ترکیه کې له ۲۴۸ ساعتونو وروسته یوه نجلۍ له کنډوالو څخه ژوندۍ واېستل شوه
په ترکیه کې مقامات وايي ژغورونکو د خونړۍ زلزلې څخه ۲۴۸ ساعتونه وروسته یوه ۱۷ کلنه نجلۍ له کنډوالو څخه ژوندۍ را وایستله.
اتصال تلویزیوني خپرونه
په دې خپرونه کې د چارواکو، شنونکو او خلکو سره، مهمې کورنۍ او نړیوالې سیاسي، اقتصادي او ټولنیزې مسئلې څېړل کېږي. دغه نیم ساعته خپرونه له یکشنبې تر پنجشنبې، هر مازدیګر د کابل پر شپږنیمې بجې، په ژوندۍ بڼه خپرېږي.
د اوکراین چارواکي وایي روس نن بیا په لسګونو میزایل ور ویشتلي دي
واشنګټن ــــ په اوکراین کې له څه کم یو کال راهیسې د روانې جګړې په ترڅ کې روسي ځواکونو نن بیا پر دې هېواد د لسګونو میزایلو برید کړی او په بېلابېلو سیمو کې یې خپل هدفونه په نخښه کړي چې لږ تر لږه یو کس پکې وژل شوی دی. د اوکراین چارواکو د پنجشنې- زیارت په ورځ رسنیو ته ویلي چې د اوکراین هوايي دفاعي ځواکونو د روس له 36 میزایلو څخه چې ور ویشتلي یې وو 16 یې دوی را غورځولي دي. د روس پوځ دا هوايي بریدونه په داسې وخت کړي چې ناروې د اوکراین لپاره د اووه اربه ډالرو په ارزښت د پینځه کلنې مرستې د پېکیج منظوري ورکړې ده. د اوکراین صدر ولادیمیر زلنسکي وایي د ناروې دا اقدام ناروې او اوکراین پیاوړي کوي او روس به د ټولو هغو کسانو په یووالي باندې قابو تر لاسه نه کړي چې ازادي یې خوښه ده. زلنسکي د وېډیو لینک له لارې د ناروې پارلمان ته وویل: "اوس تاسې یو داسې هیواد ته د اوږدې مودې د مالي ملاتړ لپاره ډېر ښه مثال وړاندې کوئ چې د خپلې ازادۍ او له نړیوالو اصولو سره سم د هر ملت د ژوند تېرولو د حق دفاع کوي". د اوکراین چارواکو خبرداری ورکړی دی چې کېدای شي روس په اوکراین باندې د خپل یرغل د کلیزې په را نیژدې کېدو سره د یو نوي طرز برید پیل کړي. صدر زلنسکي د چارشنبې- شورو په شپه پخپله وینا کې وویل دی ډاډه دی چې د اوکراین ځواکونو به د "حملو د بیا پیلولو" لپاره د روس هڅې ناکامه کړي. د ملګرو ملتونو د جنرل اسمبلۍ یوه ځانګړې غونډه کې به راتلونکې اوونۍ د یو قرارداد مسودې ته رایه ورکول کېږي چې په اوکراین کې د دښمنۍ د پای ته رسولو او د داسې امن غوښتنه کوي چې د اوکراین د خودمختارۍ، ازادۍ، یووالي او مځکنۍ بشپړتیا ډاډ ورکړي. تمه کیږي چې جنرل اسمبلۍ به دغه قرارداد منظور کړي ځکه چې دا د فرورۍ په 23مه په اوکراین باندې د روس د یرغل د کال تر پوره کېدو یوه ورځ مخکې کېږي. د دې قرارداد په مسوده کې پر ملګرو ملتونو او غړو هیوادونو ږغ شوی چې د روس او اوکراین تر منځ سولې ته د رسېدو لپاره د سفارتي هڅو ملاتړ وکړي. ملګرو ملتونو په دې قرارداد کې له روسه هم په ټینګار سره غوښتي چې د اوکراین پر ملکي ودانیو بریدونه ودروي او سمدستي له اوکراین څخه خپل ټول پوځي ځواکونه وباسي. د ملګرو ملتونو جنرل اسمبلۍ تر دې مخکې هم ځینې قراردادونه منظور کړي دي چې پکې د اوکراین د ازادۍ او مځکنۍ بشپړتیا ملاتړ شوی او د روس په پوځي یرغل باندې پکې نیوکې شوې دي. د امریکې د دفاع وزیر لویډ اسټن د چارشنبې- شورو په ورځ د روسي ځواکونو خلاف په جګړې کې د اوکراین پیل کوونکي جنګي امکانات په ښه توګه انځور کړل. ښاغلي اسټن په بروکسل کې د نېټو د دفاع وزیرانو تر غونډې وروسته خبریالانو ته وویل: "زه فکر کوم دوی به د جګړې په ډګر کې د پام وړ بدلون او نويو شروعاتو لپاره ښه موقع ولري". اسټن وویل څنګه چې د نېټو هیوادونه اوکراین ته وسله لېږي، د امریکې په مشرۍ پوځي اتحاد د دې نوې وسلې د کارولو لپاره پوځیانو ته د روزنې ورکولو اراده لري. یادونه:- د رپوټ ځینې مواد له اسوسیېټیډ پریس، اې ایف پي او رویټرز څخه اخیستل شوي دي.
