پنجشېر هم د ولايتي سيالۍ منځلوبې ته لاره پيدا کړه
27.09.2010 15:13کابل ( پژواک د تلې ٥مه ٨٩) : د افغانستان د کرکټ بورډ په نوښت په کابل کې د پيل شويو ولايتي سياليو په لړ کې نن د پنجشنېر لوبډلې کاپيسا ته په ماتې ورکولو سره ددغو سياليو دويم پړاو ته لاره پيدا کړه.
د ٢٤ ولايتونو په ګډون د کرکټ دغه سيالۍ په کابل کې د کرکټ د ځوانانو په لوبغالي کې پيل شوې دي .
د کرکټ بورډ د تخنيکي چارو مسوول هستي ګل عابد د تلې په ٥ مه، پژواک خبري اژانس ته وويل چې د پنجشېر لوبډلې پچه وګټله او لومړى يې پخپله لوبه وکړه.
هغه زياته کړه، چې د پنجشېر لوبډلې په ٢٠ اوورونو کې د لسو لوبغاړو په سوځېدو ١١٦ منډې جوړې کړې او کاپيسا ته يې ١١٧ منډې هدف وټاکه.
د نوموړي په وينا، د پنجشېر له لوري يواځې جاوېد ښه لوبه وکړه او ٢٢ منډې يې جوړې کړې، د کاپيسا له لوري صابر درې مخالف لوبغاړي وسوځول.
عابد وايي، چې د کاپيسا لوبډلې دغه هدف ترلاسه نه کړاى شو او ټوله لوبډله يې په ١٠٩ منډو وسوځېدله .
د نوموړي په وينا، د پنجشېر له لوري شېر رحمن تر ټولو ښه لوبه وکړه او درې مخالف لوبغاړي يې وسوځول.
په دې ګروپ کې پنجشېر د دوو لوبو له ګټلو سره د روانو سياليو دويم پړاو ته لاره پيدا کړه، له دې مخکې پرون پکتيا هم دويم پړاو ته لاره پيدا کړې وه.
نن له غرمې وروسته د کندوز او کاپيسا لوبډلو ترمنځ لوبه ترسره کېږي.
په دې سياليو کې د ٢٤ ولايتونو لوبډلې په اتو ډلو وېشل شوي او په هره ډله کې درې لوبډلې شاملې دي .
ددې سياليو مالي لګښت د اتصالاتو مخابراتي شرکت او د سوپريم په نامه يوه لوژستيکي کمپنۍ ورکوي.