امریکا: افغانستان کې د موازي حکومت جوړولو هڅې قانون سره په ټکر کې دي
د انځور حقوق
STATE DEPARTMENT
د امریکا د بهرنیو چارو وزارت د افغانستان د ولسمشرۍ ټاکنو ته په خپل لومړي رسمي غبرګون کې ویلي، په افغانستان کې د هر ډول موازي حکومت جوړولو هڅې د دې هېواد له اساسي قانون سره په ټکر کې دي او باید ورنه ډډه وشي.
یاد وزارت نن ( سې شبنه فبروري ۲۴) په یوه اعلامیه کې ویلي چې افغان حکومت د ولسمشر د لوړې مراسمو پر ځنډولو موافقه کړې، او امریکا یې له دې کبله مننه کوي.
دغه اعلامیه کې ویل شوي چې امریکا د افغانستان د ولسمشریزو ټاکنو د پایلو اعلان چې له مخې ولسمشر اشرف غني بریالی اعلان شوی څاري، خو په کار ده چې په دې اړه شته اندېښنې د اساسي قانون او له قانوني لارو هوارې کړل شي.
د امریکا د بهرنیو چارو وزارت غوښتنه کړې چې راتلونکی حکومت دې پراخ بنسټه وي، داسې چې د ټولو افغانانو هیلې پر ځای کړي.
په اعلامیه کې پر افغان سیاستوالو او د هغوی پر ملاتړو غږ شوی چې "سیاسي بحثونه په ارامۍ او د زور او یا د زور کارولو له ګواښ پرته ترسره شي." او دوی "باید د اساسي قانون او قانون حاکمیت خلاف د موازي حکومتي بنسټونو د رامنځته کولو په ګډون له ټیکاو ګډوډوونکو کړنو لاس واخلي."
امریکا وايي اوس د سولې وخت دی، نو "د ټاکنو پر ځای د تلپاتې سولې پر لور ګامونه اخېستل په کار دي چې له طالبانو سره جګړه ختمه کړي او سیاسي حل لار وموندل شي".
د امریکا د بهرنیو چارو وزارت تمه ښودلې ده چې د افغانانو خپلمنځي خبرې په راتلونکې مارچ میاشت کې پيل شي.
په اعلامیه کې ښکیلې خواوې هڅول شوي چې د سولې هڅو کې برخه واخلي او "د سولې لپاره پر یوه ملي اډانه" سره سلا شي، داسې اډانه چې د افغانستان اسلامي جمهوریت استازولي وکړي چې پر مټ یې د سولې خبرو ته چمتو او مشري یې وکړي.
امریکا وايي د وخت په پام کې نیولو لپاره "افغانانو ته په کار دي چې پر دې مسایلو هوکړه وکړي".
د اعلامیې په پای کې له افغان حکومته مننه شوې چې د ولسمشر د لوړې مراسم یې وځنډول.
په افغانستان کې د ولسمشریزو ټاکنو وروستۍ پایلو د ټاکنو له ورځې نږدې پنځه میاشتې وروسته، یوه اونۍ وړاندې اعلان شوې. د دې پایلو له مخې ولسمشر اشرف غني د ۵۰،۶۴ سلنه رایو په ترلاسه کولو بریالی اعلان شو.
د دې پایلو له مخې عبد الله عبد الله ۳۹،۵۲ سلنه رایې خپلې کړې، خو ښاغلي عبد الله دا پایلې ونه منلې او ادعا یې وکړه چې دی بریالی دی او د خپل حکومت به رامنځته کوي.
عبد الله چې لا هم په حکومت کې اجرائیه مشر دی د څو ولایتونو لپاره له خپل لوري والیان هم معرفي کړل.
ولسمشرۍ ماڼۍ ویلي وو چې د راتلونکې پنجشنبې په ورځ د ښاغلي غني د لوړې مراسم ترسره کیږي. د عبدالله عبدالله پلویانو هم پر همدې ورځ د هغه د لوړې مراسمو خبره کړې وه.
