اشرف غني د غمشریکۍ لپاره پکتیا ته تللی
افغان ولسمشر محمد اشرف غني د یوه لوړپوړي دولتي پلاوي په مشرۍ پکتیا ولایت ته سفر کړی دی.
له ولسمشرۍ ماڼۍ په یکشنبه ( اکټوبر ۲۱مه) خپره شوې خبرپاڼه کې ویل شوي، ولسمشر محمد اشرف غني د پکتیا له ولسونو او مشرانو سره د غمشریکۍ شریکولو لپاره دغه ولایت ته سفر کړی دی.
پکتیا د افغانستان له نسبتاً امنو ولایتونو ګڼل کېده، خو د تېره اونۍ د اکټوبر په ۱۷مه یې پر امنیه قومندانۍ ډله ییز ځانمرګی برید شو چې له امله یې د پکتیا د امنیه قومندان "توریالي عبدیاني" په ګډون ۴۸ کسان ووژل شول چې په ډله کې یې ۲۰ ملکي وګړي وو.
د ښاغلي عبدیاني د جنازې مراسم په کابل کې تر سره شول چې پخپله ولسمشر یې هم د تابوت درناوی وکړ.
طالبانو ویلي، له یاد بریده هدف یې د امریکا او افغانستان دولتونو ته دا پیغام رسول و چې د امریکا د نوې تګلارې په اعلانولو سره به دوی ماتې نه خوري.
د کورنیو چاروسرپرست وزیر ویس احمد برمک په یوه پیغام کې وویل، د جنرال عبدیاني ملګري ژوندي دي چې ډېر ژر به له بې زړه ترهګرو نه د هغه د وژل کېدو غچ واخلي.
برید ګرو د پولیسو له جامو او موټرو په ګټې اخیستو د پکتیا امنیه قومندان د دفتر تر دروازې ځانونه رسولي وو.