امریکا د ملګرو ملتونو هغه راپور تائید کړ چې د القاعده نوی مشر په ایران کې دی
د امریکا د متحدو ایالتونو حکومت د ملګرو ملتونو هغه راپور او ارزونه تائیدوي چې وايي د القاعده نوی مشر سیف العدل په ایران کې دی.
پاکستان: د سيند صوبې له زندانونو تر 200 زيات خوشي شوي افغانان خپل هېواد ته لېږل شوي
په افغانستان کې واکمنو طالبان په کراچۍ کې کونسل جنرل وايي، د سیند صوبې د زندانونو/جېلونو څخه نور د 200 پورې افغانان خوشي شوي او افغانستان ته لېږل شوي دي.
د کوټې نه پېښور ته په تلونکي رېل ګاډي کې چاودنه شوې، مرګ ژوبله یې اړولې
د پاکستان د بلوچستان صوبې مرکزي ښار کوټې نه پېښور ته تلونکي اورګاډي کې چاودنه شوې د چارواکو په وینا په چاودنه کې يوه ښځه مړه او پينځه تنه نور مسافر ژوبل شوي خو ځايي ميډيا د ژوبلو شمېره نهه ياده کړې ده.
نیډ پرایس: که طالبان د القاعده خلاف اقدام ونه کړي امریکا خپله د دې کار توان لري
واشنګټن ــــ د امریکې د بهرنیو چارو وزارت وایي طالبانو ژمنه کړې چې د القاعده په ګډون به په خپله خاوره کې بهرنۍ ترهګرې ډلې د فعالیت لپاره نه پرېږدي، وایي که طالبان د القاعده خلاف اقدام ونه کړي امریکا د دې وړتیا لري چې خپله دا کار وکړي. د بهرنیو چارو وزارت ویاند نیډ پرایس د شورو- چارشنبې په ورځ خبري غونډې ته په وینا کې وویل، طالبانو په شخصي او ولسي کچه ژمنې کړې دي چې د افغانستان خاوره به هغو کسانو ته د کارولو لپاره نه پرېږدي چې د امریکې په ضد دسیسې جوړوي. نیډ پرایس وایي د القاعده مخکیني مشر ایمن الظواهري ته په کابل کې خوندي پناه ځای ورکړل شوی وو او د تېر کال په جولای کې نړۍ ولیدل چې امریکې په ډرون برید کې و واژه. پرایس د ولسمشر جوبایډن له خولې وویل امریکا به چاته د داسې ګواښونو او خطرونو د را پورته کېدو اجازه ور نه کړي چې امریکې، د امریکې د ملګرو او متحدینو ته په چېلنج بدل شي، وایي که داسې څه کېږي نو د دا ډول ګواښونو د مخنیوي لپاره به په کلکه عمل وکړي: "که طالبان [د القاعده د ځپلو لپاره] د خپلو کړو ژمنو د پوره کولو توان ونه لري یا نه غواړي چې پوره یې کړي نو موږ تیار یو او د دې توان لرو چې پخپله یې خلاف ګامونه واخلو". طالبانو لا تر اوسه د امریکې د بهرنیو چارو وزارت د ویاند دې تازه څرګندونو ته څه جواب نه دی ویلی او نه یې هم په