'په بدخشان کې له یوې ښځې سر پرې شوی'
د انځور حقوق
Getty Images
د افغانستان په شمال ختیځ بدخشان ولایت کې امنتي چارواکي وايي، وسله والو مخالفینو د دې ولایت په بهارک ولسوالۍ کې د یوې ځوانې ښځې سر غوڅ کړی.
د بدخشان د امنیتي قومندانۍ ویاند ثناالله روحاني د بي بي سي خبریال محفوظ زبیدی ته وویل چې د سیمې خلک وايي دا ښځه "له نامحرم سره د نامشروع" جنسي اړیکې په تور وژلې.
د هغه په خبره دا ښځه واده شوې وه. خاوند یې کارګر دی او ماشوم نه لري.
که څه هم روحاني یې نه مني چې دا سیمه د حکومت مخالف ډلو تر واک لاندې ده خو وایي چې وسله والو مخالفینو شاوخوا د شپې دولس بجې د دې ښځې کور ته تللي او د هغې سر یې پرې کړی.
دا پېښه د بهارک ولسوالۍ په خوش دریم کلي کې دوه ورځې مخکې شوې ده.
بدخشان چارواکي: د ځانمرګي برید په تور یې درې کسان نیولي
د بدخشان ولایت زېباک ولسوالۍ طالبانو نیولې
"بدخشان ولایت کې طالبانو ۳۵ سیمه ییز پولیس وژلي"
د بهارک ولسوال محمد عظیم موسوي دا پېښه تاییدوي، او وايي، عاملان یې له وسله والو مخالفینو سره تړلي کسان دي.
د هغه په خبره، اول د دې ښځې پوزه او بیا یې سر پرې شوی دی.
نوموړی دا هم وايي چې وسله والو مخالفینو د دې پېښې شپږ عاملان نیولي او له ځان سره یې خپلې قومندانۍ ته بېولي دي.
د طالبانو ویاند تر دې دمه په دې اړه څه نه دي ویلي، خو په بدخشان کې د ځايي طالبانو یوې سرچینې ویلي چې د دې ښځې په وژلو کې هېڅ رول نه لري او وایي چې دا پیښه د کورني تاوتریخ والي پایله ده.
بهارک د بدخشان ولایت نا امنه ولسوالي ده چې له دې مخکې د طالبانو په ولکه کې وه.
طالبان د بدخشان په یو شمېر ولسوالیو کې فعالیت لري، له دې مخکې هم په دې ولایت کې ورته پېښې رامنځته شوې دي.
