اوسنی حکومت په دوو مياشتوکې اس چاغوي

په تيروکلونوکې زموږ له هيواد سره په ميلياردونو ډالره مرسته وشوه چې د دغو پيسوډيره لږه برخه په هيواد کې د بيارغونې ، ودانيزوچارو، ښوونيزه ،روغتيايي اوپرمختيايي برخوولګيده . خو د دغو پيسوډيره برخه بيرته همدغومرسته کونکوهيوادنوپه يوه اوبل نامه بيرته ورسره يووړه او يو څه يې د نادولتي موسسو له لوري د لکسونو کورونوپه کرايو ،لوړومعاشونواونورومزوچړچو ولګيدې اوپه دې مزوچرچوکې ډيری حکومتي چارواکوهم ښه غوړه ونډه اخستې او دهرچاچې د دغوپيسو په بډه وهلووس شوی نودريغه يې نه ده کړې خو هغه متل دی چې غل اوسه خوپه انصاف ، دوي انصاف هم نه دی کړی ، له بده مرغه حکومت په دې اوه اته کلونوکې دهيواد بيارغونې او د خلکو د اقتصادي وضعيت ښه کولوته هيڅ پام ونکړاوچارواکي يوازې دخپلوجيبونو د ډکولوپه فکرکې و،اوان ډيری چارواکي په خپل هيوادکې په مساپری کې ژوندکوي اوکورنۍ يې په هغه دوهم هيوادکې اوسيږي چې ورته تردې ډيرګران دی اوهسې د چکرلپاره هم خپل هيواد ته نه راځي ځکه چې د دې وطن اب وهواپربده لګيږي !!
په تيرو اتوکلونوکې چې په لويوښارونوکې کومې لويې اوښکلې ودانۍ جوړې شوې ، دا د شخصي اوخصوصي شرکتونوکاردی ، حکومت په دې موده کې يوازې د کابل ښارسړکونه هم ونه رغول د بيلګې په توګه هغه څلويښت متره سړک چې له هوايي ډګرڅخه ترکوټه سنګي اوپل سوخته پورې يې د جوړولو کاردا درې کاله وړاندې پيل شوی له تيرکال راهيسې يې کارپه ټپه ولاړ و اوهمداراز د کوټه سنګي او کمپنۍ ترمنځ سړک چې په تيرواتوکلونوکې په ځلونو د هغې د جوړيدوژمنې شوې دي او په څو تيرو کلونو کې چې څو ښاروالان بدل رابدل شول هر يوه چې کار پيل کړی د دې سړک د جوړولو ټينګه ژمنه يې کړې خو دا ټولې داسې ژمنې وې لکه په کنګل يې چې وليکې اولمرته يې کيږدې. خو کله چې د کانديدانو ټاکنيزه مبارزه پيل شوه دغه يوشميرسړکونه اونورو دغه رازنيمګړو پروژو کارپيل شو.دا نومالومه نه ده که يې کاربشپړشواوکه نه يوازې به دومره وي چې خلکوته به وښودل شي چې اوسنی حکومت دومره ستاسوپه غم کې دی اوکاردرته کوي .
خواوس ټول په دې ښه پوهيدلي چې اوسني حکومت چې په تيرواوواتوکلونو کې يې دغه کارونه ترسره نکړل او په دې نامه په ميليونونو ډالر په بډه ووهل شول اوس په څه کمو دوو مياشتو کې اس چاغوي . که اوسني چارواکي بياهم د تيرپه شان غواړي چې د خلکوسترګوته خاورې وشيندي دا به له دې کړيدلې اولس سره جفا اودوکه وي که څه هم چې خلک اوس له پخوا زيات په هر څه پوهيدلي او هر څول ښه پيژني . نورخلک له تشوشعارونوپه تنګ شوي او نه پوهيږي چاته رايه ورکړي دوي چې له هرچاسره د ملګرتيا لاس ورکړی هغه په سره سيخ داغلی نه پوهيږي چې د ولسمشرۍ په دې يوڅلويښتوکانديدانوکې چې د ډيرو نوم هم له دې وړاندې چا نه واوريدلی کوم يو به په خپلوغوړوژمنوکې ريښتونی اوصادق وي او کوم يو به په اخلاص کاروکړي .

د ليکوال څو نورې لیکنې

• ښځه او کورنی جوړښت
• دټاکنيزوسياليوتود بازاراودخلکوسوړهرکلی
• دمامادوکان