د ناټو مشر او د امریکا دفاع وزیر سبا کابل ته ځي
د انځور حقوق
Getty Images
د ناټو عمومي منشي او د امریکا دفاع وزیر له افغان حکومت سره د همکاریو د دوام په اړه د ګډې اعلامیې لاسلیکولو لپاره کابل ته ځي.
د افغان ولسمشرۍ ماڼۍ وايي، ټاکل شوې د امریکا دفاع وزیر مارک اسپر او د ناټو عمومي منشي یان ستولتنبرګ به سبا ( شنبه ۲۹ فبروري ) په قطر کې د طالبانو او امريکا تر منځ د سولې د تړون تر لاسلیک وړاندې په کابل کې له افغان حکومت سره د همکاریو د دوام ګډه اعلامیه لاسلیک کړي.
د ولسمشرۍ ماڼۍ یو ویاند دواخان مينهپال وايي د دغې اعلامیې موخه د افغانستان له امنيتي او دفاعي ځواکونو د نړیوالې ټولنې د ملاتړ د دوام ډاډ دی.
له دې سره جوخت له طالبانو سره د افغان حکومت د خبرو لپاره هم چمتووالی روان دی. افغان چارواکي وايي له طالبانو سره د افغان حکومت د لومړني تماس يوه ډله هم د قطر پلازمېنې دوحې ته رسېدلې.
- "سبا په قطر کې د ۳۰ هېوادونو د استازو په شتون کې د سولې تړون لاسلیکیږي"
- ولسمشر غني او د امریکا د دفاع وزیر د سولې پر بهیر غږېدلي
- د افغان سولې بهیر: له پیله تر دې دمه
د افغان ولسمشر وياند صدیق صديقي وايي افغان حکومت دا ډله د امریکا او طالبانو په غوښتنه جوړه کړې او همدا اوس په قطر کې ده خو د امریکا او طالبانو تر منځ د سولې د تړون د لاسلیک په مراسمو کې ګډون نه کوي.
له دې وړاندې ویل شوي وو چې دغه ډله به د طالبانو او حکومت د بندیانو د آزادېدو پر څرنګوالي هم لومړنۍ خبرې وکړي. خو ښاغلی صديقي وايي د طالبانو پر بندیانو به وروسته د افغان حکومت او طالبانو تر منځ په خبرو کې بحث کېږي.
ښاغلی صديقي وايي د افغان حکومت او طالبانو تر منځ د سولې خبرو ته هم پلاوی چمتو دی. هغه وايي دا ځل به د افغان حکومت پلاوی اغېزناک خو محدود وي.
ټاکل شوې د را روانې مارچ میاشتې په لومړيو کې د افغان حکومت او طاللبانو تر منځ د سولې خبرې هم پیل شي.
ښاغلی صديقي وايي د افغان حکومت د سولې مرکچي پلاوی به د مرکچي رول لري او پرېکړې به په افغانستان کې د حکومتي او سياسي څېرو د هغه په ټکو یوه جامعه ډله کوي. هغه وايي چې د افغان حکومت او طالبانو تر منځ د خبرو پایلې به ملي شورا او آن لویه جرګه تاييدوي.
