د ټاکنو کمېسیون د کاندیدانو له مخالفت سره سره د رأیو بیاشمېرنې ته دوام ورکوي
د یو شمېر انتخاباتي ټیمونو له مخالفتونو سره سره د افغانستان د انتخاباتو خپلواک کمېسیون وايي چې له ۲۰ په ډېرو ولایتونو کې د رأیو د بیاشمېرنې بهیر ته دوام ورکوي.
د دغه کمېسیون رئیسې حوا علم نورستانۍ نن (سې شنبه د عقرب ۲۱مه) په یوه خبري کنفرانس کې وویل، کمېسیون د خلکو اعتراضونه په نظر کې نیسي او یوازې بایومټریک شوې رأيې ورته د منلو وړ دي.
خو د یو شمېر انتخاباتي ټیمونو غړي وايي چې په نږدې ۲۰ ولایتونو کې يې د انتخاباتو ولایتي دفترونه تړلي او دا اعتراضات به ټولو ۳۴ ولایتونو ته وغځوي.
اغلې نورستانۍ وویل، په ۱۴ نورو ولایتونو کې د یو شمېر انتخاباتي ټیمونو د ملاتړو له لوري د کمېسیون ولایتي دفترونه تړل شوي دي.
هغې وویل: "موږ د یو شمېر انتخاباتي ټیمونو له لوري د ځینو ولایتي دفترونو د تړلو له امله اندېښنه لرو چې د عقرب په ۲۳مه به لومړنۍ پایلې اعلان نهشي."
اغلې نورستانۍ له انتخاباتي ټیمونو وغوښتل چې له کمېسیون سره د رأیو د بیاشمېرنې په بهیر کې مرسته وکړي.
خو معترض نوماندان د رأیو د بیا شمېرنې د پروسې د بندولو غوښتنه کوي.
د نوماندانو ملاتړي وايي په همدې خاطر يې د افغانستان په ۲۱ ولایتونو کې د کمېسیون ولایتي دفترونه تړلي دي.
د عبدالله عبدالله په مشرۍ د ثبات او همپالنې انتخاباتي ټیم غړي فهیم فطرت ازادي راډيو ته وویل، شاید د دوی دغه اقدام د افغانستان ټولو ۳۴ ولایتونو ته وغځېږي.
ښاغلی فطرت زیاتوي: "تاسې پوهېږئ چې د افغانستان له ۲۰ په ډېرو ولایتونو کې د انتخاباتو د کمېسیون ګودامونه د خلکو د اعتراضونو په نتیجه کې تړل شوي دي. زه فکر کوم چې دا اعتراضونه شاید نن د افغانستان ټولو ۳۴ ولایتونو ته پراخه شي."
خو د ثبات او همپالنې انتخاباتي ټیم ویاند فریدون خوځون وايي چې د انتخاباتو د ولایتي دفترونو تړل کېدل د دوی په دستور نهدي شوي او کمېسیون باید د غیر قانوني کړنو په کولو سره ځان له خلکو سره مخامخ نهکړي.
د ثبات او همپالنې د انتخاباتي ټیم ترڅنګ د جمهوري ریاست د نوماندانو شورا هم وايي چې دغه اعتراضونه د خلکو له لوري شوي دي .
د ثبات او همپالنې انتخاباتي ټیم مشر عبدلله عبدالله د روانې اوونۍ د یکشنبې په ورځ په کابل کې د یوې غونډې پر مهال د انتخاباتو د کمېسیون دغه کار غیر قانوني وباله او ویېویل، که د رأیو د بیاشمېرنې بهیر ونهدرول شي، دی به د انتخاباتو پایلې ونهمني.
نوموړي وویل چې د رأیو د بیاشمېرنې له بهیر وړاندې باید نږدې درې لکه رأیې چې د هغه په وینا په معیار برابرې نهدي، باطلې اعلان شي.
د جمهوري ریاست د انتخاباتو دغه تازه جنجالونه داسې مهال راپورته کېږي چې د انتخاباتي مهالوېش له مخې باید دوه ورځې وروسته د انتخاباتو لومړنۍ پایلې اعلان شي.
اروپايي ټولنې هم په خپل وخت افغانستان کې د ولسمشریزو انتخاباتو د پایلو د اعلان غوښتنه کړې او دغه شانيې له نوماندانو غوښتنه کړې چې نتیجې يې هم باید ومني.
