م.م: د سعودي پر ژمنې سربېره یمن ته مرستې نه شي رسولی
د ملګرو ملتونو چارواکي وايي له دې سره سره چې سعودي عربستان ویلي، د پنجشنبې په ورځ به د یمن کلابندي پای ته ورسوي، بیا هم دوی یمن ته مرستې نه شي رسولی.
د سعودي عربستان په مشرۍ اتیلاف د امریکا او ملګرو ملتونو له خوا له فشارونو او نیوکو وروسته پرون اعلان وکړ چې د یمن دوه بندرونه او د پلازمېنې صنعا هوايي ډګر د بشري مرستو په خاطر پرانیزي.
ملګري ملتونه هیله من دي چې تر راتلونکي ۴۸ ساعتونو کې به یمن ته د هوا یا اوبو له لاري مرستې ورسوي.
* م.م: سعودي ایتلاف دې پر یمن بندیز لرې کړي
* م م: یمن د نړۍ له خورا سختې لوږې سره مخ دی
دا بندرونه او هوايي ډګر د هغه توغندي په غبرګون کې د سعودي په مشرۍ ایتلاف له خوا وتړل شو چې حوسي یاغیانو پر پلازمېنه ریاض توغولی و. سره له دې چې نوموړي اتیلاف د بندرونو او هوايي ډګر د پرانیستلو اعلان وکړ خو پرون د ورځې ترپایه پورې یمن ته بشري مرستې ونه لېږدول شوې.
د ملګرو ملتونو د بشري مرستو د همغږۍ د چارو مشر جمي مک ګولډریک وايي د ماښام تر اوو بجو پورې بندرونه نه وو پرانیستل شوي.
د نوموړي په خبره، دلته یو سیستم دی چې موږ احوال ورکوو او خپلو الوتکو د راوستلو لپاره د ځای او وخت غوښتنه کوو، موږ په بندر کې د ځای لپاره هم خبرې کوو:
"موږ نور بهیر ترسره کړ اوس انتظار کوو چې چارې څنګه پرمخ ځي، موږ صنعا ته د الوتنو په اړه ماښام ناوخته پورې څه وانوریدل، تمه مو دا ده چې په دې هکله یو څه واورو."
د ملګرو ملتونو چارواکي وايي دوه بیړۍ چې په یوه کې غنم او په بلې کې له کولرا ناروغۍ سره د مبارزې په خاطر تجهیزات بار دي اوس هم له حدیده بندر سره نژدي انتظار باسي.
دا په داسې حال کې ده چې د یمن میلیونونه اوسیدونکي له لوږې او ناروغیو سره مخامخ دي.
د مرستو رسولو یوه چارواکي ویلي که د مرستو رسول پیل هم شي داسې به وي لکه په سیند کې یو څاڅکی.
د ماشومانو د ملاتړ سازمان هم وايي چې نوې مرستې د ډېرو خلکو اړتیا نه شي پوره کولای هغه هم په داسې حالاتو کې چې د یمن خلک له یوې خوا له داسې جګړې سره مخامخ دي چې پای یې نژدي نه ښکاري او له بله پلوه یې لوږه او ناورغۍ ژوند ګواښي.