کابل کې د ایمن الظواهري وژل تایید کړي دي، خو په افغانستان کې یې د خپلې واکمنۍ په مهال د القاعده د غړو شته والی رد کړی دی. په افغانستان کې د القاعده شبکې د غړو د شته والي او فعالیت په اړه اندېښنې هغه وخت زیاتې شوې چې امریکې تېر کال په کابل کې په ډرون برید کې د القاعده د مشر ایمن الظواهري د وژنې خبر ورکړ، خو طالبانو- که څه هم دا برید منلی- خو د ظواهري وژنه یې په دې برید کې نه ده تایید کړې. د امریکې د بهرنیو چارو وزارت ویاند نیډ پرایس وایي، د امریکا ارزونه د ملګرو ملتونو له اندازې سره برابره ده چې وایي سیف العدل د القاعده شبکې نوی مشر ټاکل شوی او دا مهال په ایران کې دی. نیډ پرایس یو ځل بیا پر ایران کلکې نیوکې وکړې او تور یې پورې کړ چې امریکې مخکې هم د ترهګرو ډلو د ملاتړ په تور د ایران خلاف ګامونه اخیستي خو وایي دا نوې اشاره ده چې د القاعده نوي ممکنه مشر ته یې پناه ورکړې ده: "کله چې هلته د هغه [سیف العدل] د موجودیت خبره راځي، القاعده ته د خوندي پناه ځای ورکول د ترهګرۍ لپاره د ایران د پراخ ملاتړ، په منځني ختیځ او له هغه بهر د ناارامۍ جوړوونکو فعالیتونو یو بل مثال دی". ایران تر اوسه په رسمي توګه د ملګرو ملتونو او د امریکې د بهرنیو چارو وزارت دغو دعوو ته څه جواب نه دی ویلی چې ګواکې د القاعده نوی مشر سیف العدل په ایران کې دی او نه هم القاعده ډلې هغه د خپل نوي مشر په توګه اعلان کړی دی. ملګرو ملتونو پخپل یو تازه رپوټ کې ویلي وو، داسې ښکاري چې په کابل کې د امریکې په ډرون برید کې د القاعده ډلې د مخیکني مشر ایمن الظواهري تر وژل کېدو وروسته د دې ترهګرې ډلې مشري په خاموشۍ سره په ایران کې د هغه ځایناستي ته سیف العدل ته سپارل شوې ده. د ملګرو ملتونو په یو نوي رپوټ کې چې د دې ادارې د یو غړي هیواد د استخباراتو په بنیاد جوړ شوی او د فرورۍ پر 13مه خپور شوی، ویل شوي وو چې 62 کلن سیف العدل اوس د القاعدې مشري او د اوس لپاره دې ډلې ته د دوام ورکولو استازیتوب کوي. سیف العدل د القاعده ډلې د پخواني مشر اسامه بن لادن د امنیت چارې سمبالولې او د هغو الوتکو تښتوونکو په روزنه کې یې هم لاس درلود چې د 2001م کال د ستمبر پر 11مه یې د امریکې پر نړیوال تجارتي مرکز او پېنټاګان ترهګریز بریدونه کړي وو. امریکې د هغه پر سر 10 میلینه ډالر اعلان کړي وو.
