احسان الله غروب

احسان الله غروب د ښاغلي عبداللطيف زوى پر 1367لمريز كال د كندهار په نوي ښار كې زېږېدلى دى.
غروب د ګران هېواد پر ارته لمن هغه راټوكېدلي ګل ته ورته دى چې له ټوپكو،مردكيو،وينو او…څخه پرته يې پر بل څه سترګې سړې شوې نه وي، له 1378لمريز كال نه را په دېخوا شعرونه ليكي، د وروستيو خونړيو پېښو ځينې انځورونه يې په خپلو شعرونو كې كښلي دي؛ لا ډېرتنكى دى او ډېر مزلونه يې لار څاري، دده ذوق او استعداد دا په ډاګه كوي چې په نږدې كلونو كې به ښه شعرونه وليكي. خو دشعر ليكلو تر څنګ مطالعه او رياضت ته هم بايد پاملرنه وكړي، ددې تر څنګ كه هڅه وكړي چې خپل شعري بيان ته ځانګړې تګلار وټاكي غوره به وي، ځكه دشعر له رنګ او څرنګتيا څخه يې دا څرګندېږي، چې د ويلو لپاره ډېرې خبرې لري او غروب هڅه كوي خپلو دې ويناوو ته هنري بڼه وركړي. د غروب شعرونه ډېر لږ دي، خو بيا يې هم همدا لږه هڅه ستايو او نورې برياوې ورته غواړو.
نوموړى اوس په امام ابو حنيفه مدرسه كې پر خپلو زده كړو بوخت دى. طلوع افغان ورځپاڼه دده د شعري استعداد په غوړولو او ځلولو كې ډېره اغېزناكه تمامه شوې ده، چې دده لومړنۍ تجربې په كې خوندي دي.
د غروب فكري او ذهني بلوغ ته ډېر وخت پاتې دى او ډېره موده په كار ده چې هنري او ادبي نبوغ يې هم وځلېږي.
 

 Site designed and administrated by Tolafghan.com 2003 webmaster@shirzad.de