عبدالولي حلميار

ملا عبدالولي حلميار د حاجي محمد موسى زوى پر 1354ل كال د كندهار ښار د پنجوايي ولسوالۍ په پاشمول سيمه كې زوكړى دى. زده كړې يې په خصوصي ډول په بېلابېلو ديني مدرسو او جوماتونو كې له بېلابېلو ملايانو او ديني پوهانو څخه كړې دي، له شپږو كلونو را په دېخوا شعرونه ليكي، چې وخت پر وخت دكندهار ولايت په خپرونو كې خپاره شوي دي.
نوموړى اوس د ارغند جريدې مسول چلوونكى دى. داجريده د كندهار ادبي ټولنې له خوا هره مياشت يوځل په (16) مخونو كې په ښه څرنګوالي او څومره والي خپرېږي، چې هنري او ادبي برخې يې ارزښتمنې دي. دحلميار شعر يوازې په الفاظو سينګار شوى نه دى، بلكې د شعر د اوډون اوپيوستون ترڅنګ يې هنري جوړښت ته هم سترګې ور اوړي. دى هڅه كوي په خپل شعر كې له طبيعت څخه داسې توكي راواخلي او ټولنې ته يې وړاندې كړي چې ډېر ذوقونه ورته تږي دي او هر څوك ورڅخه خوند اخلي، ډېر ځل فكر ته هم د هنر پر ځاى ترجيح نه وركوي، د ځينو شعرپوهانو په اند دا د شعر ذاتي ارزښتونو ته په درنه سترګه كتل دي او څوك چې د شعرونو هنريت ارزوي، لومړى د شعر همدغو ارزښتونو ته د لومړيتوب حق وركوي. د حلميارصيب شاعري ډېره زړه راكښونكې او مسته ده، دى د كندهار د اوسنيو ځوانو شاعرانو په كتار كې ځان ته ځانګړى مقام لري.

 Site designed and administrated by Tolafghan.com 2003 webmaster@shirzad.de