د ائ ایم ایف اؤ پاکستان انلاین خبرې نن بیا پیل کیږي
ټاکل شوې دپاکستان اؤ نړیوالې مالیاتي ادارې ائ ایم ایف ترمنځ دنهمې ارزونې ورچویل خبرې اترې نن د زیات په ورځ یو وارې بیا کیږي. دپاکستان دخزانې وزارت هیله ښودلې ده چې تر راتلونکې اوونۍ به دپور دپاتې پیسو ترلاسه کیدو لپاره دپاکستان اؤ ائ ایم ایف ترمنځ د مامورینو په کچه تړون ترسره شي. خو دپاکستان دخزانې پخوانی وزیر حفیظ پاشا وایي که دپاکستان اؤ ائ ایم ایف تړون وشي نو بیا به هم پاکستان له اقتصادي ستونزو ونه اوځي. دائ ایم ایف اؤ پاکستان ترمنځ دشپږ بیلینه ډالرو دپور دپاتې پیسو لپاره دنهمې ارزونې ورچول نني مذاکرات په داسې حال کې کیږي چې پاکستان دائ ایم ایف دشرطونو په اساس دتېلو بیعې لوړې کړي اؤ هم یې د170 اربو روپو د نوؤ تیکسونو لپاره وړوکی بجټ یوه ورځ وړاندې پارلیمان ته وړاندې کړی دی. پاکستان دائ ایم ایف دشرطونو منل کیدو په اړوند مسوده په تېرو ورچویل خبرو کې دائ ایم ایف چارواکو ته وړاندې کړې وه خو ائ ایم ایف ددې مسودې دجاج اخستو لپاره تر ننۍ (زیارت/پنجشنبه) ورڅې مهلت غوښتی ؤ. دپاکستان د خزانې وزارت سرچینو هیله ښودلې ده چې په ننیو خبرو اترو کې به معامله راجوړه شي اؤ دائ ایم ایف سره به د مامورینو په کچه تړون راتلونکې اوونۍ پورې ترسره شي. پاکستان او ائ ایم ایف په 2019م کال کې پر شپږ اربه ډالرو پور سره جوړ شوي وو، خو پر مالیاتي پالیسۍ د اختلاف له کبله یې اسلام اباد ته پر یو ځای تر یو ارب ډالر د زیاتو پیسو له ورکولو ډډه کړې وه. دا مهال پاکستان هڅه کوي چې د ورپېښو اقتصادي جنجالونو نه د ځان ویستلو لپاره دائ ایم ایف نه ورپاتې 1.3 اربه ډالر ترلاسه کړي خو ائ ایم ایف ورته ددغو پیسو ورکولو لپاره یو شمیر شرطونو ایښي دي چې هغې کې دتوانایۍ په څانګه کې رعایتونه ختمول اؤ د ټیکسونه لمنه پراخول شامل دي. دپاکستان دخزانې پخوانی وزیر وایي دی فکر نه کوي چې ائ ایم ایف سره په تړون کیدو به پاکستان داقتصادي جنجالونو څخه اوځي. دپاکستاني ټيلي ويژن جیو نیوز په یو پروګرام کې دخبرو په مهال حفیظ پاشا ویلي دي پاکستان درې،څلور ګامونه په یو ځای اخستي دي ،افراط زر به په څرګند ډول سیوا کیږي. هغه وویل کومې برخې یا سیکټرونه چې ټیکس نه ورکوي ،حکومت باید په هغوی ټیکسونه لګولي وؤ خو دا چې په ټولو یې یو شان ټیکسونه سیوا کړل، دې ګام سره به ګراني په بیړه سیوا شي اؤ دګرانۍ کچه به لږ تر لږه 35 فیصدو ته ورسیږي. نوموړي زیاته کړې ده چې که حکومت داکتوبر دمیاشتې نه ګامونه اخستي وؤ نو دای ایم ایف پروګرام به پځای پاتې شوی ؤ. دحفیظ پاشا په وینا تر ستمبر میاشتې پورې پاکستان د ای ایف ایف په پروګرام کې ؤ خو تر دغه وخته باور سیوا نه شو اؤ دباور نه سیوا کیدو علت د بهرنیو اسعارو د ذخیرو غورځیدل دي.
امریکا: که طالبان د القاعده په وړاندې په خپلو ژمنو عمل ونکړي، موږ به اقدام وکړو
د متحدو ایالتونو د بهرنیو چارو وزارت ویاند د چهار شنبې په ورځ فبروري ۱۵ (سلواغې ۲۶) وویل که طالبان په افغانستان کې د القاعده په وړاندې په خپلو ژمنو عمل ونکړي، امریکا ددې وړتیا لري چې خپله لاس په کار شي.
