حاجي عبدالكريم

حاجي عبدالكريم د ملا غلام محمد زوى پر 1300ل كال په كندهار ښار كې زېږېدلى دى. زده كړې يې په خصوصي ډول د خپل كلي او د سيمې جوماتونو له ملايانو او ديني پوهانو څخه كړي او له ډېرو كلونو را په دېخوا په كندهار كې د يوه حكيم په توګه دنده ترسره كوي اوله دې لارې خپل اقتصاد خړوبوي.
كه څه هم پر اوس مهال سپينږيرى شوى، خو په زړه كې يې د هېواد او هېوادوالو مينه هماغسې تانده او تپانده ده، كله چې د هېواد د روانو حالاتو او اخ وډب په هكله غږېږي نو ډېرې كيسې يې له سترګو څخه اوښكې بهوي، دا په خپله ددې څرګندوى دى چې ښاغلى عبدالكريم دردېدلى او ځورېدلى انسان دى، له خپل هېواد سره ډېره مينه او خواخوږي لري، داسې سخته ورځ هم پرې راغلې چې نوموړى يې د خپلو ډېرو ارزښتمنو كتابونو خرڅلاو ته اړوېستى دى، خو هغه بيا هم دا ترخې ورځې او شپې په سړه سينه زغملي او زغمي يې.
د شهرت لېونى نه دى، له همدې كبله تر اوسه پټ پاتې شوى او چا نه دى پېژندلى، ماته يې هم د خپلې پېژندګلوۍ له سپارلو څخه ډډه كوله خو بيا مې هم اړوېست چې راويې سپاري.
نوموړى د ټولنې او چاپېريال يو انځورګر شاعر دى، د شعر ډېره برخه يې نصيحت او پند دى، خلك اخرت او د دنيا پايلې ته ځيروي او دا اواز اوچتول غواړي چې له مادياتو څخه بايد سترګې پټې كړو او مانيزو توكو ته په درنه سترګه وګورو.
د ښاغلي عبدالكريم په زړه كې د هېواد سپېڅلې مينه او لېوالتيا همداسې تانده غواړو او د هغې ورځې دعا ورته كوو چې نوموړى خپل هېواد او هېواد سمسور وويني او بيا يې يوه پېښه او صحنه هم پر ګرېوانه اوښكې راتويې نه كړي.
 

 Site designed and administrated by Tolafghan.com 2003 webmaster@shirzad.de