عبدالمجيد بابى

ښاغلى عبدالمجيدبابى د غلام حيدر خان بابي زوى پر1337ل.كال د كندهار ښار د باميزو په كوڅه كې د خپل نيكه ارواښاد عبدالله بابي په كور كې زوكړى دى، خپلې زده كړې يې په مشرقي او احمدشاه بابا ښوونځيو كې تر دوولسم ټولګي پورې رسولې دي.
د دوو كلونو لپاره يې د ښوونكو روزنې لوړې موسسې د ټوليزو زده كړو په څانګه كې هم لوړې زده كړې وكړې.
د غويي تر خونړي كودتا وروسته يې د ژوند ټولې هيلې او كارونه نابشپړ پاتې شول، له زياتو كلونو راپه دېخوا شعرونه او نثرونه ليكي.
په شعر كې يې ملي مسايل اوټولنيزې غوښتنې رابرسېره كړي دي، په خپل ځيږه ژبه او شاعرانه دريځ سره يې د زورورو پر وړاندې دقلم سنګر ټينګ ساتلى، پر ملي او هېوادنيو مسايلو يې ډېر څه ليكلي او اوس هم لګيا دى. بابى صيب د شهرت او نوم تږى نه دى او د يو شمېر نوم خوښوونكو په څېر هم نه دى چې د هرې ورځې په تېرېدو سره يې فكري او عقيده يي لوري بدلون ومومي، غوڅ دريځ لري او خپله هره خبره په زغرده كوي. ګڼ شمېر نا چاپ اثار ورته پراته دي په دې برخه كې يې ځينې پروژې هم تر كار لاندې دي. خداىدې هغه ورځ راولي چې نوموړى دغه اثار خپلې درنې او پتمنې ټولنې ته وړاندې كړي. نوموړي د جغرافيې او تاريخ څانګې لوستي، چې په دې برخه كې دډېرې مطالعې او تجربې خاوند دى. سر بېره پر دې د هېواد پر سياسي او ټولنيزو مسايلو يې هم ډېرې ليكنې كړي چې پاموړ او ارزښتمن دي. د بابي صيب ټولو ورونو او دكورنۍ نورو مشرانو ځانونه فرهنګي او ادبي خدمتونو ته وقف كړي او فرهنګياله او فرهنګپاله كورنۍ ده. د خپلې ملي ژبې د ودې او پرمختګ لپاره يې هڅې د قدر وړ دي.
 

 Site designed and administrated by Tolafghan.com 2003 webmaster@shirzad.de