سردار محمد شكېب

ملا سردار محمد شكېب د ښاغلي راز محمد زوى پر 1354 ل.كال د زابل ولايت د شاه جوى په سيمه كې زېږېدلى دى. ديني زده كړې يې د زابل ولايت او پاكستان په بېلابېلو مدرسو او جوماتونو كې تر سره كړې دي، تر دې مهاله يې ګڼ شعرونه ليكلي،شعر، "په ځانګړې توګه غزل"يې ډېر ظرافت او ځينې بيتونه يې په خپل سندريز تال كې زړه راكښونكى جوړښت لري.نوموړى هڅه كوي چې خپل احساسات او خيالونه په زغرده انځور كړي، خو بيا هم خپلو خبرو ته دومره ډېر استرونه نه وراغوندي چې فكري او هنري انډول يې خپل يووالى له لاسه وركړي، شعري بيان يې له خپلې ټاكلې اډانې څخه بهر نه وځي، په شعر كې يې يوه مرموزه مستي په غورځنګو ده او ځينې ټكي به داسې هم په كې وي چې د پوهېدو لپاره يې بايد له لږ څه سوچ او ژورتياڅخه كار واخيستل شي، يا يې هم د ځينو شعرونو د انځورونو او لفظي جوړښتونو تسلسل يې په بشپړ ډول نه دى غزول شوى، چې په ازادو شعرونو كې يې ډېر تر سترګو كېږي.
خو تر هـغه ځايه چې يې نوي شعرونه لولو، ښه بيان يې ددې څرګندوى دى چې ښه هنري ژبه لري، چې په راتلونكي كې به نوره هم ښكلې او زړه راښكونكې شي او دا كار ورسره په پرمختګ كې مرسته وكړي، د ځينو ازادو شعرونو وزن يې روان نه ښكاري، چې دا ستونزه يې په پخوانيو شعرونو كې ډېره تر سترګو كېږي او اوس يې دا ستونزه غوڅه كړې ده. ښاغلى شكېب دشعر تر څنګ نثرونه هم ليكي او ژباړه هم كوي. چې تر ډېره حده ديني او اسلامي موضوعګانې څېړي، كوم ځانګړى خپور شوى اثر نه لري. نوموړى د څه مودې لپاره د خلافت مجلې مسوول چلوونكى هم پاتې شوى او اوس هم په كندهار كې پر فرهنګي چارو بوخت دى.
 

 Site designed and administrated by Tolafghan.com 2003 webmaster@shirzad.de