پولیسو په پاکستان کې سني او شعیه مذهبی مشران نیولي
په پاکستان کې پولیسو د کراچۍ په ښار کې د تازه فرقوي شخړو په تړاو د سني او شعیه مذهبي مشرانو په مدرسو چاپې اچولې او د دواړو فرقو مشهور غړي یې نیولي دي.
د پاکستان د تروریزم سره د مبارزې د پولیسو یوه افسر جند شیخ اې پي خبري اژانس ته ویلي دي چې په نیول شویو کسانو کې د پاکستان خلق یا پیپلز پارټۍ پخوانی وکیل فیصل رضا عابدي هم شامل دی.
عابدي شعیه مذهبي مشر دی چې د طالبانو ضد ډله یې درلوده. پولیسو دغه کسان پدې خاطر نیولي دي چې د کراچۍ په ښار کې د تازه فرقوي شخړو په هکله ترې تحقیقات وکړي.
سني او شعیه مبارزینو نن په کراچۍ کې د دغو چاپو او د خپلو مشرانو د نیولو په خلاف اعتراضیه غوندې او جلسونو کړیدي. د پولیسو یوه افسر رزاق خان اې پي خبري اژانس ته ویلي دي چې شعیه مظاهره چیانو د تقریباً اتو ساعتونو لپاره یوه لویه لار هم تړلې وه چې پولیس یې مجبور کړل د هغوي د تیت او پرک کولو لپاره د اوښکې بهوونکي ګاز نه کار واخلي.
د پولیسو او مظاهره چیانو تر منځ اخ او ډب هم شویدی.
په پاکستان کې سني وسله والې ډلې اکثره د القاعده او طالبانو سره اړیکې لري. دوي شعیه ګان " مرتدین" ګڼي او وخت نا وخته یې په هغوي بریدونه هم کړیدي.
پولیس وایي چې د کراچۍ په ښار کې چې سني مذهبه مشران پدې تازه وخت کې وژل شوي، ښایي چې د شعیه وسله والو ډلو کار به وي.
د سنده ولایت اعلی وزیر مراد علي شاه مطبوعاتو ته ویلي دي چې پولیسو د لشکرې جهنګوي د غړیو په کورنو هم چاپې اچولې او د دې ډلې دوه وسله وال یې نیولي دي. مراد علي شاه ویلي دي چې پولیسو په مدرسو هم چاپې اچولي خو هغه پدې باره کې نور جزیات ورنکړل.
په پاکستان کې د اسلامي سخت او فرقوي ډلو په خلاف جګړه د تیرو لسو کالونو راپدیخوا روانه ده. دغه ډلې د پاکستان په ځینو غټو ښارونو کې قوي حضور لري او د القاعده د شبکې او طالبانو سره هم راشه درشه لري.
د پاکستان پوځ د سخت دریزه ډلو په خلاف په قبایلي سیمو کې څو ځله تعرضي عملیات هم کړیدي. د پوي لوی درستیز نن د دوشنبې په ورځ مطبوعاتو ته تائید کړه چې نهه وسله وال وروسته له هغه اعدام شول چې په پوځي محکمې کې مجرم ثابت شول.
د پاکستان د پوځ په اعلامیې کې ویل شوي چې دغو کسانو د پوځیانو او پولیسو په وژلو کې لاس درلود.
