دارواښاد پژواک دزوکړې٩٥ېيمه کاليزه ديو علمي سيمينار په ترڅ کې ونمانځل شوه!

بلال شينوارى 27.12.2008 15:02

دافغانستان دوتلي سياستوال،ديپلومات او فرهنګي شخصيت عبدالرحمان پژواک دزوکړې پنځه نوي ېيمه کاليزه په ختيز ښار جلال اباد کې ديو علمي سيمينار په ترڅ کې ونمانځل شوه.په دې سيمينار کې چې دافغانستان دبهرنيو چارووزارت په نوښت جوړ شوى و.دهيواد له ګڼو سيمو نه ليکوالو،شاعرانو او سياستوالو برخه اخيستې وه.سيمينار ته افغان ولسمشر حامد کرزي په خپل راليږل شوي پيغام کې چې دننګرهاردوالي ګل اغا شيرزي له لورې ولوستل شو.عبدالرحمان پژواک له هره پلوه دستاينې وړ شخصيت اودهيواد وياړ بللى او ويلي يې وه چې کله پژواک له يوه فرهنګي ملاتړ سره دبهرنيو چارووزرات ته ولاړ او ديپلوماتيکې چارې وروسپارل شوې نو دکار په دې نوې ساحه کې هم خورا ښه وځليد او په نړيواله کچه ديو وتلي افغان ديپلومات په توګه نړيوالو وپيژاند.ليکوال او څيړونکي استاد حبيب الله رفيع دعبدالرحمان پژواک دسياسي ،حقوقي او ديپلوماتيک شخصيت په اړه وويل هغه له وړوکوالي دسياسي او حقوقي مسايلو سره اشنا شو او دا ځکه چې دهغه پلار دوخت قاضي و.داستاد رفيع په خبره پژواک لومړنى سړى و چې په ١٣١٨ل ل کې دپښتونولۍ په قوانينو رساله وليکله.دهغه په وينا پژواک دنړۍ له يوې ژوندۍ ژبې انګريزۍ سره اشنا و نو دهمدې لارې يې دنړيوالو حقوقو مطالعه وکړه نو همدا وجه وه چې دنوموړي په شخصيت کې داسلامي ،پښتونولۍ اونړيوالو قوانينو اغيز موجود و.او ددې ټولو نه يې په ګټه اخيستنه دخپل ولس لپاره فکر کاوه، حبيب الله رفيع وويل عبدالرحن پژواک پنځلس کاله په ملګرو ملتونو کې دافغانستان ډيره ښه نماينده ګي وکړه. په ولسي جرګه کې دننګرهار دخلکو استازي ډاکتر فاروق ميړنى،اغلې صفيه صديقي ،دننګرهار مرستيال والي ډاکتر محمد علم اسحق زى،محمدحسن ولسمل ،استاد عبداله خدمتګار بختانى او استاد محمداصف صميم ددغه سيمينار نور وينا وال وو چې په وار سره يې دارواښاد پژواک په اړه خپلې خاطرې او ناويلي خبرې وويلې ،عبدالرحمان پژواک چې په کال١٢٩٨ ل ل کې دننګرهار په سروه رود کې زيږيدلى و.په ملګرو ملتونو کې يې دافغانستان دسفير او دايمي استازې تر څوکۍ پورې بېلابېلې دندې تر سره کړې.پژواک دسياست تر څنګ په ادب کې هم لوې لاس درلود دپښتو اودري ژبو ترڅنګ يې په انګليسي ژبه هم ليکنې کړي چې په پښتو کې کليمه داره روپۍ،په دري کې افسانه هاې مردم او په انګريزۍ کې داريانا په نوم اثار ديادولووړ دى.عبدالرحمان پژواک د١٣٧٤ل ل کال دغبرګولي دمياشتې په اتلسمه د(٧٦) کالوپه عمر دافغانانو دهجرت په کور پيښور کې دورپيښې ناروغۍ له امله ومړ او جنازه يې دننګرهار ولايت په سره رود ولسوالۍ په خپله پلرنۍ هديره باغبانيو کې خاورو ته وسپارل شوه.

سرپاڼه

ټول افغان

دارواښاد پژواک دزوکړې٩٥ېيمه کاليزه ديو علمي سيمينار په ترڅ کې ونمانځل شوه!

د ليکوال څو نورې لیکنې

وخت به درنه داسې لېونی ګوره بيا هم غواړي

خبرتياوې او بېلابېل

د کرکټ لوبې لپاره ځانګړې شوې څانګه

له ټول افغان بلاګونو څخه http://bloguna.tolafghan.com