د ټیکسونو لوړېدو سره به پاکستان کې د کومو شیانو بیې لوړې شي؟
په پاکستان کې مرکزي حکومت دبجټ نه وړاندې د350 څخه په زیاتو شیانو د سیلز ټیکس کچه د17 فیصدو څخه 18 فیصدو ته سیوا کړې ده اؤ په سګریټو لګیدلې مالیا یې هم دنیمایي نه زیاته سېوا کړې ده چې ورسره به د ورځنۍ اړتیا دګڼ شمیر شیانو بیې په بره لاړې شي. دامدنۍ مرکزي بورډ یا ایف بي ار د اضافه شوي سیلز ټیکس اؤ ایف ای ډي وصولي هم پیل کړې ده اؤ په دې اړه یې بیلابیلې اعلامیې خپرې کړې دي. دپاکستاني مطبوعاتو له مخې په ډبو کې بندو په ټولو شیانو دخرڅون ټیکس د17 نه 18 فیصدي ته لوړه کړل شوی چې له مخې به یې خوراکي تیل، بسکټ،دمیک اپ سامانونه،صابونونه،شیمپوان،ټوټ پیسټ،دماشومانو دلوبو شیان،چاکلیټونه ،نوډلز اؤ کریم ګرانیږي. ددې سیلز ټیکس سیوا کیدو له وجې به د ویښتانو د رنګ،لیپ ټاپونو،موبایل فونونو،ټي وي ګانو،ایل ائ ډیز،جوسرو،دحجامت دسامان اؤ سوونو نورو الیکټرونکس شیانو بیې په بره ځي. همدا شان د پرفیوم اؤ برانډډ عطرو ، دګاډو د شیمپوانو اؤ د ګاډو ځلولو د کریمو بیې به هم د سیلز ټیکس لوړولو سره سیوا کیږي. دپاکستان دخزانې وزیر ښاغلي اسحاق ډار د چهارشنبې په ورځ پارلیمان ته دنوؤ د170 اربو روپو دنوؤ ټیکسونو لګولو مني یا وړوکی بجټ وړاندې کړی دی. دعام بجټ نه وړاندې دا وړوکی بجټ وروسته له هغې حکومت مخې ته راوړی چې دپاکستاني روپۍ نرخ زیات وغورځېدو اؤ دپاکستان مرکزي بینک سره دبهرنیو اسعارو پرته ذخیره هم د دریوؤ اربو ډالرو نه په ښکته لاړه . په نهمه فرورۍ دپاکستان مرکزي بینک ویلي وؤ ددغه هیواد داسعارو ذخیره دتېرو نهو کالو اؤ دریوؤ میاشتو تر ټولو ټیټې کچې ته راغلې اؤ دا مهال پاکستان یوازې د دوؤ اربو،96 کروړو اؤ 30لکو ډالرو ذخیره په لاس کې لري. څېړونکي وایي پاکستان ته به راتلونکو پینځوؤ میاشتو کې د نهو ته تر لسو اربو ډالرو پورې بهرنۍ قرضې ستنول وي چې په ظاهره یې پاکستان د ستنولو توان نه لري. پاکستان د سقوط ګواښونو سره دمخ خپل اقتصاد سمبالولو په غرض نړیوالې مالیاتي ادارې ائ ایم ایف نه دپور دپاتې پیسو ترلاسه کولو هڅې کوي اؤ ایي ایم ایف ورته دشپږ بیلینه ډالرو د پور دپاتې پیسو ورکولو لپاره دټیکسونو دلمنې پراخولو اؤ په یو شمیر شیانو د رعایتونو ختمولو شرطونه ایښودي دي. تر دې دمخه حکومت دګیس ،بجلۍ اؤ پټرولو نرخونه هم سیوا کړي دي اؤ څېړونکي وایي چې ددې په نتیجه کې به دپاکستان دننه ګراني په راتلونکي وخت کې نوره هم زیاته شي
جرمني په افغانستان کې 'له ښځو سره د ښځو لپاره' د مرستې رسونې پروژه پيلوي
جرمني غواړي چې په افغانستان کې یو شمېر ځانګړې پراختیایي پروژې له سره پيل کړي. د جرمني د ډي پي اې خبري اژانس د راپور لهمخې برلین دغه اقدام لهدې سره سره کوي چې په افغانستان کې د ښځو پر کار او تعلیم د طالبانو د حکومت بندیزونه هماغسې پر خپل ځای دي. د جرمني د اقتصادي او پراختیایي همکاریو وزیرې اسفنیا شولزه (Svenja Schulze) ویلي، د دغو پروژو په عملي کولو کې "له ښځو سره او د ښځو لپاره" معیار په نظر کې نیول کېږي. د جرمني زوددویچه سایتونگ ( Süddeutsche Zeitung) ورځپاڼې د چهارشنبې په ورځ دغه خبر خپور کړ او پهکې راغلي، جرمني کولای شي افغانستان کې له ښځو سره مرسته وکړي. د جرمني حکومت وایي، تر هغو چې افغان ښځې په پروژو کې کار کولای شي، د هغوی لومړنیو خدماتو ته ژمن دي، ځکه د دوی په ټکو افغانستان کې دا چارې له ښځو د ملاتړ په برخه کې ګټورې دي. د جرمني د اقتصادي او پراختیایي چارو وزیرې په افغانستان کې د خپلو ځانګړو پروژو کار په تېره دسمبر میاشت کې وروسته تر هغې وځنډوه چې طالبانو په کورنیو او بهرنیو مؤسسو کې د ښځو پر کار بندیز ولګاوه. دغو بندیزونو د نړیوالو بنسټونو غوسه وپارله او لسګونه هغو په افغانستان کې خپلې چارې یا بشپړې او یا هم قسمي ډول و درولې. تر دغو بندیزونو وروسته د ملګرو ملتونو دوه لوړپوړي پلاوي کابل ته ولاړل، خو په ظاهره ونه توانېدل چې طالبان د دغو بندیزونو لرې کولو ته اړ کړي. د ملګرو ملتونو د بشري مرستو مشر مارټین ګریفیټس که څه هم تېره جنوري میاشت کې افغانستان ته له سفر وروسته وویل، له طالبانو یې د ښځو د کار په برخه کې ښې ژمنې ترلاسه کړي دي. ګریفیټس ویلي، تر هغو چې دغه ژمنې عملي نهشي، دوی باور نهشي پرې کولای. اوس د جرمني د اقتصادي همکاریو وزیرې اسفنیا شولزې د خپلو پروژو د کار د بیا پیل له اعلان سره هممهاله یو ځل بیا له طالبانو غوښتي چې د ښځو حقونو ته ژمن پاتې شي. نوموړې وویل، په افغانستان کې ناوړه بشري ناورین ته په کتو، جرمني باید د افغانانو ملاتړ ته ژمن پاتې شي. د جرمنې دغې چارواکې ویلي، که هېواد یې د افغانستان هغو سیمو کې خپلې پروژې ودروي چې ښځې پهکې کار کولای شي، په حقیقت کې دا د افغان ښځو کمزوري کول او هغوی ته سزا ورکول دي. خبر کې دا نهدي راغلي چې، د جرمني دا پراختیایي پروژې په کومو برخو تمرکز لري، خو تېر کال دغه هېواد دغو پروژو ته چې تر ډېره د خېر ښیګنې وې، دوه سوه میلیونه ډالره ځانګړي کړي وو.
پاکستان کې د تېلو نرخونه سېوا اؤ د نوو ټیکسونو لګولو وړوکی بجټ پارلیمان ته وړاندې کړل شو
دپاکستاني روپۍ د ارزښت غورځېدو له امله دپاکستان حکومت دپټرولو نرخ کې دیو لیټر پسر د22.20 روپو اؤ د ډيزلو نرخ کې د17.20 روپو داضافې اعلان کړی دی. حکومت په اقتصادي ناورین دقابو موندلو په غرض د170 اربو روپو دنوؤ ټیکسونو لګولو مني یا وړوکی بجټ هم قامي اسمبلۍ ته وړاندې کړی دی. دتیلو په نرخونو کې د نوې اضافې وروسته پاکستان کې دا وخت دیو لیټر پټرولو بیه 272 اؤ د دهایي سپیډ ډيزلو بیه 280 روپو ته رسېدلې ده. د لایټ ډيزلو نرخ کې 9 روپۍاؤ 68 پیسې اضافه شوې ده اؤ نوی نرخ یې 96 روپۍ اؤ68 پیسې تړل شوی اؤ اؤ دخاور تیل یو لیټر د12 روپو اؤ90 پیسو له اضافې وروسته 202 روپو اؤ73 پیسو ته رسېدلی دی. د خزانې وزارت دچهارشنې په شپه د تیلو نرخ کې د اضافې اعلامیه جارې کړې ده . تر دې وړاندې دچهارشنبې په ورځ د خزانې مرکزي وزیر اسحاق ډار وړوکی بجټ پارلیمان ته وړاندې کړی چې پکې په بیلا بیلو څانکو کې د نوؤ ټيکسونو لګولو وړاندیز شوی دی. ښاغلي اسحاق ډار ویلي چې دسیلز ټیکس دکچې 17 نه 18فیصدي ته د لوړولو تجویز دی اؤ په لګژري شیانو به 25 فیصدي ټيکس لګول کیږي. دخزانې وزیر ویلي د ورځني استعمال په شیانو غنمو،شیدو،هګیو