دکامې دياد غونډې لنډ راپور!

بلال شينوارى 13.11.2009 13:15

دننګرهار دکامې په ولسوالۍ کې داستاد محمداصف صميم په نوښت او هلوځلو دټولمنلي استادپوهاند ډاکتر مجاور احمدزيار او دوياړلي خوږژبي شاعر پيرمحمد کاروان ياد غونډه جوړه شوه دغونډې لپاره داستاد صميم بڼ ټاکل شوې و او دوړاندې نه دټاکل شوي مهال ويش له مخې غونډه دسهار په لسو پجو دقران عظيم الشان په څو مبارکو ايتونو پيل شوه وروسته داستاد صميم تره استاد عبدالحليم دکامې دسپين روبو په استازولۍ دغونډې ګډونوالو ته ښه راغلاست ووايه بيا دليکوال او تاريخ ليکوونکي محمدحسن ولسمل دغونډې پرارزښت اونږدې خبرې وکړې بيا استاد محمداصف صميم هم لنډې خو له ارزښته ډکې خبرې وکړې او دپوهاند زيار او پيرمحمد کاروان پر ادبي هلو ځلو رڼا واچوله بيا دننګرهار داطلاعاتو او کلتور ريس اورنګ صميم دغونډې په تړاو لنډې خبرې وکړې وروسته دکابل پوهنتون استاد لال پاچا ازمون دپښتوژبې دغنامندۍ په لار کې داستاد زيار پر ګالليو زحمتونو او دغه راز دهغه پر راتلونکو کارونو رڼا واچوله تر ازمون وروسته دګوربت مجلې بنسټګر حفيظ الله غښتلي هم لنډې خبرې وکړې او د دا ډول غونډو جوړول يې ارزښتناک وبلل بيا دکابل پوهنتون استاد او دسياسي چارو کارپوه محمداسمعيل يون خبرې وکړې ويې ويل چې استاد زيار دپښتو ژبې لپاره درياضي په څير دقيق فورمولونه ايجاد کړي چې انکار ترې نه شي کيداې بيا لندن ميشتي شاعر او ليکوال افضل ټکور دتليفون پر ليکه له لندنه ددې غونډې دجوړيدو په اړوند دتليفون پر خورا خرابه ليکه لنډې خو ارزښتمنې خبرې وکړې بيا دواړو ښاغلو استاد زيار او درويش دوراني او دغه راز يون او ازمون ته داعزاز لونګۍ ورپه سر شوې بيا استاد زيا ر او پيرمحمدکاروان هم لنډې خو علمي خبرې وکړې او ددا ډول غونډو جوړلو يې دوې او ددوې په څير دنورو دحوصلو په لوړولو او پښتو ژبې ته دلا ډير کار کولو دژمنتيا لپاره ګټورې وبللې دغونډې تر لومړۍ برخې وروسته چې دويناو لپاره ځانګړې شوې وه دويمه برخه چې دمشاعرې لپاره بيله شوې وه دپيرمحمد کاروان له لورې په شعر ويلو پيل شوه ددغوندې ددريځ چارې واړه خو په تول پوره عبدالله نظامي پرمخ بيولې په مشاعره کې لال پاچا ازمون،عزت الله ځواب،شيرحسن کمالزي،ملوک رغون،اسدالله لاروي ،ببرک مياخيل،ډاکتر رودوال، شفيع الله تاند،هارون ناصري او ګنو نورو زلموشاعرانو خپل شعرونه واورول غونډه داستاد صميم او قاري عبداله له لورې پر چمتو شوې غرمنۍ پاې ته ورسيده ،تر غرمې وروسته دمازيګر پر څلور بجو دغونډې ګډونوالو دکامې پله ته په ورڅيرمه درې لارې کې دننګرهار دګمرک ريس پر شخصي لګښت دجوړ شوي څلي پرانسته وشوه په دې څلي کې دکامې دفرهنګي سټو لکه محمد موسې شفيق،ديني سټو لکه مراد علي صاحب زاده او دغه راز جهادي سټو لکه محمود زيرک يادونه شوې وه ،داستاد زيار اوپيرمحمد کاروان ياد غونډې ته دکونړ،لغمان او ننګرهار پر فرهنګيانو سربيره دپلازمينې کابل،خوست ،ګرديز،وردګو او کندهار نه فرهنګيانو برخه اخيستې وه