب الزام دی ، چې په هر دیني جریان ، عقیدوي فعالیت او دین پال شخص یې پورې کړي .
آیا اسلامي ارزښتونه پاکستاني دي ؟
نن سبا خصوصا په کابل میشتو لیکوالو کې دایودود ګرځیدلی ، چې که څوک دکوم اسلامي ارزښت په ننګه  لیکنه وکړي ، دکوم اسلامي روایت داحیاء هڅه وکړي ، ږیره پریږدي ، خولۍ په سر کړي ، داسلامي نظام نوم واخلي ، یاد نړۍ له  مسلمانانو او مجاهدینو سره خواخوږي څرګنده کړي ، سمدستي ورباندې دپاکستانیتوب الزام لګول کیږي ، چې ترټولو ښه مثال یې همدا دشفیقي صاحب لیکنه  او دمحمدیار الزام  دی .
مګر آیا دا معقوله ده چې اسلام  او اسلامي روایات دي ترپاکستان پورې منحصر وبلل شي ؟ آیا ددې جواز شته  چې مسلماني دپاکستانیتوب  مرادفه وبلل شي ؟
که حقیقت ته وګورو اسلام او پاکستان دوه بیلابیل مفاهیم او حقائق دي ، اسلام الهي دین دی چې له اوس نه  نږدې یونیمه  زریزه وړاندې  الله تعالی دخپل پیغمبر په توسط د بشریت د هدایت لپاره را استولی دی ، دادین له معلومو او محدودو احکامو او اساساتو جوړ دی چې په خپل وخت کې د ( الیوم اکملت لکم دینکم ) په  استناد بشپړ شوی ، او بل هیڅ شی یې نه شي  تکمیلولای .
پاکستان دیوه هیواد نوم دی ، چې شاوخوا شپیته کاله وړاندې  داسیا په جنوب کې په هندي براعظم او دافغانستان په یوه برخه ودان شوی دی ، پاکستان چې دیوې محدودې جغرافیې نوم دی ، له اسلام څخه  سلګونه کاله کشر دی ، دپاکستان او اسلام یوازینۍ حدمشترک دادی  چې  دپاکستان اکثره اوسیدونکي مسلمانان دي .
دې ته په پام سره دابه ډیره بي ځایه وي ، که څوک داسلامي روایاتو احیاء  دپاکستاني فکر احیاء ونوموي  ، اسلام  له پاکستان  اوپاکستانیتوب څخه ډیر  لوړ  ، مشر  او مجزا دی ، چې له جزئي ګډون پرته ورسره هیڅ  مشترکات نلري  .
جهاد ، هجرت ، پیغمبري محبت  ، او دنبوي سیرت  امتثال  اسلامي اعمال دي چې په صریحو قرآني نصوصو ثابت دي ،  دا اعمال ترپاکستان پورې هیڅ تړاو نلري ، بلکې دانبوي اعمال دي ، چې د تاسیس او او ارشاد  امتیاز یې یوازې اسلام لري نه پاکستان .
مګر زموږ هغه سیکولران  چې داسلامي ټولنې او اسلامي فکر دغلبې له امله  په اسلام مخامخ بریدنه شي کولای ، تل هڅه کوي ، دغه اسلامي روایات لومړی په پاکستانیتوب تورن کړي او وروسته  یې په وړاندې جبهه ونیسي .
دمعاصرو سیکولرانو له ډلې محمدیار په دې اړه داسې لیکي (بېځايه به نه وي چې د پاكستانۍ پالېسۍ دغه ځيرك مقلد ته يې ورياده كړم، چې موږ د پاكستان د مذهبي، سياسي پالېسيو پرستش په ۱۹۷۳ كال كې هغه مهال پيل كړ، چې مرحوم ذوالفقار علي بهټو د ارواښاد قاضي حسين احمد په همت او درايت سره، چې د لرګيو د تجار په نوم يې زموږ تعليمي موسساتو ته نفوذ كړى و، زموږ يو شمېر اخواني مسلمانان محصلين يې جذب او پر شهيد داوود خان يې د كفر فتوا  وايسته او د ده حكومت يې فاسد او د جهاد وړ وباله.
دروند مشر شفيقي صاحب! د هغه جهاد لړۍ تر ننه په يوه او بله بڼه د يوه او بل پر لاس راروانه ده، ما زما ملت او دنيا ته خو فاجعه معلومېږي، ته چې هم مجاهد يې او هم د دغه جهاد په ماهيت ښه پوه يې او هم د پاكستان د رامنځته كېدو په منطق  او د لوبېدو په كمال تر ما او ډېرو نورو ډېر پوه يې نه پوهېږم، نتيجه ګيري به دې څه وي )
دلته که تاسو دقت وکړئ محمدیار لومړی  دکمونیزم  په وړاندې دافغانانو جهاد  یواسلامي  واجب عمل نه ، بلکې دپاکستان  پالیسي بللې ، او ورپسې یې په پاته لیکنه کې ددې اسلامي علیاء ارزښت  دبدرنګه کولو ټول هڅه کړې او دخپل شیطاني قلم دججوري هيڅ زهر یې نه دي سپمولي .
محمدیار دخپلې لیکنې پیل په دې تورو کړی (له نېكه مرغه د افغان – شوروي جنګ پر مهال زما كورنۍ د اقتصادي بېوسۍ له امله پاكستان ته مهاجره نه شوه، ښايي هغه مهال موږ له هېواده وتي واى، نو ډېر به خوښ واى، خو اوس نه پوهېږم څنګه د لوى پروردګار شكر ادا كړم، چې د پاكستان لمنې ته يې د هجرت په نوم ونه غورځولم )
محمدیار چې  دشورویانو په وړاندې  دافغانانو جهاد  (جنګ ) بولي ، له کمونیزم څخه دافغانانو هجرت هم ورته  یو سپک عمل بریښي او داچې دده کورنۍ دا الهي فریضه نه ده  ترسره کړې  ( العیاذ بالله ) په دې ګناه دنیکمرغۍ احساس کوي  .
محمدیار صاحب نه پوهیږم چې له واجب هجرت څخه ستاسو دکورنۍ  غاړې غړولو به نور کوم زیان درته رسولی وي ، خو دا زیان یې دادی نغد رامعلوم شو ،  چې دکمونیستي نظام په سیورې  کې لوییدلو دې فکر دومره منحرف کړی ، چې اوس درته  قرآني او نبوي ارزښت هجرت هم یو نامطلوب او پاکستانی  عمل بریښي .
د شفیقي او محمدیار تقالید
محمدیار  ، شفیقي صاحب  له دې امله غندلی ، چې ولې یې ویلي چې جمعیت اصلاح دې ، دپاکستان له مسلمانانو  دیوداسې نیک عمل تقلید وکړي ، چې ورسره په ځوانانو خصوصا لیکوالو کې دنبوي سیرت سره مینه اوعلاقه زیاتیږي  .
نوموړي دهمدې خبرې په دوام دجمعیت اصلاح لخوا ترسره کیدونکي دیني تعلیمي سلسلې لکه  میلادالنبي ، سیرت النبي  دغه راز نور مذهبي او دیني پروګرامونه دپاکستان درسمي پالیسیو تقلید بولي ، چې باید ترسره نه  شي .
وړاندې وویل شول چې دغه پروګرامونه لکه څنګه چې واضحه ده  پاکستان ساخت روایات نه دي ، چې ترسره کول یې دپاکستان تقلید ونومول شي ، بلکې دا په درسته اسلامي نړۍ کې داسلامي ویښتابه  او  تمدن  دژوندي ساتلو لپاره  دمسلمانو دعوتي ډلو او افرادو لخوا ترسره کیدونکي پروګرامونه دي ، چې سوچه دیني ماهیت لري او یوازې داسلامي روایاتو دژوندي ساتلو په موخه ترسره کیږي  ، دې ته په پام سره که څوک بیا هم داسلامي او پاکستاني ارزښتونو ترمنځ توپیر نه شي کولای نو یوازې غبرګ جاهل بلل کیدای شي .