اؤ غوښه به ټیکسونه نه لګول کیږي. دخزانې وزیر ویلي چې په موبایل فونونو به هم اضافي ټیکس لګول کیږي اؤ په سګریټو اؤ شربتونو هم د اضافي ټيکس لګولو وړاندیز شته. هغه ویلي دشربتونو په اصل نرخ به هم 10 فیصدي ټیکس لګول کیږي. د اسحقاق ډار وینا وه چې سیمټ به هم په یو کلو کې 50 پیسې ګرانولی شي. هغه وویل دبې نظیر انکم سپورټ پروګرام لپاره دمرستې 40 اربه روپۍ400 اربو روپو ته زیاتې کړل شوې دي. د تیلو نرخونو کې داضافې اؤ نوؤ ټیکسونو لګولو اقدام ته حکومت مخالفه ګوند پاکستان تحریک انصاف پخپل غبرګون کې دا په ولس دګرانۍ بم غورځول بللي اؤ ویلي یې دي دکله نه چې نوی حکومت راغلی نو پرله پسې په عوامو ګراني مسلط کوي. خو مرکزي وزیرانو خواجه سعد رفیق اؤ احسن اقبال بیا د پي ټي ایي بیان خندنی بللی دی او وایي دعمران خان په تیر حکومت ائ ایم ایف سره د شوي تړون نه سرغړونه وشوه،تیل د سیاسي ګټو لپاره ارزان کړی شول اؤ بې خرته بهرني پورونه واخستی شول چې دهغې اثرات اوس مخې ته راغلې دي اؤ حکومت سره له دې پرته بله چاره نه شته چې دائ ایم ایف شرطونو ته غاړه کښیږدي.
چین امریکايي ادارو ته د بالون د وېشتلو پر سر ګواښونه کړي
واشنګټن – چین د شورو یا چهارشنبې په ورځ وویل، دوی به د هغو امریکايي ادارو پرضد اقدامات وکړي چې د امریکا په ختیځو سمندري غاړو کې د چین د جاسوسۍ د مشکوک بالون په غورځولو کې ښکېلې دي. د چین د بهرنیو چارو وزارت ویاند وانګ وینبېن نور تفصیل ور نه کړ او دا یې هم و نه ویل چې دا به کوم اقدامات وي. چین ویلي، یاد بالون د هوا پېژندنې یو بالون وو چې په خطايۍ سره له خپل ټاکلي هدف څخه اوښتی دی او امریکا یې په دې تورنه کړې ده چې له اندازې یې زیات غبرګون ښودلی او هغه یې له F-22 جټ الوتکې څخه په میزایل ویشتی دی. د فیبرورۍ په څلورمه نېټه ددغه بالون له غورځولو سره امریکا په شپږو هغو چینايي ادارو باندې بندیزونه لګولي کوم چې د پېکنګ له هوايي او فضايي پروګرامونو سره تړاو لري. د امریکا د استازو جرګې په اکثرو وټونو سره د چین دا کار غندلی، د امریکا له ځمکنۍ بشپړتیا یې تیری بللی او دا یې د چین لخوا د خپلو استخباراتي معلوماتو د پټولو لپاره نړیوالې ټولنې ته د درواغجنو ادعاو هڅه بللې. د امریکا د بهرنیو چارو وزیر انټوني بلنکن هم پېکنګ ته خپل سفر لغوه کړ چې اکثرو ورته هیله درلوده چې د دواړو هېوادونو ترمنځ اړیکې چې د سوداګرۍ، بشري حقونو، تایوان او یو شمېر نورو مسلو له امله بې خونده شوې دي هغه به ورسره ښې شي. که څه هم چین دا رد کړې چې ګنې دا بالون یو پوځي وسیله وه خو لا تر اوسه یې دا نه دي ویلي، چې دا د حکومت د کومې ادارې یا کمپنۍ سره تړاو درلود. همدارنګه په جاپان کې د امریکا سفیر ویلي، چې امریکا ته د چین د بالون ننوتل د پېکنګ لخوا د یرغلیز چلند یوه برخه ده. بل پلو د جاپان د دفاع وزارت د نهې یا سې شنبې په ورځ ویلي، چې د ۲۰۱۹ کال راهیسې د جاپان په فضا کې لږ تر لږه درې الوتونکي څېزونه لیدل شوي دي چې په کلکه داسې باور وو چې دا به د چین د جاسوسۍ بالونونه وي. دوی ویلي، چې په دې یې نیوکې کړې وې او له پېکنګ څخه یې په اړه معلومات غوښتي وو.
