په ګوشته د پاکستان د تیري په اړه د کلیفورنیا ټولنې اعلامیه

د گوشتې په ولسوالۍ باندې د پاکستان د تیري په اړه په کلیفورنیا کی د افغاني کلتوري ټولنې اعلامیه

څو ورځی د مخه پاکستانی پوځیانو د افغانستان  په خاوره کې  دمومندو (مهمندو) دگوشتې په سيمه  تیری وکړ،‏ او هلته یی  ځينې تأسيسات جوړ او یوه دروازه  ودروله .‏  
دغه سيمه  دمومندو په ميشته کيدو سره  د پيړيو راهيسې  تل د افغانستان خاوره  پاتې شويده.‏  د گوشتې سيمه  په اصل کی د مومندو د لوی قوم  د اوسيدو یوه برخه ده او مومند د افغانستان  هغه لرغونې پښتون قوم  دئ چې د قندهار له «مرغه» نومې سیمې نه اول په غزني او بیا د کامی− پیښور په سیمه کی میشت شول .‏  بل مهم ټکې دادئ چې د مومندو سیمه یا نوم د تحمیلی ډیورنډ توافق لیک په متن کی هیڅ یاد شوې ندئ  او امیرعبدالرحمن  خان په هماغه وخت کی د هندوستان برتانوی حکومت ته په ټینگه ښکاره کړه چی ټول مومند د افغانستان برخه ده.‏  د برتانوي هند وایسرای هم  د امیر نه غوښتي وو چې د کوز مومند او بر مومند تر منځ پوله په رسمي ډول وپیژني، خو امیر د هغه دغه غوښتنه په غوڅه توگه رد کړه او پر هغه برسیره یې  د خیبر په مقابل کی، چې د برتانوي هند په لاس کی وو، له کامی نه تر پیښوره پورې  د یوه لوی سړک دجوړولو کار هم  پیل کړ چې  دا کار د هغه د مرگ نه ورسته بند شو.‏  
کله چی د برتانوي هند حکومت د کوزو مومندو (اوارې  / هموارې د مومندو) سيمه، چې د افغانستان خاوره وه، په زور غصب کړه او د خپل نفوذ سيمه يې وگڼله  بيا هم  د بر مومنديا د غره د مومندو سيمه  د آزادې قبايلي سيمې په توگه  د هغوې د نفوذ تر ساحې بهر پاتې شوه.  په داسې حال کې چې د مومندو دگوشتې سيمه تل دډيورنډ د تپل شويې ليکې پورې غاړه  د افغانستان خاوره پاتې شويده.
په هند باندی د انگریزانو د حاکمیت  په ختميدو سره  پاکستان ، چې  ځان په اوله درجه اسلام پال او بيا د انگلیسانو وارث هم گڼي، نه يواځې دا چې د کوزو مومندو سيمه  افغانستان ته ورستنه نکړه، بلکې پدې وروستيو کلونو کې يې د بر مومند په آزاده قبايلي سيمه کې هم  د خپل نفوذ ساحه پراخه کړه، چی دا موضوع له ډیرو نورو موضوعگانو سره د افغانستان او پاکستان تر منځ ډیره غټه کشاله شوی ده.‏  
مونږ  د افغانستان په گوشتې باندې د پاکستاني پوځیانو دغه  څرگند او بيشرمانه تيرې د افغانستان  د خاوری پر تمامیت  بربنډ تيرې او ستر خطرگڼو.‏  پاکستان  بايد د افغانانو د تير تاريخ نه چې د نړۍ ستر طاقتونه يې په گونډو کړي، درس واخلي، او د افغانستان  د خاورې دلاندې کولو هر راز خیالونه  او مقاصد له سره وباسي .
مونږ  دلته د امریکی په شمالی کلیفورنیا کی  ميشت افغانان هم د پاکستاني پوځ دغه تیرې په کلکه غندو او ډاډ لرو چې د کابل د اوسنۍ ادارې  د بې  تفاوتۍ او يا  پردې تر شا د لوبو او سازشونو سره­ سره زمونږ باتور او په هيواد مين ولس به لکه د پخوا په شان  په يووالي سره  د هيواد په خاوره  دهر راز تیري مخنيوې وکړي .‏  

په درنښت
په شمالی کلیفورنیا کی د افغاني کلتوري ټولنې دمشرتابه ډله
د ۲۰۱۳ کال د می د میاشتی څلورمه نيټه