بلخ کې چاودنې ۵ کسان وژلي؛ د پارلمان غړی هرات کې ټپي شوی
افغانستان کې چارواکي وایي، په شمالي ولایت بلخ کې د سرک غاړې ماین چاودنې ۵ تنه وژل شوي او ۹ نور ټپيان دي او په لویدیځ هرات کې بیا د ولسي جرګې یو استازی له وسله وال بریده روغ وتلی.
د بلخ د امنیه قومندانۍ د امنیت آمر عبدالرزاق قادري بي بي سي ته وویل، چاودنه نن (سنبلې/وږي ۴مه) له غرمې وړاندې په خلم ولسوالۍ کې رامنځته شوې ده. هغه په وینا، د چاودنې ټول قربانیان ملکي وګړي دي.
بلخوا د خلم روغتون چارواکي بیا د څلورو کسانو د وژل کېدو او ۱۱ نورو د ټپي کېدو خبره کوي.
ښاغلي قادري وویل، تراوسه څرګنده نه ده چې د برید موخه څوک و، خو تر چاودنې لږه شیبه وړاندې د ولسي جرګې د غړي اسدالله شریفي موټر له سیمې تېر شوی و. ددي چاودنې مسوولیت تراوسه هیچا نه دی منلی.
بلخوا د افغانستان په لویدیځ ولایت هرات کې د ولسي جرګې پر یوه غړي وسله وال برید شوی.
د افغانستان په پارلمان کې د بادغیس ولایت استازی سید موسی جناب صاحب د هرات ښار په سوېل لویدیځ کې په نښه او ټپی شوی.
د هرات د حوزوي روغتون مطبوعاتي مسوول رفیق شیرزي بي بي سي ته وویل، ښاغلی جناب په خیټه په مرمۍ لګېدلی، خو وضعیت یې د اندېښنې وړ نه دی.
تراوسه د بریدګر د هویت او د برید د انګیزې په اړه رسمي سرچینو څه نه دي ویلي.