م.م د روس په یرغل کې په میلیونونو اغیزمنو اوکراینیانو ته د ۵.۶ بیلینه ډالرو غوښتنه وکړه
واشنګټن – ملګروملتونو د روس په یرغل کې په میلیونونو اغیزمنو شویو اوکراینیانو ته د بشري مرستو لپاره د ۵.۶ بیلینه ډالرو غوښتنه وکړه. د بشري غبرګون او کډوالو د غبرګون تر نامه لاندې پلانونه د شورو یا چهارشنبې په ورځ پيل شول چې له یادو پيسو څخه به ۳.۹ بیلینه ډالره د هېواد دننه په ۱۱.۱ میلیون بې ځایه شویو کسانو او پاتې ۱.۷ بیلینه به له هېواد څخه په کډه شویو ۴.۲ میلیونه اوکراینیانو باندې ولګول شي کوم چې لسو اروپايي هېوادونو ته کډه شوي. په ملګروملتونو کې د بشري چارو لپاره مرستیال سکریټري مارټین ګرافیتس او د بیړنیو مرستو ناظم وویل، چې د ملګروملتونو ډلې هغو خلکو ته لومړیتوب ورکوي چې اوکرایني اړخ ته د جګړې له لومړیو کرښو سره نېږدې اوسېږي او له زیات خطر او سختیو سره مخ دي. هغه وویل، "تېره ورځ په ډینیپرو کې د ملګروملتونو کارکونکي په مرستو بار له شپږو ټرکونو سره ۲۰۰ کیلومټره لېرې په ډونیڅک سیمه کې دوو کلیو ته ولاړل کوم چې په جګړو کې سخت ځپل شوي دي." هغه زیاته کړه، "دا همدا اوس د جګړې توده سیمه ده. په خلکو هره ورځ توغندي ورېږي. هره ورځ پرې بریدونه کېږي او په کورونو یې بمونه غورځي، هوا سړه ده او د برېښنا یا بجلۍ ستونزې هم لري." ګرافېټس وویل، په دغو ټرکونو کې ۱۲۰۰ کسانو ته درمل، بخارۍ، خواړه، کمپلې او نور اړین مرستندویه توکي بار وو. د ملګروملتونو د بشری حقونو د لوی کمېشنر دفتر ویلي، چې په اوکراین باندې د روس د یرغل د پیل یعنې د ۲۰۲۲ کال د فیبروۍ له ۲۴ نېټې راهیسې یې، د ۱۸۹۵۵ ملکیانو مرګ ژوبله ریکارډ کړې چې په دغه ډله کې ۷۱۹۹ یې وژل شوي او ۱۱۷۵۶ یې ژوبل شوي دي. خو ملګري ملتونه وايي، چې کره شمېر تر دې ډېر زیات دی. همدارنګه د کډوالو لپاره د ملګروملتونو ادارې ویلي، چې په اوکراین باندې د روس د یرغل له امله د اوکراین د ۴۰ میلیونو وګړو څخه دریمه برخه یې کډه شوي دي چې دا د دوهمې نړیوالې جګړې راهیسې د کډوالو تر ټولو چټک ناورین ګڼل کېږي.
د عراق د بهرنیو چارو وزیر: د ایران په اړه د امریکا او عراق پالیسي متفاوته ده
د عراق د بهرنیو چارو وزیر فواد حسین وایي د ایران په اړه د واشنګټن سیاست د بغداد له سیاست څخه یو څه توپیر لري.
