وطن پال او نور ګټور شعرونه

كريم كامران
17.03.2010

توره بوړه او سپین غر راپسې ګوره
دوطن هریو سنګر راپسې ګوره

کوم ګړنګ کې به ملګرو سره ناست یم
دپکتیا دجنګ ډګر راپسې ګوره

که زابل او که هلمند ته کله راغلې
مورچلونه لر اوبر راپسې ګوره

زمونږ دمستو ځلمو دغه وظیفه ده
کونړونه او لوګر راپسې ګوره

تورې څڼې سپین پټکۍ اوږده کالي مو
تل ددې ځلمو لښکر راپسې ګوره

که لیدل مې درته ګران وي ځان شهید کړه
محسني بیا په کوثر راپسې ګوره