په انټرکانټننټل سيالۍ کې د افغانستان برخليک

افغانستان له یو کال راهيسي د کرکټ د نړيوالې شورا د لويو وچو يا انټرکانټننټل په لوبو کې لوبه کوي چې شپږ نور هېوادونه (زيمبابوی، سکاټلينډ، ايرلينډ، کينيا، کاناډا، او هالينډ) هم په کې شامل دي. په دې سيالۍ کې چې هر هېواد شپږ لوبې کوي دا مهال افغانستان په دويم مقام دی او دوه لوبې یې پاتې دي. دوه نورې لوبډلې چې د دې سيالۍ د ګټلو او له یو لک څخه د ډېرو ډالرو لاسته راوړلو چانس لري سکاټلينډ او زيمبابوی دي. د افغانستان چانس څومره دی چې دا سيالي وګټي؟

افغانستان تر دې مهال څلور لوبې کړي دي او دوه لوبې ورته پاتې دي چې یوه يې د اګست په ۱۱مه نېټه د سکاټلينډ سره په سکاټليند او بله یې د کينيا سره د دې هېواد په پايتخت نيروبي کې د اکتوبر په دويمه نېټه ده. افغانستان په څلورو لوبو کې له ۸۰ نمرو ۵۷ نمرې لاس ته راوړي دي او چانس لري چې د پاتې دوه لوبو ۴۰ نمرې د دې لوبو په ګټلو لاس ته راوړي او د سيالۍ پايلوبې ته - چې په اماراتو کې د نومبر په ۲۵مه نېټه ترسره کېږي - بريالی شي.

 سکاټلينډ چې تر دې مهاله د نمرو په جدول کې لومړی دی، په څلورو لوبو کې ۶۹ نمرې ترلاسه کړي او دوه نورې لوبې چې يوه یې د افغانستان او بله یې د زيمبابوی سره ده لري چې کولای شي په ګټلو یې خپلو نمرو ته ۴۰ نورې نمرې هم ورزياتې کړي.

زيمبابوی بيا درې نورې لوبې لري. په تېرو درې لوبو کې یې ۴۳ نمرې ترلاسه کړي او د نمرو په جدول کې دا مهال په درېم نمبر ولاړ دی. زيمبابوی چانس لري چې که پاتې درې لوبې وګټي، ۶۰ نورې نمرې خپلو نمرو ته ورزياتې کړي.

له پورته حسابه دا معلومولی شو چې افغانستان بايد پاتې دوه لوبې وګټي او د هرې لوبې د شلو نمرو د لاسته راړولو کوښښ وکړي، که نه پايلوبې ته وتل به یې سخت وي ځکه چې سکاټلينډ او زيمبابوی دواړه ډېر ښه چانسونه لري چې پايلوبې ته بريالي شي.

که افغانستان له پاتې دوه لوبو پوره نمرې لاس ته راوړي نو ټولې نمرې به یې ۹۷ ته وخېژي، په داسې حال کې چې که سکاټلينډ یوه بله لوبه (چې زيمبابوی سره یې لري) وګټي او ټولې نمرې یې واخلي نو نمرې به یې ۸۹ ته لوړې شي که دواړه وګټي نو نمرې به یې ۱۰۹ ته پورته شي.  د سکاټلينډ او زيمبابوی په لوبه کې به یې یوه لوبډله ګټي، که زيمبابوی یې وګټي او پاتې دوه لوبې له ايرلينډ او کاناډا څخه هم وګټي نو نمرې به یې  ۱۰۳ ته لوړې شي، خو که یوه هم بايلي نو نمرې به یې ۸۳ ته لوړې شي.

سيالي خورا سختې مرحلې ته ننوتې ده او افغانستان د پايلوبې د وتلو لپاره دوه مهمې لوبډلې (سکاټلينډ او کينيا) وهل په کار دي، که یوه لوبه هم وګټي او يا د هرې لوبې پوره شل نمرې خپلې نه کړي نو بيا د سکاټلينډ او زيمبابوی د لوبډلو چانس ډېرېږي چې په اماراتو کې پايلوبه وکړي.

بايد يادونه وکړم چې د لوبې د ګټلو تر څنګ په لومړۍ پاڼۍ کې مخکې کېدل هم خورا اړين دي ځکه چې د لوبې ګټل ۱۴ او په لومړۍ پاڼۍ کې مخکې کېدل ۶ نمرې لري. د ټولو ۲۰ نمرو لاسته راوړلو لپاره په لومړۍ پاڼۍ کې مخکې کېدل او لوبه ګټل اړين دي.

تر اوسه افغانستان لاندې هېوادونو سره لوبې کړي دي او ټولې ۵۷ نمرې لري: