"د جنسي ځورونې پړه د ښځو پر غاړه ده"
د انځور حقوق
Getty Images
د هالیووډ پر نامتو فیلم جوړوونکي "واین سټین" باندې د هالیووډ ښځینه فیلمي لوبغاړو د جنسي ځورونې تر تورونو لګېدو وروسته په هندي سینما بالیووډ کې هم په دې اړه بحثونه پیل شوي دي.
په هاروي واین سټین تېره اونۍ یاد تورونه ولګېدل چې د نړۍ له هر ګوټه یې خلک په اړه خپل نظرونه وړاندې کوي.
د بالیووډ لوبغاړې "پوجا بهټ" وايي، په بالیووډ کې هم د هاروي واین سټین غوندې کسان ډېر دي، خو خلک له شکایت کولو ډارېږي.
خلکو په ښاغلي"سټین" پسې بد رد ویل چې د بالیووډ لوبغاړې "ټسکا چوپړه" وویل:
" له ښځو سره د کېدونکي جنسي ځورونې لاملانې پخپله ښځې دي."
د اغلې چوپړه دې خبرې نوموړې ته سرخوږی جوړ کړ.
د ټولنیزو شبکو له کاروونکو "واین سټین" هېر شو او د ټسکا چوپړه په اړه یې د سلامت او ملامت بحثونه پیل کړل.
اغلې چوپړه زیاته کړه، له ښځو سره د ځاني امنیت فکر ولې نه شته؟
داسې حالت ولې رامنځته کوي چې د مشکوکو کسانو د لیدلو لپاره له هغوی سره هوټلونو او نورو ځایونه ته لاړې شي:
" د یوې ښځې په توګه مې سپارښتنه دا ده چې خپل ځاني امنیت ته لومړیتوب ور کړئ. "
هغې زیاته کړې، د خپل ښه راتلونکي لپاره لنډې لارې مه کاروئ، بلکې په زیار او خواري وګالئ.
لږ به وخت زیات واخلي، خو که وړتیا ولرئ، حتماً بریالي کېږئ.
اغلې چوپړه د بالیووډ سینما په لسګونو فیلمونو کې بېلابېل رولونه لوبولي دي.
د هغې په خبره، د جنسي ځورونې په ټوله کیسه کې دا خبره ډېر د پام وړ ده چې پر همدې مسله اوس بحث مه کوئ، ځکه دا د خواله رسنیو په موضوع بدله شوې ده، پر داسې مسلو سنجېدلو او پرلپسې بحثونو کولو ته اړتیا ده.