محمدیار صاحب ! که دشفیقي او جمعیت اصلاح لپاره دسیرت النبي  او فهم قرآن تدریسي سلسلې پردی تقلید وي ، او کول یې ورته اجازه نلري ، نو پرځای ده چې یوه شیبه لږ په خپل ګریوان کې هم سرټیټ کړئ ، او فکر وکړئ تاسو محترم دچا تقلید ته کار ویلی ، او کومې نادودې مو پیل کړي دي .
افغان او پښتون خو فطرتا  مسلمان ، موحد ، پاک نفسه ، باعفته ، باعزته ، لمونځ  ګزار  او تقوا دار وي ، مګر تاسو محترم چې له کومې ورځې مو چې دطالبانو دامربالمعروف ډار له  غوږو وتلی نو لکه  له  دیني مکلفیت څخه چې وزګار شوي یاست ، بیا مو نه یوازې لمانځه  او نورو دیني اعمالو او متعقداتو ته رخصت ورکړی ، بلکې نور ناویلي هوسونه مو هم ځان ته روا بللي .
په دې برخه کې به ستاسو دشخصي کړنو او پردیو غیر دیني تقالیدو په اړه جزیاتو ته  نه ورټیټیږو ، ځکه چې کیدای شي بیا داسې لیکنه ترې جوړه شي ، چې هیڅ ویب پاڼه به یې هم دنشر تاب ونلري  ، خو له عملي ژونده رابهر په  لیکوالي ژوند کې هغه څه چې تاسو په خپله سفرنامه  ( مناجات او خرابات )  کې کوم څه په سپیڅلي قلم  دسپيڅلي کاغذ په مخ لیکلي ، زما ضمیر خو دیوه مسلمان او افغان په حیث ترې  پناه غواړي .
تاسو به یې شاید یاغي باغي لیکوالي بولئ ، مګر په دې سفرنامه کې د ( وه خونه شلیده )  ( په ټول عمر کې دې دا یو دسړیتوب کار کړی ) غوندې جریانات  دغه راز دسوات دمیخانو هوسراني او ستاسو دقلم کریهه او رکیکه ژبه  هغه څه دي ، چې ماخو  تردې پخوا په افغان درانه فرهنګ کې نه دي لیدلي او په دې هم نه پوهیږم چې تاسو له کوم بي عفته  او وحشي تمدن څخه تقلید کړي دي .
محمدیار صاحب ددې په ځای چې دشفیقي صاحب دیني فهم دپاکستان تقلید وبولئ ، او ورباندې ملامت  یې کړئ ،ښه خبره داده چې خپلو نادودو ته  یوه توجیه پیدا کړئ ، ځکه هغه څه چې تاسو ورته  دنوي لیبرالیزم  او ازادۍ  مظاهر وایاست ، زموږ له هیڅ دیني او کلتوري  اصل سره اړخ نه لګوي ، بلکې سوچه  پردی لغړ تقلید دی ، چې اسلا م او افغانیت ترې پناه غواړي .
که همدا خر وو او  همدا خرکار  ،فکر نه کوم ، چې د واګ  واګه موتړلي پاته شي ، ځکه دا اولس دروند او متدین اولس دی ، چې لواطت  او زنا دانساني غرایزو اشباع نه بلکې ګناه بولي ، شراب  حرام  او لمونځ داسلام ترټولو اساسي ستنه بولي ، چې په نړیدلو یې ټول اسلام نړیږي .
 په یاد ولرئ ، چې ستاسو دودان ګوند غوندې تردې پخوا هم خوراپخو ککریو په دې اولس باندې خپل بخت ازمویلی ، خو داچې  له مذهب او دین سره وران وو نوځکه ناچله وختل او رسوا شول ، که غواړئ چې په دې اولس کې مو پښه ټینګه شه ، نو چې هرڅه کوئ ، خو ددین او دیني فکر په وړاندې  دمخالفت له سنګر څخه ضرور باید ځانونه  لرې وساتئ ، ځکه ددې اولس په دیوال پردۍ څپیاکې نه سریښیږي .