شاته

عراق کې د مقتدی صدر شیعه ډلې ټاکنې ګټلې

د انځور حقوق Reuters
Image caption مقتدی صدر پخپله نشي کولی لومړی وزیر شي ځکه پخپله نوماند نه و.

د شیعه ملېشو دغه پخواني مشر له متحدینو سره د عراق پارلماني ټاکنې ګټلې.

مقتدی صدر چې په عراق کې د ایران کلک مخالف دی، پخپله نه شي کولی لومړی وزیر شي ځکه دی نوماند نه و.‍

خو انګېرنه دا ده چې د نوي حکومت جوړولو کې به مهم رول ولوبوي.

د اوسني واکمن لومړي وزیر حیدرالعبادي ګوند بیا له یوه ایراني پلوه ډلې وروسته درېیم ځای خپل کړی.

د شنبې په ورځ د ټاکنو کمېسیون لخوا اعلان شوې پایلې ښيي چې د ښاغلي صدر ډلې ۵۴ څوکۍ ګټلې، د فتح ډلې بیا ۴۷ او د لومړي وزیر عبادي ډلې بیا ۴۲ څوکۍ ګټلې.

د انځور حقوق AFP
Image caption عراقیان په ټاکنو خوښي څرګندوي.

خو د ښاغلي صدر ډلې د ۳۲۹ څخه ۵۵ کمې رایه ګټلې چې دی به اوس له بلې ډلې سره ګډ حکومت جوړوي. د ده په ډله کې له کمونستانو تر سیکولر ډلو ټول شامل دي.

د ښاغلي صدر ډله وروسته له هغه بریالۍ کېږي چې کلونه دی له صحنې لرې و او پر ځای یې د ایراني ملاتړو شیعه ډلې مخکښې وې.

په عراق کې د اسلامي دولت نومې ډلې له ماتې وروسته دا لومړۍ ټاکنې دي چې کېږي. د ویلو وړ ده چې د ۵۰۰۰ شاوخوا امریکایي سرتېري اوس هم په عراق کې شته.

ښاغلی صدر په ۲۰۰۳ کې د امریکا د عراق یرغل پر وړاندې ودرېد، او وروسته بیا د فساد ضد مبارزې اتل شو.

د ښاغلي عبادي ډلې ناکامي د همدې خبرې څرګندوی کوي چې عراقیان له ښکاره فساد سره ناخوښ وو.