محمد سرور حُسنيار

ښاغلى محمد سرور حُسنيار د دين محمد زوى پر1349ل.كال د كندهار په شپږمه ناحيه كې زېږېدلى دى، ده هم خورې ورې زده كړې كړي، خو له پوهې او هنرسره يې مينه دومره ډېره وه چې په لنډه موده كې يې ډېر مزلونه ووهل، دهمدې اورنۍ مينې بركت و چې تر ډېر ځنډ وروسته يې په دې وروستيو دوو كلونو كې د شعر رنګيني او ښكلا زيات او ځينې شعرونه يې د نوښت په اب ورنګول شي، حسنيار خو خپله هم دښو اخلاقو او صميميت غر دى، سره له دې چې د ځينو چارو بوختتيا يې ډېره ده خو بيا هم له كتاب و مطالعې سره ډېر شوق لري، هغه چې كله پر پېښور يا كوټې ښارونو ورپېښ شي نو تر هر څه يې كتابونو ته ډېره سودا وي، چې څنګه د خپلې خوښې كتابونه پيدا او كندهار ته يې يوسي.
حسنيار ايله ددې نږدې دوو كلونو په بهير كې پښتو نوى او زوړ شعر په ژوره توګه ولوست، چې تر همدې ژورې مطالعې وروسته يې په خپلو پنځونو كې هم لوى انقلاب راوست، په شعر كې يې هنري ښكلا او صميميت سره غاړه غړۍ شوي، دا خپله ددې څرګندوى دي چې نوموړى د ويلو لپار يو څه لري، خو غواړي خپلو دغو خبرو ته هنري بڼه وركړي.
خو لاډېر مزلونه ورته پر لار پراته دي او كه د ده مېړانه او مينه ورسره يارانه كوله نو دى به په دې ډګر كې بريالى او سرلوړى پاتې شي.
 

 Site designed and administrated by Tolafghan.com 2003 webmaster@shirzad.de