عبدالواسع هڅيال

عبدالواسع هڅيال د رحمت الله "چې خلك يې داغاجان په نامه هم پېژني" زوى پر 1356لمريز كال د كندهارښار په پنځمه ناحيه كې زېږېدلى دى، په البېروني لېسه كې يې خپلې لومړنۍ زده كړې تر اتم ټولګي پورې ورسولې، ورسره ديني زده كړه يې هم څه نا څه كړې ده، كله به چې له كابل يا پېښوره يوه نيمه نوې خپرونه كندهار ته رارسېدله او ټولو ملګرو به هڅه كوله چې لومړى يې وګوري، نو مازيګر به ورسره د هڅيال ضرور ناندرۍ وه او په دې هڅه كې به و چې د يوې شپې لپاره يې ورڅخه تر لاسه كړي. نوموړى اوس د كندهار مجلې د ليكني هيت غړى دى او ددې مجلې هنري برخه چلوي.
هڅيال هم د ډېرو نورو شاعرانو په څېر د شعارونو له اغزنې دښتې څخه رااوښتى او د هنري شعر شنه بڼ ته يې ځان ورلنډ كړى دى، كه يې لومړني شعرونه له اوسنيو هغو سره پرتله كړو ډېر بدلون په كې ترسترګو كېږي، د پخوانيو شعرونو ډېره برخه يې هغه شعاري ډوله خبرې دي چې ځينو ورته د حماسې استر وركړى او ددې ډول خبرو ناظم ته يې شاعر ويلى دى، د همدې مطالعې او ادبي ناستو ولاړو بركت و چې شاعرانه مزاج يې لا هنري او غزليز شو، كه يې د همدې هنري او غزليزې شاعرۍ لار پرې نه ښوده نو تر څه زيار وروسته به ډېر تږي ذوقونه د خپل شعر پر چينې خړوب كړي.

 Site designed and administrated by Tolafghan.com 2003 webmaster@shirzad.de