پېشلمي ته پاڅېدل ښايي اوس لويه اندېښنه نه وي، په تېره دا چې روژه اوړي کې ده، نو پېشلمی وختي کېږي او ډېر ښايي لا تر هغه وخته ويښ وي او بل د ويښولو وسايل هم ډېر دي.

خو پېشلمي ته د پاڅولو کار ډېرو اسلامي هېوادونو کې يو لرغونی دود دی.

دا د پېړيو اوږدو کې د نارينه وو کار و، چې د سهار له اذان ښه مخکې به يې خلک د خوراک څښاک او د راتلونکې ورځې روژې ته د تياري لپاره ويښول، خو اوس ښځو هم دې کار ته ملا تړلې ده.

دلال عبد القادر يوه مصرۍ ده، او کيسه کوي چې د دې دندې ترسره کول ورته څه معنا لري.