د مسقط ناسته د افغان سولې لار نقشه جوړوي
په سعودي عربستان کې د چین سفیر هوا شین له لندنه خپریدونکې الشرق الاوسط ورځپاڼې ته ویلي هېواد یې له سعودي عربستان سره په ګډه د افغانستان او سیمې د ستونزو د هواري لپاره ګډ کاروي.
ښاغلي شین زیاته کړې د عمان په پلازمېنه مسقط کې د افغانستان په اړه څلور اړخیزه غونډه کې د افغانستان لپاره د چین ځانګړی استازی برخه لري، ده ویلي د غونډې هدف دا دی چې د افغان حکومت او طالبانو ترمنځ د سولې لپاره د لارې یوه نقشه جوړه شي.
همدې ورځپاڼې په یوه بل رپوټ کې زیاته کړه کې د سعودي پاچا سلمان بن عبد العزیز د عراق لومړي وزیر حیدر العبادي سره په ټیلېفوني خبرو کې د عراق د ځمکنۍ بشپړتیا او یووالي ملاتړ کړی.
"وسلوال طالبان د مسقط غونډه کې ګډون نه کوي"
له ځنډ وروسته پر افغان سولې د پاکستان، امریکا او چین خبرې
پاکستانۍ ورځپاڼه ایکسپریس ټربیون لیکي چې په کورمه ایجنسي په پروني برید کې د حقانې ډلې یو قوماندان وژل شوی، ورځپاڼې د ځايي چارواکو په حواله ویلي یوې بې پيلوټه الوتکې په صفري نقطه کې یو کور په نښه کړ چې پنځه تنه یې ووژل چې یو یې د حقانې ډلې قوماندان سنګین ولي شاه و.
په رپوټ کې ویل شوي په ځینې راپورونو کې د وژل شویو کسانو شمیر اولس ښودل شوی دی. ایکسپریس ټریبیون زیاتوي چارواکو دا خبره چې ګواکې دغه برید د ډیورنډ کرښې په ختیځ لوري کې شوی رد کړې ده.
هندوستان ټایمز ورځپاڼې کابل ته ددغه هېواد د لومړي وزیر د ملي امنیت سلاکار اجیټ ډووال د سفر په اړه لیکي په دغه سفر کې د دواړو هېوادونو ترمنځ د ستراتیژیکو اړیکو په اړه خبرې وشوې.
ورځپاڼه زیاتوي له افغان ولسمشر محمد اشرف غني سره په کتنه کې نوموړي ښاغلي غني ته د لومړي وزیر نریندرا مودي له خوا بلنه ورکړه چې هند ته ورشي، رپوټ زیاتوي ښاغلي غني دغه غوښتنه ومنله.
ورځپاڼه زیاتوي دواړه لوریو د سولې لپاره د هغه فرصت هرکلی وکړ چې د امریکا د ولسمشر ډونالډ ټرمپ له خوا د نوې ستراتیژۍ له اعلان وروسته رامنځته شوی دی.
بله هندۍ ورځپاڼه ټایمز اف انډیا په همدې تړاو لیکي چې د هند د ملي امنیت سلاکار داسې مهال افغانستان ته سفر کوي چې د څلور اړخیزه غونډو لړۍ بیا پيل شوې.
ورځپاڼه زیاتوي د افغانستان په تړاو کې د وروستیو منډو تر ړو په لړ کې هند د شپږ جمع یو هېوادونو راتلونکې غونډې ته سترګې پر لاره دی.
د عراق یوه ورځپاڼه الزمان کې خپاره شوي یوه مطلب کې ویل شوي له د کردستان د ټولپوښتنې او جلا کېدو ډول په داسې حال کې وهل کیږي چې د عراق په دریمه برخه کې ناهیلي ډیره پراخه شوې او ددغو سیمو اوسیدونکي له نا امنیو ، سیاسي ناکراریو، له اقتصادي بې ثباتۍ او د ژوند له کړاوونو سره لاس او ګرېوان دي.