لوستونکي: د افغان وطن مشرۍ لپاره محمود خان غوره دی

د ټول افغان.کام په هغه ټولپوښتنه کې چې دا دوه اونۍ په ليکه وه لوستونکو د پښتونخوا ملي عوامي ګوند مشر او د خان عبدالصمد خان زوی محمود خان اڅکزی د افغانانو د مشرۍ لپاره غوره بللی دی.

په هغه ليست کې چې د اته کسانو نومونه ليکل شوي وو او ۱۲۲۸ کسانو رايه کارولې ده محمود خان ۲۸٪ رايې او ورپسې د حزب اسلامي افغانستان مشر ګلبدين حکمتيار چې دا مهال د افغان دولت ضد په وسلواله جګړه بوخت دی ۱۷٪ رايې اخيستي دي.

د دولت مشر حامد کرزي او د دولت مخالفې وسلوالې ډلې (طالبانو) مشر ملا محمد عمر هر یو ۱۲٪ رايې اخيستي دي چې د ټول افغان د لوستونکو په منځ کې د دواړو د محبوبيت په کموالي دلالت کوي.

خو د محبوبيت رښتيني ټيټه کچه د پاکستان د جمعيت علمای اسلام د مشر مولانا فضل الرحمان په برخه وه چې په ۱۲۲۸ رايو کې یې يوه رايه هم نه ده اخيستې.

د ټولپوښتنې پايله دلته لوستلی شئ

داسې ښکاري چې په ټولپوښتنه کې د ډېرو لوستونکو د خوښې کانديد نه نو ځکه ۲۱٪ لوستونکو ويلي دي چې په ليست کې د ۸ کانديدانو څخه یې یو کانديد هم د افغان وطن د مشرۍ لپاره خوښ نه دی، په دې لړ کې د تبصرو په برخه کې ځينو د ډاکتر اشرف غني احمدزي او ځينو نورو بيا د افغان سوسيال ديموکرات ګوند د مشر انورالحق احدي نوم ياد کړی دی.

د محمود خان اڅکزي په اړه يو تبصره کونکی په ټول افغان.کام کې ليکي چې ((ترټولو ښه مشرد پښتنو دپاره محمود خان اڅكزى كيداى شي چې هم دپښتونوالئ په مواصفاتو ښكلې دى هم سياسي پوهه لري اوهم يې عملاً ثابته كړيده چې په ټولو افغانانو كه لردي كه بريوشان خوږيږي)).

د محمود خان اڅکزي پېژندنه

ټولې رايې په لاندې ډول دي:

نوم	انځور	رایې	سلنه
محمود خان اڅکزی (د پښتونخوا ملي عوامي ګوند مشر)		۳۴۶	۲۸٪
يو هم نه (د هغه خلکو رايې چې په ليست کې د خوښې کانديد نه و)		۲۵۵	۲۱٪
ګلبدين حکمتيار (د حزب اسلامي مشر)		۲۱۴	۱۷٪
ملا محمد عمر (د طالبانو مشر)		۱۵۳	۱۲٪
حامد کرزی (د افغانستان ولسمشر)		۱۵۲	۱۲٪
اسفنديار ولي خان (د عوامي ملي ګوند مشر)		۴۴	۴٪
ډاکتر فاروق اعظم (دا مهال د افغانانو ترمنځ د تفاهم د راوستلو د يوې ټولنې مشر)		۴۱	۳٪
برهان الدين رباني ( د جمعيت اسلامي مشر)		۲۱	۲٪
مولانا فضل رحمان (د جمعيت علمای اسلام د ګوند مشر)		۰	۰٪